ନୂଆଦିଲ୍ଲୀ,୦୮/୧୨: ଅଷ୍ଟ୍ରେଲିଆ ବିପକ୍ଷ ଆଡିଲେଡ ଟେଷ୍ଟରେ ପରାସ୍ତ ହୋଇଛି ଭାରତ । ୧୦ୱିକେଟରେ ବିଜୟ ହାସଲ କରିଛି ଅଷ୍ଟ୍ରେଲିଆ । ପର୍ଥରେ ୨୯୫ରନର ବିରାଟ ବିଜୟ ହାସଲ ପରେ ଆଡିଲେଡରେ କାହିଁକି ହାରିଲା ଭାରତ । ପିଙ୍କ ବଲରେ ଟିମ୍ ଇଣ୍ଡିଆ ଭଲ ପ୍ରଦର୍ଶନ କରିବାକୁ ଆଶା ରଖିଥିଲେ ଫ୍ୟାନ୍ସ । ମାତ୍ର ରୋହିତବାହିନୀ ଆଡିଲେଡରେ ବିଜୟ କାହାଣୀ ଲେଖିପାରିଲେ ନାହିଁ । କେଉଁଠି ରହିଲା ଭୁଲ କାହିଁକି ଫେଲ ମାରିଲା ରୋହିତବାହିନୀ । ଆଡିଲେଡରେ ଭାରତର ପରାଜୟ ପଛର ୫ କାରଣ ଜାଣନ୍ତୁ ଏହି ରିପୋର୍ଟରେ ।
୧. ଦ୍ବିତୀୟ ଟେଷ୍ଟରେ ଖେଳିଲେ ମାତ୍ର ୮୧ ଓଭର-ଆଡିଲେଡ ଟେଷ୍ଟରେ ଭାରତୀୟ ଦଳ ଦୁଇଟି ଇନିଂସରେ ମାତ୍ର ୮୧ ଓଭର ଖେଳିଛି । ପ୍ରଥମ ଇନିଂସରେ ୧୮୦ ଓ ଦ୍ବିତୀୟ ଇନିଂସରେ ୧୭୫ରନ କରିଛି । ଯଦି ପ୍ରଥମ ପାଳିରେ ୩୦୦ରନ କରିଥାନ୍ତା ତେବେ ଫାଇଦା ମିଳିଥାନ୍ତା । ମାତ୍ର ଦୁଇଟି ଯାକ ପାଳିରେ ମୋଟ ୩୫୫ରନ କରିଥିଲା ଭାରତ ।
୨. ବିଫଳ ହେଲେ ହିଟମ୍ୟାନ- ପର୍ଥ ଟେଷ୍ଟ ଖେଳି ନଥିଲେ ଅଧିନାୟକ ରୋହିତ ଶର୍ମା । ମାତ୍ର ଆଡିଲେଡ ଟେଷ୍ଟ ଖେଳିଥିଲେ । ହିଟମ୍ୟାନଙ୍କ ବ୍ୟାଟରୁ ବଡ ଇନିଂସ ଆଶା କରାଯାଉଥିଲା । ମାତ୍ର ସେ ବିଫଳ ହୋଇଥିଲେ । ଦୁଇଟି ଇନିଂସରେ ସେ ମାତ୍ର ୯ରନ କରିଥିଲେ ।
୩. ଅଶ୍ବିନୀଙ୍କୁ ସଠିକ ସୁଯୋଗ ନମିଳିବା- ଦ୍ବିତୀୟ ଟେଷ୍ଟରେ ୱାଶିଂଟନ ସୁନ୍ଦରଙ୍କ ସ୍ଥାନରେ ଅଭିଜ୍ଞ ଅଶ୍ବିନୀଙ୍କୁ ସୁଯୋଗ ମିଳିଥିଲା । ତାଙ୍କ ପ୍ରଦର୍ଶନ ଭଲ ନଥିଲା । ଏହାସହିତ ମ୍ୟାଚରେ ସଠିକ ସମୟରେ ଅଶ୍ବିନୀଙ୍କ ବ୍ୟବହାର ମଧ୍ୟ ହୋଇନଥିଲା । ପ୍ରଥମ ଇନିଂସରେ ସେ ବହୁ ବିଳମ୍ବରେ ବୋଲିଂ କରିଥିଲେ । ୧୮ ଓଭର ବୋଲି କରି ୫୩ରନ ଦେଇ ମାତ୍ର ଗୋଟିଏ ୱିକେଟ ନେଇଛନ୍ତି ।
୪. ପର୍ଥର ଶତକବୀରଙ୍କ ବିଫଳତା- ବର୍ଡର-ଗାଭାସ୍କର ଟ୍ରଫିର ପ୍ରଥମ ଟେଷ୍ଟ ପର୍ଥରେ ଖେଳାଯାଇଥିଲା । ଭାରତ ବିରାଟ ବିଜୟ ହାସଲ କରିଥିଲା । ଏଥିରେ ବିରାଟ କୋହଲି ଓ ୟଶସ୍ବୀ ଜୈସ୍ବାଲ ଶତକ ହାସଲ କରିଥିଲେ । ମାତ୍ର ଆଡିଲେଡରେ ଏହି ଷ୍ଟାର ବ୍ୟାଟର ବିଫଳ ହୋଇଥିଲେ । ଉଭୟ ଯଥାକ୍ରମେ ୧୮ ଓ ୨୪ ରନ କରିଥିଲେ ।
୫. ସର୍ଟ ପିଚ ବଲର ପ୍ରୟୋଗ ନହେବା- ଅଷ୍ଟ୍ରେଲିଆର ୩ ଦ୍ରୁତ ବୋଲର ମିଚେଲ ଷ୍ଟାର୍କ, ପାଟ କମିନ୍ସ, ଓ ଷ୍ଟାକ ବୋଲାଣ୍ଡ ଏହି ମ୍ୟାଚରେ ସର୍ଟ ପିଚ ବଲରେ ଉପଯୋଗ କରିଥିଲେ । ଫଳରେ ସେମାନ ସଫଳ ହୋଇଥିଲେ । ମାତ୍ର ଭାରତୀୟ ବୋଲର ଫିକା ପଡିଥିଲେ । ଟ୍ରାଭିସ ହେଡଙ୍କୁ ସର୍ଟ ପିଚ ବଲ ବଳରେ ପରୀକ୍ଷା କରାଯାଇପାରିଥାନ୍ତା ମାତ୍ର ହେଡଙ୍କୁ ଭାରତୀୟ ଦଳ ଜୀବନଦାନ ଦେଇଥିଲା । ଯାହାର ଫାଇଦା ଉଠାଇ ସେ ୧୪୦ରନର ପାଳି ଖେଳିଥିଲେ ।
