ଅହମ୍ମଦାବାଦ,୧୨ /୦୨: ଚାମ୍ପିଅନ୍ସ ଟ୍ରଫି ପୂର୍ବରୁ ଶେଷ ଲଢେଇ ଲଢିବ ଟିମ୍ ଇଣ୍ଡିଆ । ଘରୋଇ ଭାରତ ଓ ଇଂଲଣ୍ଡ ମଧ୍ୟରେ ଆଜି (ବୁଧବାର) ଖେଳାଯିବ ତୃତୀୟ ଦିନିକିଆ । ପ୍ରଥମ ୨ଟି ମ୍ୟାଚ୍ ଜିତି ଆଗୁଆ ସିରିଜ କବ୍ଜା କରିସାରିଥିବା ଭାରତ ଏଥର କ୍ଲିନ୍ ସୁଇପ୍ ପାଇଁ ପ୍ରସ୍ତୁତ ରହିଛି । ଇଂଲଣ୍ଡ ମଧ୍ୟ ବିଜୟ ସହ ଆଗାମୀ ଚାମ୍ପିଅନ୍ସ ଟ୍ରଫି ପାଇଁ ମନୋବଳ ବଢ଼ାଇବାକୁ ଆଶା ରଖିଛି । ଭାରତ ସିରିଜ କ୍ଲିନ ସୁଇପ ଲକ୍ଷ୍ୟରେ ଥିବାବେଳେ ଇଂଲଣ୍ଡ ସମ୍ମାନ ପାଇଁ ମଇଦାନକୁ ଓହ୍ଲାଇବ । ଗତ ୨୦୨୩ ଦିନିକିଆ ବିଶ୍ୱକପ୍ ଫାଇନାଲ୍ ପରେ ଭାରତୀୟ ଦଳ ପ୍ରଥମ କରି ନରେନ୍ଦ୍ର ମୋଦି ଷ୍ଟାଡ଼ିୟମ୍ରେ ଏକ ଦିନିକିଆ ଖେଳିବାକୁ ଯାଉଛି ।
ଉକ୍ତ ଫାଇନାଲ ମ୍ୟାଚ୍କୁ ଭାରତୀୟ କ୍ରିକେଟ୍ ପ୍ରେମୀ ଭୁଲିବା କଷ୍ଟକର । ଆଜି ରୋହିତ ଶର୍ମା ଓ ସାଥୀ ଗ୍ରାଉଣ୍ଡରେ ପ୍ରବେଶ କରିବା ମାତ୍ରେ ଫାଇନାଲ୍ ମ୍ୟାଚ୍ର ଚିତ୍ର ସବୁ ଆଖି ଆଗରେ ଭାସି ଉଠିବ । ତଥାପି ସବୁ ଭାବନାକୁ ନିୟନ୍ତ୍ରଣରେ ରଖି ଭାରତୀୟ ଦଳ ଶ୍ରେଷ୍ଠ ପ୍ରଦର୍ଶନ କରିବାକୁ ପ୍ରୟାସ କରିବ । ଚାମ୍ପିଅନ୍ସ ଟ୍ରଫି ପୂର୍ବରୁ ସମସ୍ତ ତ୍ରୁଟି ସୁଧାରିବା ଆବଶ୍ୟକ ରହିଥିଲା । ପ୍ରଥମ ୨ଟି ମ୍ୟାଚ୍ ଜିତି ଭାରତ ପ୍ରାୟତଃ ସବୁ ଦୁର୍ବଳତା ଦୂର କରି ସାରିଛି । କେବଳ ସିନିୟର ଖେଳାଳିଙ୍କ ଫର୍ମକୁ ନେଇ ଦଳ ଚିନ୍ତିତ ରହିଛି ।
