ନୂଆଦିଲ୍ଲୀ: କର୍ଣ୍ଣାଟକ ସରକାର ଆଜି (ଶୁକ୍ରବାର) ରାମନଗର ଜିଲ୍ଲାର ନାମକୁ ପରିବର୍ତ୍ତନ କରି ବେଙ୍ଗାଲୁରୁ ଦକ୍ଷିଣ କରିବାକୁ ନିଷ୍ପତ୍ତି ନେଇଛନ୍ତି । ମୁଖ୍ୟମନ୍ତ୍ରୀ ସିଦ୍ଧରମୈୟାଙ୍କ ଅଧ୍ୟକ୍ଷତାରେ ଅନୁଷ୍ଠିତ କ୍ୟାବିନେଟ ବୈଠକରେ ଏହି ନିଷ୍ପତ୍ତି ନିଆଯାଇଛି । ଏନେଇ ଆଇନ ଏବଂ ସଂସଦୀୟ ବ୍ୟାପାର ମନ୍ତ୍ରୀ ଏଚ୍.କେ ପାଟିଲ କହିଛନ୍ତି ଯେ, 'ଆମେ ରାମନଗର ଜିଲ୍ଲାର ନାମ ବେଙ୍ଗାଲୁରୁ ଦକ୍ଷିଣରେ ପରିବର୍ତ୍ତନ କରିବାକୁ ନିଷ୍ପତ୍ତି ନେଇଛୁ।
ସେ କହିଛନ୍ତି କି,'ନାମ ପରିବର୍ତ୍ତନ କରିବାର ନିଷ୍ପତ୍ତି ସେଠାକାର ଲୋକଙ୍କ ଚାହିଦା ଅନୁଯାୟୀ ହୋଇଛି । ରାଜସ୍ୱ ବିଭାଗ ଏହି ପ୍ରକ୍ରିୟା ଆରମ୍ଭ କରିବ । କ୍ୟାବିନେଟ ବୈଠକ ପରେ ସେ ଗଣମାଧ୍ୟମକୁ କହିଛନ୍ତି ଯେ, କେବଳ ଜିଲ୍ଲାର ନାମ ବଦଳିବ, ବାକି ସବୁ ସମାନ ରହିବ ।
ରାମନଗର ଜିଲ୍ଲାର ନାମ ପରିବର୍ତ୍ତନ କରି ବେଙ୍ଗାଲୁରୁ ଦକ୍ଷିଣ କରିବାକୁ ପ୍ରସ୍ତାବ ସେତେବେଳେ ଆସିଥିଲା, ଯେତେବେଳେ କି ଉପମୁଖ୍ୟମନ୍ତ୍ରୀ ଡି.କେ ଶିବକୁମାରଙ୍କ ନେତୃତ୍ୱରେ ଏକ ପ୍ରତିନିଧୀ ଦଳ ମୁଖ୍ୟମନ୍ତ୍ରୀଙ୍କୁ ଭେଟି ଏହି ପ୍ରସଙ୍ଗ ଉଠାଇ ଏକ ସ୍ମାରକପତ୍ର ଦାଖଲ କରିଥିଲେ । ରାମନଗର ଜିଲ୍ଲାରେ ରାମନଗର, ମଗଡି, କନକପୁରା, ଚନ୍ନାପାଟଣା ଏବଂ ହାରୋହଲ୍ଲୀ ତାଲୁକ ସାମିଲ ରହିଛି ।
ତେବେ କର୍ଣ୍ଣାଟକ ସରକାରଙ୍କ ଏହି ନିଷ୍ପତ୍ତିକୁ ସମାଲୋଚନା କରିଛନ୍ତି କେନ୍ଦ୍ର ମନ୍ତ୍ରୀ ତଥା ବିଜେପି ସାଂସଦ ପ୍ରହଲ୍ଲାଦ ଯୋଶୀ । ନ୍ୟୁଜ୍ ଏଜେନ୍ସି ANI ସହ କଥାବାର୍ତ୍ତା କରି ସେ କହିଛନ୍ତି ଯେ, ରାମନଗର ଜିଲ୍ଲାର ନାମ ପରିବର୍ତ୍ତନ କରିବାର ଏହି ନିଷ୍ପତ୍ତି ରାମ ଏବଂ ରାମ ମନ୍ଦିର ପ୍ରତି ତାଙ୍କର ଆଲର୍ଜି ଦର୍ଶାଉଛି ।
କେନ୍ଦ୍ର ମନ୍ତ୍ରୀ ତଥା ବିଜେପି ସାଂସଦ ପ୍ରହଲଦ ଯୋଶୀ ଆହୁରି କହିଛନ୍ତି ଯେ ଆମ ସରକାର ସମୟରେ ରାମ ମନ୍ଦିର ନିର୍ମାଣ ହେଉଥିଲେ ମଧ୍ୟ ସେମାନେ ତାହା କରୁଥିଲେ । ଆଜି ରାମନଗର ନାମ ପରିବର୍ତ୍ତନ କରିବାକୁ ନିଷ୍ପତ୍ତି ନେଇ କଂଗ୍ରେସ ପାର୍ଟି ଏବଂ କଂଗ୍ରେସ ସରକାର ପ୍ରମାଣ କରିଛନ୍ତି ଯେ ସେମାନେ ରାମଙ୍କ ବିରୋଧରେ ଅଛନ୍ତି ।ମୁଁ ତୁରନ୍ତ ସରକାରଙ୍କୁ ଏହି ନିଷ୍ପତ୍ତି ପ୍ରତ୍ୟାହାର କରିବାକୁ ଦାବି କରୁଛି ନଚେତ୍ ବିଜେପି ଏହାକୁ ବିରୋଧ କରିବ ବୋଲି ସେ କହିଛନ୍ତି ।