ଫୁଲବାଣୀ,୨୦/୧୦: ବହୁ ଚର୍ଚ୍ଚିତ ଯୋଡ଼ାମୁଣ୍ଡ ଶିଶୁ ଜଗାକୁ ଦୁଇ ଦିନ ହେଲା ଜ୍ୱର । କ୍ୟାବିନକୁ ଯାଉ ନାହାଁନ୍ତି ଡାକ୍ତର । ଶନିବାର ବାଧ୍ୟ ହୋଇ ଅଟୋରିକ୍ସା କରି ପୁଅକୁ କାଜୁଆଲଟି ଆଣିଥିଲେ ବାପା ଭୂୟାଁ କହଁର । ସେଠାରେ ଡାକ୍ତରଙ୍କୁ ଦେଖାଇ ବାହାରୁ ଔଷଧ କିଣି ପୁଅକୁ ଦେଇଥିଲେ । ଜିଲ୍ଲା ମୁଖ୍ୟ ଚିକିତ୍ସାଳୟ ଶିଶୁ ବିଭାଗର ଏକ ସ୍ୱତନ୍ତ୍ର କ୍ୟାବିନରେ ରହି ଚିକିତ୍ସିତ ହେଉଛି ଜଗା । ମୁଣ୍ଡରେ ଖପୁରୀ ପ୍ରତ୍ୟାରୋପଣ ପାଇଁ ଅନ୍ୟ ଏକ ଅସ୍ତ୍ରୋପଚାର ଅପେକ୍ଷାରେ ରହିଛି ସେ । କିଛିଦିନ ଧରି ତାହାର ଚିକିତ୍ସା ଦାୟିତ୍ୱରେ ଥିଲେ ସ୍ୱତନ୍ତ୍ର ଡାକ୍ତର । କିନ୍ତୁ ଏବେ ଏହି ବ୍ୟବସ୍ଥା ବନ୍ଦ ହୋଇଯାଇଛି ବୋଲି କହିଛନ୍ତି ଜଗାର ବାପା । ଫଳରେ ଦେହ ଖରାପ ହେଲେ ସାଧାରଣ ରୋଗୀ ଭଳି ଆଉଟ୍ ଡୋର୍କୁ ଆସି ଚିକିତ୍ସା କରିବାକୁ ପଡ଼ୁଛି ।
ଶୁକ୍ରବାର ଠାରୁ ଜଗାକୁ ଜ୍ୱର ଓ ଝାଡ଼ା ହେଉଥିବାରୁ ଶନିବାର ସନ୍ଧ୍ୟାରେ ଆଶୁ ଚିକିତ୍ସା ବିଭାଗକୁ ଆଣିଥିଲେ ବାପା ଭୂୟାଁ ଓ ମା’ ପୁଷ୍ପାଞ୍ଜଳି । ଏନେଇ ଜିଲ୍ଲା ମୁଖ୍ୟ ଚିକିତ୍ସାଳୟ ଅଧୀକ୍ଷକ ଡା. ଅକ୍ଷୟ ସାହୁ ଏ ସମ୍ପର୍କରେ କୌଣସି ସୂଚନା ନ ଥିବା କହିଛନ୍ତି।
