ନୂଆଦିଲ୍ଲୀ: ପୂର୍ବତନ ଭାରତୀୟ ରେସଲର ଭିନେଶ ଫୋଗାଟ ଅବସର ଘୋଷଣା କରିବା ପରେ ଏବେ ରାଜନୀତି ମୈଦାନରେ ଭାଗ୍ୟ ପରୀକ୍ଷା କରୁଛନ୍ତି । ପ୍ୟାରିସ୍ ୨୦୨୪ ଅଲିମ୍ପିକ୍ସରେ ଅଯୋଗ୍ୟ ଘୋଷଣା ହେବା ପରେ ସେ ଫାଇନାଲ୍ ଖେଳିବାରୁ ବଞ୍ଚିତ ହୋଇଥିଲେ । ବହୁ ନ୍ୟାୟିକ ଲଢ଼େଇ ପରେ ବି ତାଙ୍କୁ ଫାଇନାଲ୍ରେ ଖେଳିବାକୁ ସୁଯୋଗ ମିଳିନଥିଲା । ଏପରିକି ରୌପ୍ୟ ପଦକ ପାଇବାରୁ ବଞ୍ଚିତ ହୋଇଥିଲେ ଭିନେଶ ଫୋଗାଟ । ଏବେ କଂଗ୍ରେସ ଟିକେଟରୁ ହରିୟାଣା ବିଧାନସଭା ନିର୍ବାଚନ ଲଢ଼ୁଥିବା ଭିନେଶ ଫୋଗାଟ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ନେଇ ଏକ ବଡ଼ ଦାବି କରିଛନ୍ତି ।
ସେ କହିଛନ୍ତି ଯେ , ଅଲିମ୍ପିକ୍ସରେ ବିଫଳତା ପରେ ତାଙ୍କୁ ପ୍ରଧାନମନ୍ତ୍ରୀଙ୍କ କଲ ଆସିଥିଲା । କିନ୍ତୁ ସେ ପ୍ରଧାନମନ୍ତ୍ରୀଙ୍କ ସହ କଥା ହୋଇନଥିଲେ । କାରଣ ସେତେବେଳେ ତାଙ୍କର ଭାବାବେଗ ଏବଂ ପ୍ରଚେଷ୍ଟା ରାଜନୈତିକ ଉଦ୍ଦେଶ୍ୟରେ ବ୍ୟବହାର କରାନଯାଉ ବୋଲି ବିଚାର କରିଥିଲେ ଭିନେଶ । ସେ ଆହୁରି କହିଛନ୍ତି ଯେ, ‘ସେ (ନରେନ୍ଦ୍ର ମୋଦୀ) ମୋତେ ସିଧାସଳଖ କଲ କରିନଥିଲେ । ସେଠାରେ ଥିବା ଭାରତୀୟ ଅଧିକାରୀ ମୋଦୀ କଥା ହେବାକୁ ଚାହୁଁଛନ୍ତି ବୋଲି ମୋତେ ଜଣାଇଥିଲେ । ମୁଁ ରାଜି ହୋଇଯାଇଥିଲି । କିନ୍ତୁ ସେମାନେ ସର୍ତ୍ତ ରଖିଥିଲେ । ମୋତେ କୁହାଗଲା, ମୋ ପକ୍ଷରୁ କେହି ଉପସ୍ଥିତ ରହିବେ ନାହିଁ । ସୋସିଆଲ ମିଡିଆରେ ଶେୟାର ଲାଗି ପ୍ରଧାନମନ୍ତ୍ରୀଙ୍କ ପକ୍ଷରୁ ମୋର ଭିଡିଓ ସହ ମୋ କଲ ରେକର୍ଡ କରିବାକୁ ଦୁଇ ଅଧିକାରୀ ଉପସ୍ଥିତ ରହିବେ ।’
ଅଲିମ୍ପିଆନ୍ ଭିନେଶ ଫୋଗାଟ ଏକ ଜାତୀୟ ଗଣମାଧ୍ୟମକୁ ଦେଇଥିବା ସାକ୍ଷାତକାରରେ ଏନେଇ ଦାବି କରିଛନ୍ତି । ଭିନେଶ ଫୋଗାଟ କହିଛନ୍ତି, ମୁଁ ଚାହୁଁନଥିଲି ମୋର ଭାବାବେଗ ଏବଂ କଠିନ ପରିଶ୍ରମ ସୋସିଆଲ ମିଡିଆରେ ଉପହାସର ଖୋରାକ ହେଉ । ତେବେ ରେକର୍ଡିଂ ବିନା ପ୍ରଧାନମନ୍ତ୍ରୀଙ୍କ ପକ୍ଷରୁ ଏକ କଲ ମିଳିଥିଲେ ତାହା ପ୍ରଶଂସାଯୋଗ୍ୟ ହୋଇଥାନ୍ତା ବୋଲି ସେ କହିଛନ୍ତି । ସାକ୍ଷାତକାରରେ ଭିନେଶ ଫୋଗାଟ କହିଛନ୍ତି, ‘ଯଦି ସେ ପ୍ରକୃତରେ ଆଥଲେଟଙ୍କ ପ୍ରତି ଯତ୍ନବାନ, ତେବେ ରେକର୍ଡ ନକରି ମୋତେ କଲ କରିପାରିଥାନ୍ତେ । ଏଥିପାଇଁ ମୁଁ ତାଙ୍କ ପାଖରେ ଚିର ଋଣୀ ରହିଥାନ୍ତି ।’
ସେପଟେ ତାଙ୍କର କଥାବାର୍ତ୍ତାକୁ ନିୟନ୍ତ୍ରଣ କରିବା ଲାଗି ମୋଦୀଙ୍କ କାର୍ଯ୍ୟାଳୟ ତାଙ୍କ ପାଖରେ ସର୍ତ୍ତ ରଖିଥିଲା ବୋଲି ବିଶ୍ବାସ କରୁଛନ୍ତି ଫୋଗାଟ । ବୋଧହୁଏ ତାଙ୍କୁ (ପ୍ରଧାନମନ୍ତ୍ରୀ) ଜଣାଥିଲା ଯଦି ଭିନେଶ ସହ କଥା ହୁଏ ତେବେ ସେ ଗତ ଦୁଇ ବର୍ଷରେ ଘଟିଥିବା ଘଟଣା ସଂପର୍କରେ ପଚାରିବ । ଏଥିପାଇଁ ହୁଏତ ମୋ ପକ୍ଷରୁ ଫୋନ୍ କରିବାକୁ ମନା କରାଯାଇଥିଲା । ଯାହାଦ୍ବାରା ସେମାନେ ଭିଡିଓକୁ ସେମାନଙ୍କ ହିସାବରେ ଏଡିଟ କରିପାରିବେ କିନ୍ତୁ ମୁ ଏଡିଟ୍ ନକରି ଅରିଜିନାଲ୍ ଭିଡିଓ ପୋଷ୍ଟ କରିବି । ତେଣୁ ସେମାନେ ମନା କରିଥିଲେ ବୋଲି ଭିନେଶ ଫୋଗାଟ କହିଛନ୍ତି ।
ସୂଚନାଯୋଗ୍ୟ, ଦୁଇ ବର୍ଷ ପୂର୍ବରୁ ଭିନେଶ ଫୋଗାଟ କୁସ୍ତି ମହାସଂଘର ତତ୍କାଳୀନ ଅଧ୍ୟକ୍ଷଙ୍କ ବିରୋଧରେ ବିକ୍ଷୋଭ କରିଥିଲେ । ବ୍ରିଜଭୂଷଣ ଶରଣ ସିଂହଙ୍କ ବିରୋଧରେ ଭିନେଶଙ୍କ ସମେତ ଅନ୍ୟ ମହିଳା ରେସଲର ସଙ୍ଗୀନ ଅଭିଯୋଗ ଆଣିଥିଲେ । ଏହା ପରେ ପୋଲିସ ସହ ଭିନେଶ ଫୋଗାଟଙ୍କ ସଂଘର୍ଷ ହୋଇଥିଲା । ସେ ମାସ ମାସ ଧରି ଧାରଣାରେ ବସିଥିଲେ । ଏହା ସତ୍ତ୍ବେ ସେ ପ୍ୟାରିସ ଅଲିମ୍ପିକ୍ସ ଲାଗି ଯୋଗ୍ୟତା ଅର୍ଜନ କରିଥିଲେ । ସେଠାରେ ଭିନେଶ ଫୋଗାଟ ମେଡାଲ ଜିତିବାକୁ ଥିବା ବେଳେ ତାଙ୍କ ଶରୀରର ଓଜନ ମାତ୍ର ୧୦୦ ଗ୍ରାମ ବଢ଼ିଯିବାରୁ ତାଙ୍କୁ ଫାଇନାଲରୁ ଆଉଟ ହେବାକୁ ପଡ଼ିଥିଲା । ଏହି ଘଟଣା ପରେ ସେ କୁସ୍ତିରୁ ଅବସର ଘୋଷଣା କରିଥିଲେ । ଏବେ ସେ ହରିୟାଣା ବିଧାନସଭା ନିର୍ବାଚନରେ କଂଗ୍ରେସ ଟିକେଟରେ ଜୁଲାନା ଆସନରୁ ଲଢ଼ୁଛନ୍ତି ।
