ନ୍ୟୁୟର୍କ,୦୯/୦୬: ରବିବାର ଭାରତ ଏବଂ ପାକିସ୍ତାନ ମଧ୍ୟରେ ଟି ୨୦ ବିଶ୍ୱକପ ୨୦୨୪ ର ଗୁରୁତ୍ବପୂର୍ଣ୍ଣ ମ୍ୟାଚ୍ ନ୍ୟୁୟର୍କ ଷ୍ଟାଡିୟମରେ ଖେଳାଯାଇଛି। ନ୍ୟୁୟର୍କର ନାସାଉ କାଉଣ୍ଟି ଇଣ୍ଟରନ୍ୟାସନାଲ ଷ୍ଟାଡିୟମରେ କ୍ରିକେଟ୍ ଜଗତର ଦୁଇ ପ୍ରମୁଖ ପ୍ରତିନ୍ଦ୍ବନ୍ଦିଙ୍କ ମଧ୍ୟରେ ମହାଲଢ଼େଇ ଚାଲିଛି। ତେବେ ଏହି ରୋମାଞ୍ଚକର ମୁକାବିଲାକୁ ୬ ରନ୍ରେ ଜିତି ନେଇଛି ଭାରତ।
ପାକିସ୍ତାନ ବ୍ୟାଟିଂ-ଭାରତ ବୋଲିଂ:
ପାକିସ୍ତାନ ଟସ୍ ଜିତି ଭାରତକୁ ପ୍ରଥମେ ବ୍ୟାଟିଂ କରିବାକୁ ଆମନ୍ତ୍ରଣ କରିଥିଲା। ତେବେ ପାକ୍ ବୋଲଙ୍କର ଶାଣିତ ପ୍ରଦର୍ଶନ ଆଗରେ ଭାରତୀୟ ଦଳ ୧୯ ଓଭରରେ ସମସ୍ତ ଓ୍ବିକେଟ ହରାଇ ୧୧୯ ରନ କରିଥିବା ବେଳେ ପାକିସ୍ତାନକୁ ୧୨୦ ରନ୍ର ବିଜୟ ଲକ୍ଷ୍ୟ ଦେଇଥିଲା। ପରେ ମଇଦାନକୁ ଓହ୍ଲାଇଥିବା ପାକିସ୍ତାନୀ ବ୍ୟାଟରଙ୍କ ପ୍ରଦର୍ଶନ କିନ୍ତୁ ଭାରତୀୟ ବୋଲରଙ୍କ ଘାତକ ବୋଲିଂ ଆଗରେ ଫିକା ପଡ଼ିଯାଇଥିଲା। ପାକିସ୍ତାନ ପକ୍ଷରୁ ମହମ୍ମଦ ରିଜଓ୍ବାନ ସର୍ବାଧିକ ୩୧ ରନ୍ କରିଥିବା ବେଳେ ବାବର ଆଜମ, ଉସ୍ମାନ୍ ଖାନ୍ ଓ ଫକର ଜମନ ୧୩ ରନ୍ ଲେଖାଏଁ ସ୍କୋର କରିଥିଲେ। ଇମଦ ଓ୍ବାସିମ ୧୫ ଓ ନସିମ୍ ଶାହା ୧୦ ରନ୍ କରିଥିଲେ।
ଏପଟେ ଭାରତୀୟ ବୋଲରଙ୍କ ମଧ୍ୟରେ ଜସପ୍ରିତ ବୁମ୍ରା ୪ ଓଭର ବୋଲିଂ କରି ମାତ୍ର ୧୪ ରନ୍ ଦେଇ ସର୍ବାଧିକ ୩ଟି ଓ୍ବିକେଟ ନେଇଥିବା ବେଳେ ହାର୍ଦ୍ଦିକ ପାଣ୍ଡ୍ୟା ୪ ଓଭର ବୋଲିଂ କରି ୨୪ ରନ୍ ଦେଇ ୨ଟି ଓ୍ବିକେଟ ନେଇଥିଲେ। ସେହିପରି ଅର୍ଶଦୀପ ସିଂ ଓ ଅକ୍ଷର ପଟେଲଙ୍କୁ ଗୋଟିଏ ଲେଖାଏଁ ସଫଳତା ମିଳିଥିଲା।