ଭାରତୀୟ ଦଳର ୩ ସିନିୟର ବ୍ୟାଟର ରୋହିତ ଶର୍ମା, ବିରାଟ କୋହଲି ଓ କେଏଲ ରାହୁଲଙ୍କ ଫର୍ମକୁ ନେଇ ଗତ କିଛିଦିନ ହେଲା ଜୋରଦାର ଚର୍ଚ୍ଚା ଚାଲିଥିଲା । ରୋହିତ ଅବସର ନିଅନ୍ତୁ ବୋଲି ଅନେକ ମତ ଦେଇଥିଲେ । ଏପରିକି ଚାମ୍ପିଅନ୍ସ ଟ୍ରଫି ପୂର୍ବରୁ ତାଙ୍କୁ ଦଳରୁ ବାଦ ଦେଇ ହାର୍ଦ୍ଦିକ ପାଣ୍ଡ୍ୟାଙ୍କୁ ଅଧିନାୟକ ଚୟନ କରାଯିବ ବୋଲି ସୋସିଆଲ ମିଡ଼ିଆରେ ଆଲୋଚନା ଜୋର ଧରିଥିଲା । ବାରବାଟୀ ଷ୍ଟାଡ଼ିୟମ୍ରେ ଅନୁଷ୍ଠିତ ଦ୍ୱିତୀୟ ଦିନିକିଆରେ ରୋହିତ ଶତକ ଅର୍ଜନ କରି ଫର୍ମକୁ ଫେରିବା ସହ ସବୁ ସମାଲୋଚକଙ୍କୁ ଚୁପ୍ କରିସାରିଛନ୍ତି । ଏବେ କୋହଲି ଓ ରାହୁଲଙ୍କ ଉପରେ ନଜର ।
କୋହଲି ଚାମ୍ପିଅନ୍ସ ଟ୍ରଫି ପୂର୍ବରୁ ଫର୍ମକୁ ଫେରିବା ଜରୁରୀ । ରୋହିତ ଆଉ ୧୩ ରନ୍ କଲେ ଦିନିକିଆ ଫର୍ମାଟ୍ରେ ୧୧,୦୦୦ ରନ୍ ପୂରଣ କରିବେ । ସେହିପରି କୋହଲି ୮୯ ରନ କଲେ ତୃତୀୟ ବ୍ୟାଟର ଭାବେ ୧୪,୦୦୦ ଦିନିକିଆ ରନ୍ କ୍ଲବ୍ରେ ସାମିଲ ହେବେ । ରାହୁଲଙ୍କୁ ବିଶ୍ରାମ ମିଳିପାରେ । ଦଳରେ ଦ୍ୱିତୀୟ ୱିକେଟ୍ କିପର ଭାବେ ରିଷଭ ପନ୍ତ ରହିଛନ୍ତି । ରାହୁଲ ପ୍ରଥମ ୨ଟି ମ୍ୟାଚ୍ରେ ବିଫଳ ହେବା ପରେ ପନ୍ତଙ୍କୁ ଏକ ସୁଯୋଗ ଦେବାର ଆବଶ୍ୟକତା ରହିଥିବା ଟିମ ମ୍ୟାନେଜମେଣ୍ଟ ଅନୁଭବ କରୁଛି । ଇଂଲଣ୍ଡ ମଧ୍ୟ ତାର ଏକାଦଶରେ ପରିବର୍ତ୍ତନ କରିବ । ଆହତ ହୋଇଥିବା ଜାକବ ବେଥେଲଙ୍କ ସ୍ଥାନରେ ଟମ ବାଣ୍ଟନ ଏକାଦଶରେ ସ୍ଥାନ ପାଇପାରନ୍ତି । ସେହିପରି ଦ୍ୱିତୀୟ ଦିନିକିଆ ଖେଳିନଥିବା ଜୋଫ୍ରା ଆର୍ଚରଙ୍କୁ ଏକାଦଶକୁ ଡ଼ାକରା ମିଳିପାରେ ।
