ନୂଆଦିଲ୍ଲୀ: ବିଶ୍ୱ ଟେଷ୍ଟ ଚାମ୍ପିଅନସିପର ଏପର୍ଯ୍ୟନ୍ତ ତିନୋଟି ଫାଇନାଲ ଅନୁଷ୍ଠିତ ହୋଇଛି । ସମସ୍ତ ତିନୋଟି ଫାଇନାଲ ଇଂଲଣ୍ଡରେ ଖେଳାଯାଇଛି । ବର୍ତ୍ତମାନ WTCର ଚତୁର୍ଥ ପର୍ଯ୍ୟାୟ ଖେଳାଯାଉଛି । ଏହାର ଫାଇନାଲ୍ ୨୦୨୭ରେ ଅନୁଷ୍ଠିତ ହେବ । ଏହାରି ମଧ୍ୟରେ ICC ଘୋଷଣା କରିଛି ଯେ, ପରବର୍ତ୍ତୀ ତିନୋଟି ଡବ୍ଲୁଟିସି ଫାଇନାଲ୍ (୨୦୨୭, ୨୦୨୯ ଏବଂ୨୦୩୧) ଆୟୋଜନ କରିବାର ଅଧିକାର ଇଂଲଣ୍ଡ ଏବଂ ୱେଲ୍ସ କ୍ରିକେଟ୍ ବୋର୍ଡକୁ ଦିଆଯାଇଛି । ଏହାର ଅର୍ଥ ପରବର୍ତ୍ତୀ ତିନୋଟି ଡବ୍ଲୁଟିସି ଫାଇନାଲ୍ ଇଂଲଣ୍ଡ ମାଟିରେ ଅନୁଷ୍ଠିତ ହେବ ।

୨୦୨୭ ବିଶ୍ୱ ଟେଷ୍ଟ ଚାମ୍ପିଅନସିପର ଫାଇନାଲ ଭାରତରେ ଅନୁଷ୍ଠିତ ହୋଇପାରେ ବୋଲି ବହୁତ ଆଲୋଚନା ହେଉଥିଲା । କିନ୍ତୁ ଏହି ସମସ୍ତ ଚର୍ଚ୍ଚାରେ ପୂର୍ଣ୍ଣଚ୍ଛେଦ ପଡ଼ିଛି । ଅନ୍ତର୍ଜାତୀୟ କ୍ରିକେଟ ପରିଷଦ ସିଙ୍ଗାପୁରରେ ଏହାର ବାର୍ଷିକ ବୈଠକ ଆୟୋଜନ କରିଥିଲା । ସେଠାରେ ଆଇସିସି ଭାରତରେ ମହିଳା କ୍ରିକେଟ ବିଶ୍ୱକପ୍ ୨୦୨୫ ଏବଂ ଇଂଲଣ୍ଡରେ ମହିଳା T20 ବିଶ୍ୱକପ୍ ୨୦୨୬ ସମେତ ପ୍ରମୁଖ ଇଭେଣ୍ଟଗୁଡ଼ିକ ସହିତ ଜଡିତ ପ୍ରସଙ୍ଗ ଉପରେ ଆଲୋଚନା ହୋଇଥିଲା । ଏହି ବୈଠକରେ, ଆଇସିସି ଆଗାମୀ ୩ଟି ବିଶ୍ୱ ଟେଷ୍ଟ ଚାମ୍ପିଅନସିପର ଆୟୋଜକ ସ୍ଥିର କରିଛି । 

ବିଶ୍ୱ ଟେଷ୍ଟ ଚାମ୍ପିଅନସିପର ପ୍ରଥମ ଫାଇନାଲ ମ୍ୟାଚ୍ ୨୦୨୧ ରେ ଇଂଲଣ୍ଡର ସାଉଥାମ୍ପଟନ୍‌ରେ ଖେଳାଯାଇଥିଲା । ନ୍ୟୁଜିଲାଣ୍ଡ ଭାରତୀୟ ଦଳକୁ ୮ ୱିକେଟରେ ପରାସ୍ତ କରି ଟ୍ରଫି ହାତେଇଥିଲା । ତା'ପରେ ବିଶ୍ୱ ଟେଷ୍ଟ ଚାମ୍ପିଅନସିପ ୨୦୨୩ର ଫାଇନାଲ୍ ଲର୍ଡସ୍ ଗ୍ରାଉଣ୍ଡରେ ଅନୁଷ୍ଠିତ ହୋଇଥିଲା । ଯେଉଁଥିରେ ଅଷ୍ଟ୍ରେଲିଆ ଭାରତୀୟ ଦଳକୁ ୫ ୱିକେଟରେ ପରାସ୍ତ କରିଥିଲା। ବିଶ୍ୱ ଟେଷ୍ଟ ଚାମ୍ପିଅନସିପ ୨୦୨୫ର ଫାଇନାଲରେ ଦକ୍ଷିଣ ଆଫ୍ରିକା ଅଷ୍ଟ୍ରେଲିଆକୁ ୫ ୱିକେଟରେ ପରାସ୍ତ କରି ବିଜୟୀ ହୋଇଥିଲା । ଏପର୍ଯ୍ୟନ୍ତ, ନ୍ୟୁଜିଲ୍ୟାଣ୍ଡ, ଅଷ୍ଟ୍ରେଲିଆ ଏବଂ ଦକ୍ଷିଣ ଆଫ୍ରିକା ଦଳ ଥରେ ଲେଖାଏଁ WTC ଫାଇନାଲ ଜିତିଛନ୍ତି ।