ଔପଦା, ୧୯/୦୭ : କାଠ ଫାଳିଆରେ ସ୍ତ୍ରୀକୁ ପିଟିପିଟି ଅତି ନିର୍ମମ ଭାବେ ହତ୍ୟା କଲା ମଦ୍ୟପ ସ୍ୱାମୀ। ବାଲେଶ୍ୱର ଜିଲ୍ଲା ଔପଦା ଥାନା ଅଘିରାପଦା ପଞ୍ଚାୟତ ଅଧିନ ଚିଞ୍ଚିଡ଼ା ଆଦିବାସୀ ସାହିରେ ଏଭଳି ଏକ ଅଭାବନୀୟ ଘଟଣା ଘଟିଛି। ଖବର ପାଇ ଔପଦା ପୋଲିସ ଅଭିଯୁକ୍ତ ସ୍ୱାମୀକୁ ଗିରଫ କରିଛି।
ସୂଚନାନୁଯାୟୀ, ଆଦିବାସୀ ସାହିର ପାଣ୍ଡୁ ସିଂ ଗତ ବିଳମ୍ଵିତ ରାତିରେ ମଦ୍ୟପାନ କରି ଘରକୁ ଫେରି ପୁଅ ଜୟନ୍ତ ସିଂ ଏବଂ ପତ୍ନୀ ଜାନୀ ସିଂଙ୍କ ସହ ଝଗଡା କରିଥିଲେ। ପରେ ପୁଅ ଜୟନ୍ତ ଶୋଇଲା ପରେ ପତ୍ନୀ ଜାନୀଙ୍କୁ ଏକ କାଠ ଫାଳିଆରେ ଅତି ନିର୍ମମ ଭାବେ ପିଟିପିଟି ହତ୍ୟା କରିଥିଲେ ପାଣ୍ଡୁ। ଆଜି ସକାଳେ ମୃତ ଜାନୀଙ୍କ ଭାଇ ଏନେଇ ଔପଦା ଥାନାରେ ଅଭିଯୋଗ କରିଥିଲେ। ଅଭିଯୋଗ ପାଇ ଔପଦା ପୋଲିସ ଘଟଣା ସ୍ଥଳରେ ପହଞ୍ଚି ଅଭିଯୁକ୍ତ ସ୍ୱାମୀ ପାଣ୍ଡୁକୁ ଗିରଫ କରିବା ସହ ଅଧିକ ତଦନ୍ତ ଚଳାଇଛି।