ଭାରତର ବ୍ୟାଟିଂ-ପାକିସ୍ତାନ ବୋଲିଂ:
ପ୍ରଥମ ଇନିଂସରେ ପ୍ରଥମେ ମଇଦାନକୁ ଓହ୍ଲାଇଥିଲେ ରୋହିତ ଶର୍ମା ଓ ବିରାଟ କୋହଲି। ତେବେ ମାତ୍ର ୧.୩ ଓଭରରେ ନସିମ୍ ଶାହାଙ୍କ ବଲ୍ରେ ଉସ୍ମାନ୍ ଖାନ୍ଙ୍କ କ୍ୟାଚ୍ ଆଉଟ୍ର ଶିକାର ହୋଇଥିଲେ ବିରାଟ କୋହଲି। ପରେ ୨.୪ ଓଭର ବେଳକୁ ରୋହିତ ଶର୍ମାଙ୍କ ଓ୍ବିକେଟ ଦଳକୁ ଚିନ୍ତାରେ ପକାଇଥିଲା। ପରେ ଅକ୍ଷର ପଟେଲ ଓ ଋଷଭ ପନ୍ତ ଖେଳ ସମ୍ଭାଳିଥିଲେ ହେଁ ୭.୪ ଓଭର ବେଳକୁ ଅକ୍ଷର ପଟେଲଙ୍କୁ ପାଭିଲିୟନ ପଠାଇଥିଲେ ନସିମ୍ ଶାହା। ଏହା ପରେ ଲଗାତର ବ୍ୟାଟିଂ ବିପର୍ଯ୍ୟୟର ସମ୍ମୁଖିନ ହୋଇଥିଲା ଟିମ୍ ଇଣ୍ଡିଆ।
ଲଗାତାର ଭାବେ ସୂର୍ଯ୍ୟକୁମାର ଯାଦବ, ଋଷଭ ପନ୍ତ, ଶିବମ ଦୁବେ ଓ ରବିନ୍ଦ୍ର ଜାଡ଼େଜାଙ୍କ ଭଳି ଖେଳାଳି ପାଭିଲିୟନ ଫେରିଥିଲେ। ଦଳ ପକ୍ଷରୁ ଋଷଭ ପନ୍ତ ସର୍ବାଧୀକ ୪୨ ରନ୍ କରିଥିବା ବେଳେ ଅକ୍ଷର ପଟେଲ ୨୦ ଏବଂ ରୋହିତ ଶର୍ମା ୧୩ ରନ୍ କରିଛନ୍ତି। ଅନ୍ୟ କୌଣସି ବ୍ୟାଟର ଦୁଇ ଅଙ୍କ ବି ଛୁଇଁପାରି ନାହାନ୍ତି। ଦଳ ୧୯ ଓଭରରେ ସମସ୍ତ ଓ୍ବିକେଟ ହରାଇ ୧୧୯ ରନ୍ କରିଛି ଏବଂ ପାକିସ୍ତାନକୁ ୧୨୦ ରନ୍ର ବିଜୟ ଲକ୍ଷ୍ୟ ଦେଇଥିଲା। ସେପଟେ ପାକିସ୍ତାନ ପକ୍ଷରୁ ନସିମ୍ ଶାହା ଓ ହରିଶ ରାଉଫ୍ ୩ଟି ଲେଖାଏଁ ଓ୍ବିକେଟ ନେଇଥିବା ବେଳେ ଅମିର ଦୁଇଟି ଓ ହସିନ୍ ଆଫ୍ରିଦୀ ଗୋଟିଏ ଓ୍ବିକେଟ ନେଇଥିଲେ।
