ନୂଆଦିଲ୍ଲୀ,୧୨/୦୨: ତୃତୀୟ ଦିନିକିଆ ମ୍ୟାଚ୍ରେ ଭାରତ ଇଂଲଣ୍ଡ ଆଗରେ ରଖିଛି ୩୫୭ ରନ୍ର ବିଜୟ ଲକ୍ଷ୍ୟ। ପ୍ରଥମେ ବ୍ୟାଟିଂ କରି ଭାରତୀୟ ଦଳ ୫୦ ଓଭରରେ ୩୫୬ ରନ କରିଛି। ଏହିପରି ଭାବରେ, କ୍ଲିନ୍ ସୁଇପ୍ରୁ ବର୍ତ୍ତିବା ପାଇଁ ଇଂଲଣ୍ଡ ଟିମ୍କୁ ୩୫୭ ରନ୍ କରିବାକୁ ପଡିବ। ପ୍ରଥମ ଇନିଂସରେ ଭାରତ ପକ୍ଷରୁ ଶୁଭମନ ଗିଲ ଏକ ଚମତ୍କାର ଶତକୀୟ ପାଳି ଖେଳିଥିଲେ। ଶୁଭମନ ଗିଲ ୧୦୨ ବଲ୍ ରେ ୧୧୨ ରନ୍ କରିଥିଲେ। ସେ ତାଙ୍କ ଇନିଂସରେ ୧୪ଟି ଚୌକା ଏବଂ ୩ଟି ଛକା ମାରିଥିଲେ। ଏହା ବ୍ୟତୀତ ଶ୍ରେୟସ ଆୟର ୬୪ ବଲ୍ରେ ୭୮ ରନ୍ର ଅର୍ଦ୍ଧଶତକୀୟ ପାଳି ଖେଳିଥିଲେ। ସେ ତାଙ୍କ ଇନିଂସରେ ୮ଟି ଚୌକା ଏବଂ ୨ଟି ଛକା ମାରିଥିଲେ। ଅନ୍ୟମାନଙ୍କ ମଧ୍ୟରେ ବିରାଟ କୋହଲି ୫୫ ବଲ୍ରେ ୫୨ ରନ୍ର ଏକ ଅର୍ଦ୍ଧଶତକୀୟ ଇନିଂସ ଖେଳିଥିଲେ।
ଇଂଲଣ୍ଡ ପକ୍ଷରୁ ଲେଗ୍ ସ୍ପିନର ଆଦିଲ ରସିଦ ସବୁଠାରୁ ସଫଳ ବୋଲିଂ କରିଥିଲେ। ଆଦିଲ ରସିଦ ୧୦ ଓଭରରେ ୬୪ ରନ ଦେଇ ୪ଟି ୱିକେଟ ନେଇଥିଲେ। ଏହା ବ୍ୟତୀତ ମାର୍କ ଉଡ୍ ୨ଟି ୱିକେଟ୍ ନେଇଥିଲେ। ଅନ୍ୟମାନଙ୍କ ମଧ୍ୟରେ ସାକିବ ମହମୁଦ, ଗସ୍ ଆଟକିନସନ ଏବଂ ଜୋ ରୁଟଙ୍କୁ ଗୋଟିଏ ଲେଖାଏଁ ସଫଳତା ମିଳିଥିଲା।
ଭାରତର ବ୍ୟାଟିଂ:
ପ୍ରଥମେ ଇଂଲଣ୍ଡ ଅଧିନାୟକ ଜୋସ୍ ବଟଲର୍ ଟସ୍ ଜିତି ବୋଲିଂ କରିବାକୁ ନିଷ୍ପତ୍ତି ନେଇଥିଲେ। ପ୍ରଥମେ ବ୍ୟାଟିଂ କରିବାକୁ ଆସିଥିବା ଭାରତୀୟ ଦଳର ଆରମ୍ଭ ଭଲ ନଥିଲା। ଭାରତୀୟ ଦଳର ଅଧିନାୟକ ରୋହିତ ଶର୍ମା ୨ ବଲ୍ରେ ୧ ରନ୍ କରି ପାଭିଲିୟନ ଫେରିଥିଲେ। ତଥାପି, ଏହା ପରେ ଶୁଭମନ ଗିଲ ଏବଂ ବିରାଟ କୋହଲିଙ୍କ ମଧ୍ୟରେ ଏକ ଭଲ ଭାଗୀଦାରି ହୋଇଥିଲା। ଉଭୟ ଖେଳାଳି ଦ୍ୱିତୀୟ ୱିକେଟ ସୁଦ୍ଧା ୧୦୭ ବଲ୍ ରେ ୧୧୬ ରନ୍ ଯୋଡ଼ିଥିଲେ। ଶୁଭମନ ଗିଲ ଏବଂ ଶ୍ରେୟସ ଆୟରଙ୍କ ମଧ୍ୟରେ ୯୩ ବଲ୍ରେ ୧୦୪ ରନ୍ର ପାର୍ଟନରସିପ୍ ହୋଇଥିଲା। କେଏଲ ରାହୁଲ ୨୯ ବଲ୍ରେ ୪୦ ରନ୍ କରିଥିଲେ। ସେପଟେ ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟା ୯ ବଲ୍ରେ ୧୭ ରନ୍ କରିଥିଲେ।
