କଟକ,୦୬/୦୯: କେତେ ବିଚାରାଧୀନ କଏଦୀ କଏଦୀ ଜେଲ୍ରେ ରହୁଛନ୍ତି, କେତେ କଏଦୀ ଜାମିନ୍ ପାଇବା ସତ୍ତେ୍ୱ ଆବଶ୍ୟକ ଅର୍ଥ ଜମା କରିନପାରିବାରୁ ଜେଲ୍ରୁ ମୁକୁଳିପାରୁ ନାହାନ୍ତି ସେ ସଂପର୍କରେ ସ୍ୱତନ୍ତ୍ର ପୋର୍ଟାଲ୍ରେ ରହିବ ତଥ୍ୟ । କେବଳ ସେତିକି ନୁହେଁ, ଜଣେ କଏଦୀଙ୍କର ଯଦି କୌଣସି ସମସ୍ୟା ରହିଥାଏ ତାହେଲେ ଏହି ପୋର୍ଟାଲ ଜରିଆରେ ମଧ୍ୟ ସେ ଅଭିଯୋଗ କରିପାରିବେ । ଜେଲ୍ ସଂସ୍କାର ମାମଲାରେ ଆଜି ହାଇକୋର୍ଟ କଏଦୀଙ୍କ ପାଇଁ ଏଇଭଳି ଏକ ସ୍ୱତନ୍ତ୍ର ପୋର୍ଟାଲ୍ ଖୋଲିବା ଲାଗି ରାଜ୍ୟ ସରକାରଙ୍କୁ ନିର୍ଦ୍ଦେଶ ଦେଇଛନ୍ତି । ଏଥିସହ ଜେଲ୍ ସଂସ୍କାର ପାଇଁ ଆମିକସ୍କ୍ୟୁରୀଙ୍କ ପକ୍ଷରୁ ଯେଉଁ ସବୁ ପ୍ରସ୍ତାବ ଦିଆଯାଇଛି ସେସବୁ କିପରି କାର୍ଯ୍ୟକାରୀ ତାହା ଉପରେ ପରବର୍ତ୍ତୀ ଶୁଣାଣି ସୁଦ୍ଧା ଜବାବ ରଖିବାକୁ ହାଇକୋର୍ଟ ସରକାରଙ୍କୁ କହିଛନ୍ତି ।
କୃଷ୍ଣ ପ୍ରସାଦ ସାହୁଙ୍କ ପକ୍ଷରୁ ଆଗତ ମାମଲାର ଶୁଣାଣି କରି ହାଇକୋର୍ଟର ମୁଖ୍ୟ ବିଚାରପତି ଜଷ୍ଟିସ୍ ଚକ୍ରଧାରୀ ଶରଣ ସିଂ ଏବଂ ଜଷ୍ଟିସ୍ ସାବିତ୍ରୀ ରଥଙ୍କୁ ନେଇ ଗଠିତ ଖଣ୍ଡପୀଠ ଏହି ନିର୍ଦ୍ଦେଶ ଦେଇଛନ୍ତି । ମାମଲାର ପରବର୍ତ୍ତୀ ଶୁଣାଣି ଆସନ୍ତା ୨୬ତାରିଖକୁ ଧାର୍ଯ୍ୟ ହୋଇଛି । ବିଭିନ୍ନ ଜିଲ୍ଲା ଆଇନସେବା ପ୍ରାଧିକରଣର ସଦସ୍ୟମାନେ ବିଭିନ୍ନ ଜେଲ୍ ପରିଦର୍ଶନ କରି ସେଠାରେ ଥିବା ସମସ୍ୟା ସଂକ୍ରାନ୍ତରେ ବିସ୍ତୃତ ରିପୋର୍ଟ ଅଦାଲତରେ ଦାଖଲ କରିଥିଲେ । ଉକ୍ତ ରିପୋର୍ଟକୁ ଆଧାର କରି ଆମିକସ୍କ୍ୟୁରୀ ତଥା ବରିଷ୍ଠ ଆଇନଜୀବୀ ଗୌତମ ମିଶ୍ର କେତେକ ପ୍ରସ୍ତାବ ଓ ପରାମର୍ଶ ଦେଇଛନ୍ତି ।
ବିଚାରାଧୀନ କଏଦୀଙ୍କୁ ସ୍ୱତନ୍ତ୍ର ପ୍ରକୋଷ୍ଠରେ ରଖିବା, ୨୧ବର୍ଷରୁ କମ୍ ବୟସର କଏଦୀଙ୍କୁ ପୃଥକ ପ୍ରକୋଷ୍ଠରେ ରଖିବା ପାଇଁ ପ୍ରସ୍ତାବ ଦିଆଯାଇଥିଲା । ଆଚରଣରେ ସୁଧାର ଆସିଥିବା ଓ ସମାଜର ମୁଖ୍ୟସ୍ରୋତରେ ସାମିଲ ହେବା ପାଇଁ ଆଗ୍ରହୀ କଏଦୀଙ୍କ ପାଇଁ ବିଜୁ ପଟ୍ଟନାୟକ ମୁକ୍ତାକାଶ ଜେଲ୍ ତିଆରି ହୋଇଛି । ଏହିଭଳି ଜେଲ୍ ପ୍ରତ୍ୟେକ ଜିଲ୍ଲାରେ ଗଠନ ପାଇଁ ପ୍ରସ୍ତାବ ଦିଆଯାଇଛି । ଏହିସବୁ ପ୍ରସ୍ତାବକୁ ରାଜ୍ୟ ସରକାର କିପରି କାର୍ଯ୍ୟକାରୀ କରିବେ ସେ ସଂକ୍ରାନ୍ତରେ ପରବର୍ତ୍ତୀ ଶୁଣାଣି ସୁଦ୍ଧା ଅଦାଲତଙ୍କୁ ଅବଗତ କରିବାକୁ ହାଇକୋର୍ଟ ଆଜି ନିର୍ଦ୍ଦେଶ ଦେଇଛନ୍ତି ।