ସୋର, ୧୩/୦୬ : ପାରିବାରିକ କଳହରୁ କରୁଣ ପରିଣତି। ସ୍ତ୍ରୀକୁ ପିଟିପିଟି ମାରିଦେଲା ସ୍ୱାମୀ। ବାଲେଶ୍ୱର ଜିଲ୍ଲା ଖଇରା ଥାନା ଅନ୍ତର୍ଗତ ଅସୁରିଆ ଗ୍ରାମରେ ବୁଧବାର ବିଳମ୍ବିତ ରାତିରେ ଏଭଳି ଅଭାବନୀୟ ଘଟଣା ଘଟିଛି। ଘଟଣା ସ୍ଥଳରେ ପୋଲିସ ପହଞ୍ଚି ଅଭିଯୁକ୍ତ ସ୍ୱାମୀକୁ ଅଟକ ରଖିଛି।
ସୂଚନାନୁଯାୟୀ, ଖଇରା ଥାନା ଅନ୍ତର୍ଗତ ଅସୁରିଆ ଗ୍ରାମର ରମାକାନ୍ତ ପରିଡାଙ୍କ ସହିତ ସ୍ତ୍ରୀ କଞ୍ଚନଙ୍କ ମଧ୍ୟରେ ପାଟିତୁଣ୍ଡ ଲାଗିଥିଲା। ଏଥିରେ ଉତକ୍ଷିପ୍ତ ହୋଇ ରମାକାନ୍ତ ଏକ ଠେଙ୍ଗାରେ ସ୍ତ୍ରୀକୁ ପିଟିପିଟି ମାରି ଦେଇଥିଲେ। ସକାଳେ ଗ୍ରାମବାସୀ ଦେଖି ସ୍ୱାମୀକୁ ଅଟକ ରଖି ପୋଲିସକୁ ଖବର ଦେଇଥିଲେ। ଖଇରା ପୋଲିସ ପହଁଚି ସ୍ୱାମୀକୁ ଅଟକ ରଖି ଅଧିକ ତଦନ୍ତ କରୁଛି।
ରମାକାନ୍ତ ଗତ ୭ ବର୍ଷ ତଳେ ଭୁଜାଲିରେ ଗ୍ରାମର ଜଣେ ଯୁବକଙ୍କୁ ମଧ୍ୟ ଆକ୍ରମଣ କରି ହତ୍ୟା କରିଥିଲେ। ଗ୍ରାମରେ ବେଆଇନ ମଦ ବିକ୍ରି କରି ଗ୍ରାମକୁ ଅଶାନ୍ତ କରିବା ସହିତ ବିଭିନ୍ନ ସମୟରେ ଗ୍ରାମରେ ମାରପିଟ୍ କରୁଥିଲେ। ଲୋକମାନଙ୍କୁ ବିଭିନ୍ନ ଆଶ୍ଳୀଳ ଭାଷାରେ ଗାଳିଗୁଲଜ କରିବା ନେଇ ଗ୍ରାମବାସୀମାନେ ଅଭିଯୋଗ କରିଛନ୍ତି।