ପୁରୀ,୦୧/୧୦: ଚଳିତ ବର୍ଷ ପବିତ୍ର କାର୍ତ୍ତିକ  ମାସରେ ସରକାର ପ୍ରାୟ ୨୫୦୦ ମହିଳାଙ୍କୁ ହବିଷ୍ୟ କରିବାକୁ ମାଗଣାରେ ସବୁ ସୁବିଧା ଯୋଗାଇଦେବେ । କାର୍ତ୍ତିକ ବ୍ରତ ପାଳନ ନିମନ୍ତେ ହବିଷ୍ୟାଳିଙ୍କୁ ପୁରୀରେ  ମାଗଣାରେ ସବୁ ସୁବିଧା ଯୋଗାଇ ଦେବା ପାଇଁ  ଜିଲ୍ଲାପାଳ ଦେଇଥିବା ପ୍ରସ୍ତାବକୁ ସରକାର ମଂଜୁର  କରିଛନ୍ତି । ଏନେଇ ସୋମବାର ଜିଲ୍ଲାପାଳ ସିଦ୍ଧାର୍ଥ  ଶଙ୍କର ସ୍ୱାଇଁ ତାଙ୍କ ଆବାସିକ କାର୍ଯ୍ୟାଳୟ ପ୍ରକୋଷ୍ଠରେ  ଗଣମାଧ୍ୟମକୁ ସୂଚନା ଦେଇଛନ୍ତି । ଅକ୍ଟୋବର ୧୮  ତାରିଖରୁ ଆରମ୍ଭ ହେବାକୁ ଯାଉଛି କାର୍ତ୍ତିକ ବ୍ରତ । 

ହବିଷ୍ୟାଳିଙ୍କ ରହଣି, ପରିବହନ, ଶ୍ରୀମନ୍ଦିରରେ  ଠାକୁର ଦର୍ଶନ, ସୁରକ୍ଷା ବ୍ୟବସ୍ଥା, ପରିମଳ, ସ୍ୱାସ୍ଥ୍ୟ  ସେବା, ମହାପ୍ରସାଦ ସେବନ, ସଂସ୍କୃତିକ କାର୍ଯ୍ୟକ୍ରମ  ପ୍ରଭୃତି ସମସ୍ତ ବିଷୟରେ ପ୍ରଶାସନ ସୋମବାର  ପ୍ରସ୍ତୁତି ବୈଠକରେ ଠୋସ୍‌ ପଦକ୍ଷେପ ନେଉଛି ।  ବୃନ୍ଦାବତୀ ନିବାସ ବ୍ୟତୀତ, ପୌରସଂସ୍ଥାର  କଲ୍ୟାଣ ମଣ୍ଡପମାନଙ୍କରେ ହବିଷ୍ୟାଳିଙ୍କ  ରହଣି ବ୍ୟବସ୍ଥା କରିବାକୁ ପ୍ରାଥମିକ ନିଷ୍ପତ୍ତି  ହୋଇଛି । ବାଗେଡ଼ିଆ ଧର୍ମଶାଳାକୁ ହବିଷ୍ୟାଳି  ଶିବିର କରିବା ନିଷ୍ପତ୍ତିକୁ ବାଦ୍‌ ଦିଆଯାଇଛି । 

ଅକ୍ଟୋବର ପ୍ରଥମ ସପ୍ତାହରେ ଆବେଦନ ପ୍ରକ୍ରିୟା ଆରମ୍ଭ ହୋଇଯିବ । ସରକାରଙ୍କ ଏହି  ସୁବିଧା ନେବାକୁ ଚାହୁଁଥିବା ମହିଳାମାନେ  ଅନ୍‌ଲାଇନ୍‌ରେ ଆବେଦନ କରିବେ । ଏଥିନିମନ୍ତେ  ପ୍ରଶାସନ ପକ୍ଷରୁ ଖୁବ୍‌ଶୀଘ୍ର ଇମେଲ୍‌ ଆକାଉଣ୍ଟ  ଓ ଯୋଗାଯୋଗ ମୋବାଇଲ ନମ୍ବର ଜାରି ହେବ ।  ଆବେଦନ ପ୍ରକ୍ରିୟାରେ ସ୍ୱଚ୍ଛତା ରକ୍ଷା ନିମନ୍ତେ  ଏକ ମାର୍ଗଦର୍ଶିକା ମଧ୍ୟ ଜାରି କରାଯିବ । ଯାହା  ଆସନ୍ତା ୧୦ ଦିନ ଭିତରେ ପ୍ରଶାସନ ସ୍ପଷ୍ଟ କରିବ । 

