ନ୍ୟୁୟର୍କ,୦୯/୦୬: ରବିବାର ବିଶ୍ୱକପ୍ର ହାଇ ଭୋଲଟେଜ ମୁକାବିଲା । ଦୁଇ ପାରମ୍ପରିକ ପ୍ରତିଦ୍ୱନ୍ଦ୍ୱୀ ଭାରତ ଓ ପାକିସ୍ତାନ ପରସ୍ପରକୁ ଭେଟିବାକୁ ଯାଉଛନ୍ତି । ନାସାଉ କାଉଣ୍ଟି ଅନ୍ତର୍ଜାତୀୟ କ୍ରିକେଟ୍ ଗ୍ରାଉଣ୍ଡରେ ଏହି ମ୍ୟାଚ୍ ଖେଳାଯିବ । ଦର୍ଶକ ପ୍ରସ୍ତୁତ । ଭାରତ ଓ ପାକିସ୍ତାନ ସମେତ ବିଶ୍ୱର ଅନ୍ୟାନ୍ୟ ଅଞ୍ଚଳରୁ ମଧ୍ୟ କ୍ରିକେଟ୍ ପ୍ରେମୀମାନେ ଆସି ନ୍ୟୁୟର୍କରେ ଭିଡ଼ ଜମାଇଲେଣି ।
ରବିବାର ନୀଳ ଓ ସବୁଜ ଜର୍ସିରେ ଷ୍ଟାଡ଼ିୟମ୍ ପୂର୍ଣ୍ଣ ହୋଇଯିବ। ବିଶ୍ୱକପ୍ରେ ପାକିସ୍ତାନ ବିପକ୍ଷରେ ଭାରତର ରେକର୍ଡ ବେଶ୍ ଉନ୍ନତ ରହିଛି । ହେଲେ ବାବର ଆଜମଙ୍କ ନେତୃତ୍ୱାଧୀନ ପାକିସ୍ତାନ ଦଳ ନିକଟରେ ଜିତିବା ପାଇଁ ଯଥେଷ୍ଟ କ୍ଷମତା ରହିଛି । ୟୁଏସଏ ଠାରୁ ପରାଜିତ ହେବା ପରେ ପାକିସ୍ତାନ ପାଇଁ ବିଜୟ ଜରୁରି ହୋଇ ପଡ଼ିଛି । ତେଣୁ ପାକିସ୍ତାନ ବିଜୟ ପାଇଁ ସବୁ ଶକ୍ତି ଖଟାଇବ ।
୨୦୨୧ ଟି-ଟ୍ୱେଣ୍ଟି ବିଶ୍ୱକପ୍ ପରାଜୟ ପରେ ଭାରତ ୨୦୨୨ ଟି-ଟ୍ୱେଣ୍ଟି ବିଶ୍ୱକପ୍ ଓ ୨୦୨୩ ଦିନିକିଆ ବିଶ୍ୱକପରେ ପାକିସ୍ତାନକୁ ହରାଇ ସାରିଛି । ରୋହିତ ବାହିନୀ ବର୍ତ୍ତମାନ ଆଉ ଏକ ବିଜୟ ପାଇଁ ଅପେକ୍ଷା କରି ରହିଛି । ମୋଟ୍ ଉପରେ ଦେଖିବାକୁ ଗଲେ ପାକିସ୍ତାନର ପେସ ବାହିନୀ ଓ ଭାରତର ବ୍ୟାଟରଙ୍କ ମଧ୍ୟରେ କଡ଼ା ମୁକାବିଲା ହେବ ।
ପାକିସ୍ତାନ ୪ଜଣ ପେସ୍ ବୋଲରଙ୍କୁ ନେଇ ଖେଳୁଛି । ମହମ୍ମଦ ଅମୀର, ହ୍ୟାରିସ ରୌଫ, ସହିନ ଆଫ୍ରିଦି ଓ ନସୀମ ଶାହ ଯେକୌଣସି ବ୍ୟାଟିଂ ଗଡ଼କୁ ଧ୍ୱଂସ କରିବାର କ୍ଷମତା ରଖିଛନ୍ତି । ଭାରତ ମଧ୍ୟ ଏକ ଲମ୍ବା ବ୍ୟାଟିଂ ବିଭାଗ ସହ ଗ୍ରାଉଣ୍ଡକୁ ଓହ୍ଲାଇବ । ସମଗ୍ର ବିଶ୍ୱର ନଜର ବିରାଟ କୋହଲିଙ୍କ ଉପରେ ରହିବ । ୨୦୨୨ ବିଶ୍ୱକପ୍ରେ କୋହଲିଙ୍କ ଇନିଂସକୁ ଦର୍ଶକ ସହଜରେ ପାଶୋରି ପାରିବେ ନାହିଁ । ଆସନ୍ତାକାଲି ମଧ୍ୟ ତାଙ୍କ ବ୍ୟାଟରୁ ଦର୍ଶକ ସେଭଳି ଏକ ଇନିଂସ ଦେଖିବାକୁ ଆଶା ରଖିଛନ୍ତି ।
