ବେଙ୍ଗାଲୁରୁ,୩୦/୦୯: ଆଗାମୀ ମେଗା ନିଲାମ ପୂର୍ବରୁ ଆଇପିଏଲ୍ ଗଭର୍ଣ୍ଣିଂ କାଉନ୍ସିଲ୍ ଘୋଷଣା କରିଥିବା କିଛି ନିୟମ ମଧ୍ୟରେ ବିଦେଶୀ ଖେଳାଳିଙ୍କ ପାଇଁ କିଛି କଠୋର ଦଣ୍ଡ ବିଧାନ ଲାଗୁ କରାଯାଇଛି । ବିଦେଶୀ ଖେଳାଳିମାନଙ୍କ ପାଇଁ ମେଗା ନିଲାମରେ ନାମ ପଞ୍ଜୀକରଣ ବାଧ୍ୟତାମୂଳକ କରାଯାଇଛି । ମେଗା ନିଲାମ ପାଇଁ ନାମ ଦାଖଲ କରିନଥିବା ଖେଳାଳି ପର ବର୍ଷ ମିନି ନିଲାମରୁ ବାଦ ପଡ଼ିବେ। କେବଳ ଆହତ କିମ୍ବା ଚିକିତ୍ସାଜନିତ ଅନୁପସ୍ଥିତି ରହିଥିଲେ ଉକ୍ତ ଖେଳାଳି ମେଗା ନିଲାମ ପାଇଁ ନାମ ପଞ୍ଜୀକରଣ କରି ନଥିଲେ ମଧ୍ୟ ପରବର୍ଷ ମିନି ନିଲାମରେ ନାମ ଦାଖଲ କରିପାରିବେ । ଏଥିପାଇଁ ନିଜ ଦେଶର ବୋର୍ଡ ସେମାନଙ୍କୁ ପ୍ରମାଣପତ୍ର ପ୍ରଦାନ କରିବ ।
କୌଣସି ଖେଳାଳି ମେଗା ନିଲାମରେ ବିକ୍ରି ହୋଇ ସାରିବା ପରେ କୌଣସି ଆଳ ଦେଖାଇ ଟୁର୍ଣ୍ଣାମେଣ୍ଟରୁ ଓହରି ପାରିବେ ନାହିଁ । ଏହା କଲେ ସେମାନଙ୍କୁ ପରବର୍ତ୍ତୀ ୨ ବର୍ଷ ପାଇଁ ନିଲମ୍ବିତ କରାଯିବ । କେବଳ ନିଲାମରେ ବିକ୍ରି ହୋଇସାରିବା ପରେ କୌଣସି ଖେଳାଳି ଆହତ କିମ୍ବା ଅସୁସ୍ଥ ହୋଇ ଚିକିତ୍ସାଧୀନ ଥିଲେ ଉକ୍ତ ଖେଳାଳିଙ୍କୁ ନିଲମ୍ବିତ କରାଯିବ ନାହିଁ ।
ସୂଚନାଯୋଗ୍ୟ, ବଦେଶୀ ଖେଳାଳିମାନେ ଗତ କିଛି ବର୍ଷ ହେଲା ଆଇପିଏଲ୍ ନିଲାମର ଜୋରଦାର ଫାଇଦା ଉଠାଉଛନ୍ତି । ବିଶେଷ କରି ଅଷ୍ଟ୍ରେଲିଆ ଖେଳାଳିମାନେ ଫାଇଦା ଉଠାଇବାରେ ଆଗୁଆ ରହିଛନ୍ତି । ଅଷ୍ଟ୍ରେଲିଆ ଖେଳାଳିମାନେ ମେଗା ନିଲାମରେ ନାମ ପଞ୍ଜୀକୃତ କରୁନାହାନ୍ତି । ମିନି ନିଲାମରେ ଅଧିକ ଅର୍ଥରେ ବିକ୍ରି ହେବା ପାଇଁ ଅପେକ୍ଷା କରୁଛନ୍ତି । ଉଦାହରଣ ସ୍ୱରୂପ ଗତ ବର୍ଷ ଅନୁଷ୍ଠିତ ମିନି ନିଲାମରେ ପ୍ୟାଟ୍ କମିନ୍ସ ୨୦.୫୦ କୋଟି ଓ ମିଚେଲ ଷ୍ଟାର୍କ ୨୪.୭୫ କୋଟି ଟଙ୍କାରେ ବିକ୍ରି ହୋଇଥିଲେ । ଉଭୟ ୨୦୨୩ ସିଜନରୁ ଓହରି ଯାଇଥିଲେ ।
ସେହିପରି ଇଂଲଣ୍ଡ ଖେଳାଳିମାନେ ମଧ୍ୟ ଫାଇଦା ଉଠାଉଛନ୍ତି । ଇଂଲଣ୍ଡର ଅଧିକାଂଶ ଖେଳାଳି ନିଲାମ ପାଇଁ ନାମ ଦାଖଲ କରୁଛନ୍ତି । ନିଲାମରେ ଫ୍ରାଞ୍ଚାଇଜମାନେ ପ୍ରଚୁର ଅର୍ଥ ଲଗାଇ ସେମାନଙ୍କୁ କିଣୁଛନ୍ତି । ମାତ୍ର ଟୁର୍ଣ୍ଣାମେଣ୍ଟ ଆରମ୍ଭ ହେବା ପୂର୍ବରୁ ବିଭିନ୍ନ ବାହାନା କରି ଅଧିକାଂଶ ଖେଳାଳି ଓହରି ଯାଉଛନ୍ତି । ଯାହା ଫଳରେ ଫ୍ରାଞ୍ଚାଇଜ ସେମାନଙ୍କ ବିକଳ୍ପ ଖୋଜିବାରେ ବିଫଳ ହେଉଛି, ଯାହା ପ୍ରଦର୍ଶନକୁ ପ୍ରଭାବିତ କରୁଛି । ପଞ୍ଜାବ କିଙ୍ଗ୍ସ ଓ ଦିଲ୍ଲୀ କ୍ୟାପିଟାଲ୍ସ ବାରମ୍ବାର ଏଭଳି ଅସୁବିଧାର ସମ୍ମୁଖୀନ ହେଉଛନ୍ତି ।
ନିଲାମ ପୂର୍ବରୁ ଫ୍ରାଞ୍ଚାଇଜ୍ମାନେ ସମସ୍ତ ଅସୁବିଧା ବିସିସିଆଇକୁ ଜଣାଇଥିଲେ ଓ କଠୋର ଦଣ୍ଡ ପାଇଁ ଦାବି କରିଥିଲେ । ଗଭର୍ଣ୍ଣିଂ କାଉନ୍ସିଲ ବୈଠକରେ ଫ୍ରାଞ୍ଚାଇଜମାନଙ୍କ ଦାବି ରଖି କଠୋର ନିୟମ ଲାଗୁ କରାଯାଇଛି ।
