ଭୁବନେଶ୍ୱର,୨୬/୦୨ : ଜାଗର ପାଇଁ ବଜାରରେ ଚଢ଼ା ଦର। ଫଳ ଫୁଲରେ ମୋଟା ଦର କଷୁଛନ୍ତି ବେପାରୀ। ବଜାରରେ କେତକୀ ଫୁଲର ଦର ୨ଶହରୁ ନେଇ ୫ଶହ । କିଆଫଳ ଗୋଟା ୧୮୦୦ ଟଙ୍କା । ଦୁଦୁରା ଗୋଟା ୫ ଓ ଅରଖ ଫୁଲର ଦର ୧୦ ରହିଛି । ଅରଖ ମାଳ ୩୦ ଟଙ୍କା । ୨ ଦିନ ତଳେ ନଡ଼ିଆ ଗୋଟା ୨୫ରୁ ୩୦ ଟଙ୍କା ଥିଲା, ତାହା ଏବେ ୫୦ ଛୁଇଁଛି । ମଙ୍ଗଳବାର ଏଭଳି ଥିଲା ଜାଗର ବଜାର ଦର । ବୁଧବାର ଦର ଆହୁରି ବଢ଼ିଛି।
ବିଶେଷକରି ଶ୍ରୀଲିଙ୍ଗରାଜଙ୍କ ମନ୍ଦିର ଚାରିପାଖରେ କିଆ ଓ କେତକୀ ଫୁଲର ପସରା ଦେଖିବାକୁ ମିଳିଥିଲା । ଲୋକେ ଫୁଲ ସହ ଫଳ କିଣିବାକୁ ଭିଡ଼ ଲଗାଇଥିଲେ । ବ୍ରହ୍ମପୁରରୁ କେତକୀ ଫୁଲ ଓ ବାଲେଶ୍ୱରରୁ କିଆ ଫଳ ଆସୁଥିବା ବେପାରୀମାନେ କହିଥିଲେ । ଜାଗର ସମୟରେ ଏହାର ଦର ବୃଦ୍ଧି ପାଇଥାଏ ବୋଲି ନୟାଗଡ଼ରୁ ଆସିଥିବା ରୀନା ଦଳବେହେରା କହିଥିଲେ ।
ଗତବର୍ଷ କେତକୀ ଫୁଲର ଦର ଗୋଟାପ୍ରତି ୧୦୦ରୁ ୧୨୦ ଥିଲା । ହେଲେ ଏଥରକ ଏହା ଦ୍ୱିଗୁଣ ହୋଇଯାଇଛି । ଛୋଟ ଦୀପର ଦାମ ୫୦ପଇସା ଥିବା ବେଳେ ବଡ଼ଦୀପର ଦାମ୍ ୪ଶହ ଟଙ୍କା । ଜାଗର ପାଇଁ ଫଳ ଦର ମଧ୍ୟ ସାମାନ୍ୟ ବଢ଼ିଛି । ସେଓ କିଲୋ ପ୍ରତି ୨୦୦ରୁ ୨୨୦, କମଳା ୨୦୦ରୁ ୩୦୦, କଦଳୀ କିଲୋ ପ୍ରତି ୧୦୦ ଟଙ୍କା ଥିଲା ।
ଏହି ଖବରଟିକୁ ପଢନ୍ତୁ-ଜାଗର ପାଇଁ ଚଳଚଞ୍ଚଳ ଲୋକନାଥଙ୍କ ପୀଠ, ଭୋର ୩ଟାରେ ଉଠିବ ମହାଦୀପ
