ନୂଆଦିଲ୍ଲୀ,୦୮/୦୭: ଆସନ୍ତା ପାଞ୍ଚ ବର୍ଷ ପାଇଁ ୟୁଏପିଏ ଅଧୀନରେ ଶିଖ୍ ଫର ଜଷ୍ଟିସ୍ (SFJ) କୁ ପ୍ରତିବନ୍ଧକ ଲଗାଇବାକୁ କେନ୍ଦ୍ର ସରକାର ନିଷ୍ପତ୍ତି ନେଇଛନ୍ତି। ଅଧିକାରୀଙ୍କ କହିବାନୁସାରେ, ଜାତୀୟ ଅନୁସନ୍ଧାନ ଏଜେନ୍ସି (ଏନ୍ଆଇଏ) ଦ୍ୱାରା କରାଯାଇଥିବା ଅନୁସନ୍ଧାନରେ ମିଳିଥିବା ନୂତନ ପ୍ରମାଣ ଆଧାରରେ ଏହି ନିଷ୍ପତ୍ତି ନିଆଯାଇଛି। ଏହି ତଥ୍ୟ ଶିଖ୍ ଫର ଜଷ୍ଟିସ୍ ଏବଂ ଆମେରିକୀୟ ନାଗରିକ ଗୁରୁପତବନ୍ତ ସିଂହ ପନ୍ନୁଙ୍କ ବିରୋଧରେ ଏକିକୃତ କରାଯାଇଛି। ଗତ ବର୍ଷ ଏହି ସଂସ୍ଥା ପଞ୍ଜାବ ଏବଂ ଚଣ୍ଡିଗଡ଼ରେ ମଧ୍ୟ ଏହାର ସମ୍ପତ୍ତିକୁ ବାଜାପ୍ତି କରିଥିଲା।
୨୦୧୯ରେ ଲାଗିଥିବା ପ୍ରତିବନ୍ଧକ:
ଆତଙ୍କବାଦ ବିସ୍ତାର ପାଇଁ ବେଆଇନ କାର୍ଯ୍ୟକଳାପ (ପ୍ରତିରୋଧ) ଅଧିନିୟମ (ୟୁଏପିଏ) ଅନୁଯାୟୀ ୧୦ ଜୁଲାଇ ୨୦୧୯ ରେ ଏସ୍ଏଫ୍ଜେକୁ ପ୍ରଥମେ ଭାରତରେ ନିଷେଧ କରାଯାଇଥିଲା। ଏନଆଇଏ ଅନୁଯାୟୀ ପଞ୍ଜାବ ତଥା ଭାରତର ଅନ୍ୟାନ୍ୟ ଅଞ୍ଚଳରେ ଆତଙ୍କବାଦ ବିସ୍ତାର ତଥା ଆତଙ୍କବାଦୀ କାର୍ଯ୍ୟକଳାପ କରିବାରେ ପନ୍ନୁ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଆସୁଛି। ଏଥିସହ ଏଜେନ୍ସି କହିଛି ଯେ ଏହାର ସଂଗଠନ 'ଶିଖ୍ ଫର ଜଷ୍ଟିସ୍' ସାଇବର ସ୍ପାଏଓୟାର ଅପବ୍ୟବହାର କରି ନିରୀହ ଯୁବକମାନଙ୍କୁ ବିଭ୍ରାନ୍ତ କରୁଛି ଏବଂ ଆତଙ୍କବାଦୀ କାର୍ଯ୍ୟକଳାପ ପାଇଁ ସେମାନଙ୍କୁ ଉତ୍ସାହିତ କରୁଛି।
ଜାତୀୟ ଅନୁସନ୍ଧାନ ଏଜେନ୍ସି (ଏନଆଇଏ) ଦ୍ବାରା ହୋଇଥିବା ଅନୁସନ୍ଧାନରୁ ଜଣାପଡିଛି ଯେ ଗୁରୁପତବନ୍ତ ସିଂ ପନ୍ନୁ 'ଶିଖ୍ ଫର ଜଷ୍ଟିସ୍' ର ମୁଖ୍ୟ ଅପରେଟର ଅଟେ। ସେ ଏକ ପୃଥକ ଦେଶ 'ଖଲିସ୍ତାନ' ସୃଷ୍ଟି ପାଇଁ ସଂଗ୍ରାମ କରିବାକୁ ସୋସିଆଲ ମିଡିଆ ମାଧ୍ୟମରେ ପଞ୍ଜାବର ଗ୍ୟାଙ୍ଗଷ୍ଟର ଏବଂ ଯୁବକମାନଙ୍କୁ ପ୍ରୋତ୍ସାହିତ କରୁଛନ୍ତି, ଯାହାକି ଭାରତର ସୁରକ୍ଷା, ଅଖଣ୍ଡତା ଏବଂ ସାର୍ବଭମତ୍ୱ ବିରୁଦ୍ଧରେ ଅଟେ। ଏନଆଇଏ ଅନୁସନ୍ଧାନରୁ ଏହା ମଧ୍ୟ ଜଣାପଡିଛି ଯେ ପନ୍ନୁ ସର୍ବସାଧାରଣରେ ଭାରତୀୟ କୂଟନୀତିଜ୍ଞ ତଥା ସରକାରୀ କର୍ମଚାରୀଙ୍କୁ ଧମକ ଦେଉଛି।
