ନୂଆଦିଲ୍ଲୀ,୨୯।୯: ପେରୁର ଲିମାରେ ଚାଲିଥିବା ଆଇଏସଏସ୍ଏଫ୍ ଜୁନିଅର ସୁଟର ଚମ୍ପିଆନ୍ସିପ୍ରେ ଭାରତୀୟ ଖେଳାଳିଙ୍କୁ ଜରିମାନା। ୧୦ ମିଟର ଏୟାର ପିସ୍ତଲ ଫାଇନାଲ ପାଇଁ ଅଭ୍ୟାସ ମ୍ୟାଚ୍ରେ ବିଳମ୍ବରେ ପହଁଞ୍ଚିବା ପାଇଁ ଦୁଇ ପଏଣ୍ଟର ଜରିମାନା ଲଗାଯାଇଥିଲା। ଏହି କାରଣରୁ ଭାରତୀୟ ଖେଳାଳି ଜଣକ ଜିଣିପାରିନଥିଲେ ପଦକ। ଅନ୍ତର୍ଜାତୀୟ ସୁଟର ମହାସଂଘ(ଆଇଏସ୍ଏସ୍ଏଫ୍) ଶନିବାର ୨୦ ବର୍ଷୀୟ ସୁଟର ଉମେଶ ଚୌଧୁରିଙ୍କ ଉପରେ ନିୟମ ୬.୧୭.୨.୩ ଉଲଂଘନ ପାଇଁ ଦୁଇ ପଏଣ୍ଟ ଜରିମାନା ଲଗାଇଥିଲେ। ଏହାଦ୍ବାରା ଭାରତର ୬୦ ସଦସ୍ୟ ଦଳରେ ସାମିଲ କୋଚ୍ ଓ ସହାୟକ ଷ୍ଟାଫଙ୍କ ଭୂମିକା ଉପରେ ପ୍ରଶ୍ନ ଉଠିଛି।
ଫାଇନାରେ ଉମେଶ ନିଜର ପ୍ରଥମ ସଟ୍ରେ ଦୁଇ ପଏଣ୍ଟ କଟିବା ପରେ ୭.୪ ପଏଣ୍ଟ ମିଳିଥିଲା। ଭାରତୀୟ ରାଷ୍ଟ୍ରୀୟ ରାଇଫଲ ସଂଘ(ଏନ୍ଆରଏଆଇ)ର ସଚିବ ରାଜୀବ ଭାଟିଆଙ୍କୁ ଯେତେବେଳେ ଏନେଇ ପଚରା ଯାଇଥିଲା ସେ କହିଥିଲେ, ତାଙ୍କୁ ଏଭଳି ଘଟଣା ବିଷୟରେ କୌଣସି ସୂଚନା ନାହିଁ ଓ ଏହି ପ୍ରସଙ୍ଗ ଉପରେ ଟିପ୍ପଣୀ ଦେବାକୁ ଚାହାନ୍ତି ନାହିଁ। ଉମେଶ କ୍ବାଲିଫିକେସନ୍ ପର୍ଯ୍ୟାୟରେ ୫୯୦ ସ୍କୋର ସହ ତୃତୀୟ ସ୍ଥାନରେ ଥିଲେ ଓ ଯଦି ତାଙ୍କ ଉପରେ ଦୁଇ ପଏଣ୍ଟ ଜରିମାନା ଲାଗିନଥାନ୍ତା ତେବେଳ ସେ ୮ ଜଣ ସୁଟ୍ରଙ୍କ ଫାଇନାଲରେ ସ୍ବର୍ଣ୍ଣ ପଦକ ଜିତିପାରିଥାନ୍ତେ। ଜରିମାନା ଲଗାଯିବା କାରଣରୁ ଉମେଶ ଷଷ୍ଠ ସ୍ଥାନରେ ଥିଲେ।
ଭାଟିଆଙ୍କୁ ଯେତେବେଳେ କୁହାଯାଇଥିଲା ଜରିମାନାର ବିବରଣୀ ଆଇଏସଏସଏଫ୍ର ଓ୍ବେବସାଇଟ୍ରେ ଅଛି, ସେତେବେଳେ ସେ କହିଥିଲେ, ହୋଇପାରେ ସେ ଠିକ୍ ସମୟରେ ଅଭ୍ୟାସ କରିବାକୁ ପହଁଞ୍ଚି ପାରିନଥିଲେ। ମୁଁ ଜାଣିନି କାହିଁକି ଓ କେଉଁ କାରଣରୁ ସେଠାରେ ପହଁଞ୍ଚି ପାରିନଥିଲେ। ମୋତେ ସେଠାରେ ଥିବା ଅଧିକାରୀଙ୍କଠାରୁ ସୂଚନା ପାଇବାକୁ ପଡିବ।