ଅର୍ଶଦୀପଙ୍କୁ ସୁଯୋଗ: ବାମ ହାତୀ ପେସ୍ ବୋଲର ଅର୍ଶଦୀପ ସିଂହଙ୍କୁ ଏକାଦଶରେ ସ୍ଥାନ ମିଳିବା ଆଶା କରାଯାଉଛି । ଚାମ୍ପିଅନ୍ସ ଟ୍ରଫି ପୂର୍ବରୁ ତାଙ୍କୁ ମ୍ୟାଚ୍ ଅଭ୍ୟାସର ସୁଯୋଗ ଦେବା ଆବଶ୍ୟକ । ସେ ଚମତ୍କାର ଫର୍ମରେ ରହିଛନ୍ତି । ହେଲେ ଦିନିକିଆରେ ତାଙ୍କ ନିକଟରେ ଯଥେଷ୍ଟ ଅଭିଜ୍ଞତା ନାହିଁ । ମହମ୍ମଦ ସାମି କିମ୍ବା ହର୍ଷିତ ରାଣାଙ୍କ ମଧ୍ୟରୁ ଜଣଙ୍କୁ ବିଶ୍ରାମ ଦେଇ ଅର୍ଶଦୀପଙ୍କୁ ଖେଳାଯାଇପାରେ ।
ଟସ୍ ଜିତିଲେ ଫିଲ୍ଡିଂ: ଅହମ୍ମଦାବାଦ ପିଚ୍ ବ୍ୟାଟିଂ ପାଇଁ ଅନୁକୂଳ ରହିବ । ମାତ୍ର ପ୍ରଥମ ଭାଗ ତୁଳନାରେ ଦ୍ୱିତୀୟ ଭାଗରେ ବ୍ୟାଟିଂ ସହଜ ହେବ । ଦିନରେ ପ୍ରବଳ ଗରମ ଅନୁଭୂତ ହେବ । ଦ୍ୱିତୀୟ ଭାଗରେ କାକର ପଡ଼ିବ । ତେଣୁ ଟସ ବିଜୟୀ ଦଳ ଫିଲ୍ଡିଂ ନିଷ୍ପତ୍ତି ନେବା ଏକ ପ୍ରକାର ନିଶ୍ଚିତ ।
ଭାରତ ସମ୍ଭାବ୍ୟ ଦଳ : ରୋହିତ ଶର୍ମା (ଅଧିନାୟକ), ଶୁଭମନ ଗିଲ୍ (ଉପ ଅଧିନାୟକ), ବିରାଟ କୋହଲି, ଶ୍ରେୟାସ ଆୟର, କେଏଲ୍ ରାହୁଲ/ରିଷଭ ପନ୍ତ, ହାର୍ଦ୍ଦିକ ପାଣ୍ଡ୍ୟା, ରବିନ୍ଦ୍ର ଜାଡ଼େଜା, ଅକ୍ଷର ପଟେଲ, କୁଲଦୀପ ଯାଦବ/ବରୁଣ ଚକ୍ରବର୍ତ୍ତୀ, ହର୍ଷିତ ରାଣା, ମହମ୍ମଦ ସାମି/ଅର୍ଶଦୀପ ସିଂହ ।
ଇଂଲଣ୍ଡ ସମ୍ଭାବ୍ୟ ଦଳ: ବେନ ଡକେଟ୍, ଫିଲ ସଲ୍ଟ, ଟମ ବାଣ୍ଟନ, ଜୋ ରୁଟ୍, ହ୍ୟାରୀ ବ୍ରୁକ୍, ଜୋସ ବଟଲର (ଅଧିନାୟକ), ଲାଏମ ଲିଭିଙ୍ଗଷ୍ଟୋନ, ବ୍ରାଇଡନ କାର୍ସ, ଜୋଫ୍ରା ଆର୍ଚର/ସାକିବ ମହମ୍ମଦ, ଆଦିଲ ରସିଦ, ମାର୍କ ଉଡ ।