ହବିଷ୍ୟାଳିଙ୍କୁ ମହାପ୍ରସାଦ ଯୋଗାଇ  ଦେବା ନିମନ୍ତେ ପ୍ରଶାସନ ପକ୍ଷରୁ ସୁଆର  ମହାସୁଆର ନିଯୋଗ ସହ ବୈଠକ କରାଯାଇ  ଦର ନିର୍ଦ୍ଧାରିତ କରାଯିବ । ସେହିପରି ଯେପରି  ହବିଷ୍ୟାଳିଙ୍କୁ ମହାପ୍ରଭୁଙ୍କ ଦର୍ଶନ ଠିକ୍‌ ଭାବେ  ମିଳିବ ସେଥିନିମନ୍ତେ ସ୍ୱେଚ୍ଛାସେବୀଙ୍କୁ ମୁତୟନ  କରାଯିବ । ସ୍ୱେଚ୍ଛାସେବୀମାନେ ହବିଷ୍ୟାଳିଙ୍କୁ ବସ୍‌  କିମ୍ବା ଅନ୍ୟ ବ୍ୟାଟେରି ଗାଡ଼ିରେ ନେଇ ମହାପ୍ରଭୁଙ୍କ  ଦର୍ଶନ କରାଇବେ । କାର୍ତ୍ତିକ ମାସରେ ଦର୍ଶନାର୍ଥୀଙ୍କ  ସଂଖ୍ୟା ବହୁ ସଂଖ୍ୟାରେ ବଢ଼ିବା ଆଶଙ୍କା ଥିବାରୁ  ଭିଡ଼ ନିୟନ୍ତ୍ରଣ ନିମନ୍ତେ ପୁଲିସ ଓ ଜେଟିପିମାନଙ୍କୁ  ଆବଶ୍ୟକତା ମୁତାବକ ସ୍ଥାନରେ ମୁତୟନ କରାଯିବ । 

ପ୍ରତିବର୍ଷ ପ୍ରଶାସନ ୩ରୁ ୪ ହଜାର ହବିଷ୍ୟାଳିଙ୍କ  ରହଣି, ମହାପ୍ରସାଦ ସହ ଆନୁସଙ୍ଗିକ ସମସ୍ତ ବ୍ୟବସ୍ଥା  କରୁଥିବା ବେଳେ ଚଳିତ ବର୍ଷ ଏଥିରେ କାଟଛାଟ୍‌  କରିବାକୁ ନିଷ୍ପତ୍ତି ନିଆଯାଇଛି । ଗତ ବର୍ଷମାନଙ୍କରେ  ହବିଷ୍ୟ ବ୍ରତ କରିବାକୁ ଆସୁଥିବା ମା’ମାନଙ୍କ ଅପେକ୍ଷା  ନୂଆ ହବିଷ୍ୟାଳିଙ୍କୁ ପ୍ରାଥମିକ ଭିତରେ ସୁଯୋଗ  ଦିଆଯିବ ବୋଲି ଜିଲ୍ଲାପାଳ ସୂଚନା ଦେଇଛନ୍ତି । 

ସରକାର ବଦଳି ଥିବାରୁ ନୂଆ ହିତାଧିକାରୀଙ୍କୁ  ସୁଯୋଗ ଦେବାକୁ ଚିନ୍ତା କରାଯାଉଛି । ସେପଟେ  ଗତବର୍ଷ ହବିଷ୍ୟାଳିଙ୍କ କାର୍ତ୍ତିକ ବ୍ରତ ପାଳନରେ  ପ୍ରାୟ ୧ କୋଟି ଟଙ୍କା ଖର୍ଚ୍ଚ ହୋଇଥିବା ବେଳେ  ଚଳିତ ବର୍ଷ ପ୍ରାୟ ୨ କୋଟି ଟଙ୍କା ଖର୍ଚ୍ଚ ଅଟକଳ  କରାଯାଇଛି ବୋଲି ଜିଲ୍ଲାପାଳ ସୂଚନା ଦେଇଛନ୍ତି ।