ନୂଆଦିଲ୍ଲୀ,୦୫/୦୯: ଆସନ୍ତା ଲୋକସଭା ନିର୍ବାଚନ ପାଇଁ ଏକାଠି ହୋଇଛନ୍ତି ବିରୋଧୀ । ମୋଦି ସରକାର ବିରୋଧୀ ରଣନୀତି ପାଇଁ ଗଢ଼ିଛନ୍ତି ‘ଇଣ୍ଡିଆ’(ଇଣ୍ଡିଆନ୍ ନ୍ୟାସନାଲ ଡେଭେଲପମେଣ୍ଟାଲ ଇନ୍କ୍ଲୁସିଭ୍ ଆଲାଏନ୍ସ) ମେଣ୍ଟ । ଏଥିରେ କଂଗ୍ରେସ, ଆମ୍ ଆଦମୀ ପାର୍ଟି(ଆପ୍) ସମେତ ଅନ୍ୟ ବିରୋଧୀ ଦଳ ହାତ ମିଳାଇଛନ୍ତି । ହେଲେ ମଜାଦାର କଥା ହେଉଛି ଇଣ୍ଡିଆ ମେଣ୍ଟରେ ଆପ୍ ଓ କଂଗ୍ରେସ ଏକମତ ହୋଇଥିଲେ ହେଁ ଆଗକୁ ଏକାଧିକ ରାଜ୍ୟରେ ହେବାକୁ ଥିବା ନିର୍ବାଚନରେ କିନ୍ତୁ ପରସ୍ପରର ପ୍ରତିଦ୍ୱନ୍ଦ୍ୱୀ ହୋଇଛନ୍ତି । ନିର୍ବାଚନମଣ୍ଡଳୀଗୁଡ଼ିକରେ ପରସ୍ପର ବିରୋଧରେ ପ୍ରାର୍ଥୀ ଦେବା ସହ ପରସ୍ପରର ଗଡ଼ ଅକ୍ତିଆର କରିବାକୁ ଯୋଜନା କରୁଛନ୍ତି ।
ଆପ୍ ଆବାହକ ତଥା ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ବହୁ ପୁରାତନ ଦଳ କଂଗ୍ରେସକୁ ଘନ ଘନ ଆକ୍ରମଣ କରିବା ସହ ଛତିଶଗଡ଼ ଏବଂ ରାଜସ୍ଥାନରେ ଗ୍ୟାରେଣ୍ଟି କାର୍ଡ ଲଞ୍ଚ୍ କରିଛି । ଏହି ଦୁଇଟି ଯାକ ରାଜ୍ୟରେ କଂଗ୍ରେସ ସରକାରରେ ରହିଛି । ସେଠାକାର ଜନତାଙ୍କୁ କେଜରିୱାଲ ଏକ ସୁଯୋଗ ଦେଇ କଂଗ୍ରେସକୁ ହଟାଇବାକୁ ବାରମ୍ବାର ଆହ୍ୱାନ ଦେଉଛନ୍ତି । ଅନ୍ୟପକ୍ଷରେ ଦିଲ୍ଲୀରେ ଆପ୍ ନିର୍ବାଚିତ ହୋଇ ସରକାରରେ ଥିବାବେଳେ ସେଠାରେ ସମସ୍ତ ୭ ଲୋକସଭା ନିର୍ବାଚନମଣ୍ଡଳୀରେ କଂଗ୍ରେସ ନୂଆ ସଂଯୋଜକ ନିଯୁକ୍ତ କରିଛି । ରାଜସ୍ଥାନରେ କେଜରିୱାଲ ସୋମବାର ୬ ଗ୍ୟାରେଣ୍ଟି ଘୋଷଣା କରି ରାଜ୍ୟବାସୀଙ୍କୁ ନିଜ ଆଡ଼କୁ ଆକର୍ଷିତ କରିବାକୁ ଉଦ୍ୟମ କରିଛନ୍ତି ।
ଆପ୍ ସରକାରକୁ ଆସିଲେ ସେନା, ପୁଲିସରେ କାର୍ଯ୍ୟରତ କର୍ମଚାରୀଙ୍କ ମୃତ୍ୟୁ ହେଲେ ସେମାନଙ୍କ ପରିବାରକୁ ୧ କୋଟି ଟଙ୍କା ସମ୍ମାନଜନକ ରାଶି, ଠିକାରେ କାର୍ଯ୍ୟରତ କର୍ମଚାରୀଙ୍କୁ ସ୍ଥାୟୀ ଚାକିରି, ମାଗଣା ସ୍କୁଲ ଶିକ୍ଷା ଏବଂ ଚିକିତ୍ସା ସେବା, ୧୮ ବର୍ଷରୁ ଊଦ୍ଧ୍ୱର୍ ମହିଳାଙ୍କୁ ପ୍ରତି ମାସରେ ୧ ହଜାର ଟଙ୍କା, ରାଜସ୍ଥାନକୁ ଦୁର୍ନୀତି ମୁକ୍ତ କରିବା ଏବଂ ୩୦୦ ୟୁନିଟ୍ ପର୍ଯ୍ୟନ୍ତ ମାଗଣା ବିଜୁଳି ଯୋଗାଇବା ପାଇଁ କେଜ୍ରିୱାଲ ଗ୍ୟାରେଣ୍ଟି ଦେଇଛନ୍ତି । ପୂର୍ବରୁ ଛତିଶଗଡ଼ରେ ମଧ୍ୟ କେଜ୍ରିୱାଲ ୩୦୦ ୟୁନିଟ୍ ମାଗଣା ବିଜୁଳି ସମେତ ୯ ଗ୍ୟାରେଣ୍ଟି ଦେଇଥିଲେ । ଏଥିସହ ଛତିଶଗଡ଼ରେ ସରକାରୀ ସ୍କୁଲକୁ ନେଇ କ୍ଷମତାରେ ଥିବା କଂଗ୍ରେସ ସରକାରକୁ ସମାଲୋଚନା କରିଥିଲେ ।
ଅପରପକ୍ଷେ କଂଗ୍ରେସ ମଧ୍ୟ ଦିଲ୍ଲୀରେ ନିଜ ଉପସ୍ଥିତି ବଢ଼ାଇବା ପାଇଁ ବ୍ଲୁପ୍ରିଣ୍ଟ ପ୍ରସ୍ତୁତ କରିଛି । ଦିଲ୍ଲୀ କଂଗ୍ରେସର ନବନିଯୁକ୍ତ ସଭାପତି ଅରବିନ୍ଦର ସିଂ ଲଭ୍ଲି କହିଛନ୍ତି, ୨/୩ ମାସରେ ସଙ୍ଗଠନକୁ ସମ୍ପୂର୍ଣ୍ଣ ଭାବେ ପୁନର୍ଗଠନ କରିବା ଆମର ଲକ୍ଷ୍ୟ । ଗତମାସରେ କଂଗ୍ରେସର ଜଣେ ମୁଖପାତ୍ର ଦିଲ୍ଲୀର ସମସ୍ତ ୭ ଲୋକସଭା ଆସନରେ ଦଳ ଲଢ଼ିବା ପାଇଁ ପ୍ରସ୍ତୁତି କରୁଥିବା ନେଇ କହିବା ପରେ ଆପ୍ ପକ୍ଷରୁ ତୀବ୍ର ପ୍ରତିକ୍ରିୟା ପ୍ରକାଶ ପାଇଥିଲା ।
ଏପରିକି ମୁମ୍ବାଇରେ ଇଣ୍ଡିଆ ମେଣ୍ଟର ତୃତୀୟ ବୈଠକ ବର୍ଜନ କରିବାକୁ ମଧ୍ୟ ଆପ୍ ପକ୍ଷରୁ ଧମକ ଦିଆଯାଇଥିଲା । ପରେ କଂଗ୍ରେସକୁ ଏଥିପାଇଁ ସ୍ପଷ୍ଟୀକରଣ ଦେବାକୁ ପଡ଼ିଥିଲା । ଏହା ତାଙ୍କ ବ୍ୟକ୍ତିଗତ ମତ ବୋଲି କଂଗ୍ରେସ କହି ଆପ୍କୁ ମନାଇଥିଲା । ଦିଲ୍ଲୀର ଲୋକସଭା ଆସନରେ କଂଗ୍ରେସ ଲଢ଼ିବ ବୋଲି ଘୋଷଣା କରିବା ପରେ ଆପ୍ ରାଜସ୍ଥାନର ସମସ୍ତ ୨୦୦ ବିଧାନସଭା ଆସନରେ ପ୍ରାର୍ଥୀ ଦେଇ କଂଗ୍ରେସର କଡ଼ା ମୁକାବିଲା କରିବା ଲାଗି ପ୍ରସ୍ତୁତ ଥିବା କହିଥିଲା । ବିଭିନ୍ନ ରାଜ୍ୟରେ ଇଣ୍ଡିଆ ମେଣ୍ଟର ରଣନୀତି ସ୍ପଷ୍ଟ ନ ହେବା ପର୍ଯ୍ୟନ୍ତ କଂଗ୍ରେସ ଓ ଆପ୍ ମଧ୍ୟରେ ପ୍ରେସର୍ ଗେମ୍ ଖେଳିବା ଜାରି ରଖିବେ ବୋଲି ରାଜନୈତିକ ବିଶେଷଜ୍ଞଙ୍କ ମତ ।
