ପାଟନା: ବିହାର ମୁଖ୍ୟମନ୍ତ୍ରୀ ନୀତୀଶ କୁମାରଙ୍କ ପୁଅ ନିଶାନ୍ତ କୁମାର ବିହାର ବିଧାନସଭା ନିର୍ବାଚନକୁ ନେଇ ଏକ ବଡ଼ ଦାବି କରିଛନ୍ତି । ସେ କହିଛନ୍ତି ଯେ, ମୋ ବାପା ପୁଣି ଥରେ ମୁଖ୍ୟମନ୍ତ୍ରୀ ହେବେ । NDA ସରକାର ଗଠନ ହେବ ଏବଂ ଆମେ ବିପୁଳ ବହୁମତରେ ଜିତିବୁ। ରାଜ୍ୟବାସୀଙ୍କ ଉପରେ ମୋର ପୂର୍ଣ୍ଣ ବିଶ୍ୱାସ ଅଛି ଯେ, ସେମାନେ ତାଙ୍କୁ ଗତ ୨୦ ବର୍ଷ ମଧ୍ୟରେ କରିଥିବା କାମ ପାଇଁ ନିଶ୍ଚିତ ଭାବରେ ପୁରସ୍କୃତ କରିବେ ଏବଂ ତାଙ୍କୁ ବିପୁଳ ବହୁମତରେ ପୁଣି ଥରେ ଜିତାଇବେ । ମୋର ଜନସାଧାରଣଙ୍କ ଉପରେ ପୂର୍ଣ୍ଣ ବିଶ୍ୱାସ ଅଛି। ବିହାରରେ ମୁଖ୍ୟମନ୍ତ୍ରୀ ଚେହେରାକୁ ନେଇ କୌଣସି ଦ୍ୱନ୍ଦ୍ୱ ନାହିଁ। ନିର୍ବାଚନ କେବଳ ମୁଖ୍ୟମନ୍ତ୍ରୀ ନୀତୀଶଙ୍କ ଅଧିନାୟକତ୍ୱରେ ଲଢ଼ାଯିବ । 

ଏହା ପ୍ରଥମ ଥର ନୁହେଁ ଯେ ନିଶାନ୍ତ ଏପରି ବୟାନ ଦେଇଛନ୍ତି। ଏହା ପୂର୍ବରୁ ମଧ୍ୟ ସେ କହିଥିଲେ ଯେ, ବାପା (ନୀତୀଶ କୁମାର) ମୁଖ୍ୟମନ୍ତ୍ରୀ ହେବେ। କେନ୍ଦ୍ର ଗୃହମନ୍ତ୍ରୀ ଅମିତ ଶାହ ତାଙ୍କୁ ପ୍ରତିଶ୍ରୁତି ଦେଇଛନ୍ତି ଯେ, ନୀତୀଶ କୁମାର ମୁଖ୍ୟମନ୍ତ୍ରୀ ହେବେ। ନୀତୀଶଙ୍କ ପୁଅ ନିଶାନ୍ତ ସାଧାରଣ ଲୋକଙ୍କୁ ଏନଡିଏକୁ ଭୋଟ ଦେବାକୁ ଅନୁରୋଧ କରିଛନ୍ତି । ଯାହା ଦ୍ଵାରା ତାଙ୍କ ବାପା ଅର୍ଥାତ୍ ନୀତୀଶଙ୍କ ନେତୃତ୍ୱରେ ସରକାର ଗଠନ ହୋଇପାରିବ । ସେ ଗଣମାଧ୍ୟମକୁ ପ୍ରତିକ୍ରିୟା ଦେଇ କହିଛନ୍ତି, ଆସନ ବଣ୍ଟନ ବିଷୟରେ କହିଲେ ବିଜେପି ପ୍ରାୟ ୧୦୦ ଆସନରେ ପ୍ରତିଦ୍ୱନ୍ଦ୍ୱିତା କରିବ । ଜେଡିୟୁ ପ୍ରାୟ ୯୦/୯୫ ଆସନ ପାଇବ । ବାକି ଆସନ ଏନଡିଏର ସହଯୋଗୀ ଦଳଙ୍କୁ ମିଳିବ ।  ସବୁ ନିର୍ବାଚନମଣ୍ଡଳୀରେ ବିଜେପି ସର୍ଭେ କରୁଛି । ସର୍ଭେ ରିପୋର୍ଟ ଆଧାରରେ ଆସନ ବଣ୍ଟନ କରାଯିବ ବୋଲି ସେ କହିଛନ୍ତି । 

ନିଶାନ୍ତ ଆହୁରି କହିଛନ୍ତି, ଯଦି ଏନଡିଏ କ୍ଷମତାକୁ ଆସେ, ନୀତୀଶ କୁମାର ପୁଣି ଥରେ ମୁଖ୍ୟମନ୍ତ୍ରୀ ହେବେ। ସେପଟେ ନୀତୀଶ ସରକାର ନିର୍ବାଚନ ପୂର୍ବରୁ ଅନେକ ଘୋଷଣା କରିଛନ୍ତି। ସେ ୨୦୨୫-୩୦ ସୁଦ୍ଧା ୧ କୋଟି ନିଯୁକ୍ତି ସୃଷ୍ଟି କରିବାର ଲକ୍ଷ୍ୟ ରଖିଛନ୍ତି । ଯେଉଁଥିରେ ଘରୋଇ ଏବଂ ସରକାରୀ ଉଭୟ କ୍ଷେତ୍ରରେ ଶିକ୍ଷା ଏବଂ ତାଲିମ ସୁବିଧା ଅନ୍ତର୍ଭୁକ୍ତ ହେବ। ଏହା ବ୍ୟତୀତ, ଅଗଷ୍ଟ ୨୦୨୫ ରୁ ୧୨୫ ୟୁନିଟ୍ ପର୍ଯ୍ୟନ୍ତ ମାଗଣା ବିଦ୍ୟୁତ୍ ଯୋଗାଇବା ପାଇଁ ଏକ ଯୋଜନା କରିଛନ୍ତି । ଏହା ଦ୍ବାରା ପ୍ରାୟ ୧.୬୭ କୋଟି ପରିବାରକୁ ଲାଭ ମିଳିବ ।