ମୁମ୍ବାଇ,୨୫/୦୩: ଆଗାମୀ ମହିଳା ଦିନିକିଆ ବିଶ୍ୱକପ୍ ପାଇଁ ଭେନ୍ୟୁ ଚୂଡ଼ାନ୍ତ କରାଯାଇଛି । ଭାରତ ଏଥର ଦିନିକିଆ ବିଶ୍ୱକପ୍ ଆୟୋଜନ କରିବ । ସେପ୍ଟେମ୍ବର ଶେଷ ସପ୍ତାହରେ ଟୁର୍ଣ୍ଣାମେଣ୍ଟ ଆରମ୍ଭ ହୋଇ ନଭେମ୍ବର ପ୍ରଥମ ସପ୍ତାହରେ ଶେଷ ହେବ । ମହିଳା ଦିନିକିଆ ବିଶ୍ୱକପ୍ରେ ମୋଟ୍ ୮ଟି ଦଳ ଭାଗ ନେବେ । ସମ୍ପୂର୍ଣ୍ଣ ଟୁର୍ଣ୍ଣାମେଣ୍ଟ ପାଇଁ ୫ଟି ଭେନ୍ୟୁ ଚୂଡ଼ାନ୍ତ କରାଯାଇଛି । ଇନ୍ଦୋର, ବିଶାଖାପଟ୍ଟନମ, ଥିରୁଅନନ୍ତପୁରମ, ଗୌହାଟୀ ଓ ମୁଲନପୁରରେ ସମସ୍ତ ମ୍ୟାଚ୍ ଖେଳାଯିବ । ପାକିସ୍ତାନ ବିଶ୍ୱକପ୍କୁ ଯୋଗ୍ୟତା ଅର୍ଜନ କଲେ ଆଉ ଏକ ନୀରପେକ୍ଷ ଭେନ୍ୟୁ ଚୟନ କରାଯିବ ।
ବିସିସିଆଇ ଓ ପାକ୍ କ୍ରିକେଟ୍ ବୋର୍ଡ ମଧ୍ୟରେ ୨୦୨୪-୨୭ କ୍ରିକେଟ୍ ବର୍ଷ ପାଇଁ ଚୁକ୍ତି କରାଯାଇଛି । ଉଭୟ ଦେଶ ମଧ୍ୟରୁ କୌଣସି ଦେଶ ଆଇସିସି ଟୁର୍ଣ୍ଣାମେଣ୍ଟ ଆୟୋଜନ କଲେ ଅନ୍ୟ ଦେଶର ଦଳ ପାଇଁ ନୀରପେକ୍ଷ ଭେନ୍ୟୁ ପ୍ରସ୍ତୁତ କରିବ । ଗତ ଆଇସିସି ଚାମ୍ପିଅନ୍ସ ଟ୍ରଫି ଖେଳିବା ପାଇଁ ଭାରତୀୟ ଦଳ ପାକିସ୍ତାନ ଗସ୍ତ କରିବାକୁ ରାଜି ନହେବା ଫଳରେ ଉଭୟ ବୋର୍ଡ ମଧ୍ୟରେ ଏହି ଚୁକ୍ତି ସ୍ୱାକ୍ଷର କରାଯାଇଥିଲା।
