ନୂଆଦିଲ୍ଲୀ ୨୧/୦୪: ନିଖୋଜ ହୋଇଯାଇଥିଲେ ସ୍ତ୍ରୀ । ଖୋଜି ଖୋଜି ଶେଷରେ ଥାନାରେ ଏତଲା ଦେଇଥିଲେ ସ୍ୱାମୀ । କିନ୍ତୁ ଏକ ହ୍ୱାଟ୍ସଆପ୍ ଭିଡିଓରେ ସେ ଯାହା ଦେଖିଲେ ତାହା ବିଶ୍ୱାସ କରିବା କଷ୍ଟକର ହୋଇଥିବା ସ୍ୱାମୀଙ୍କ ପକ୍ଷରେ । ଏକ ହ୍ୱାଟସ୍ଆପ୍ ଷ୍ଟାଟସ୍ ଭିଡିଓରେ ଉତ୍ତରପ୍ରଦେଶର ଶାକିର ତାଙ୍କ ସ୍ତ୍ରୀ ଅଞ୍ଜୁମଙ୍କୁ ତାଜମହଲ ନିକଟରେ ବୁଲୁଥିବାର ଦେଖିବାକୁ ପାଇଥିଲେ । ତାହା ପୁଣି ଆଉ ଜଣେ ଯୁବକଙ୍କ ସାଙ୍ଗରେ ।
ଘଟଣା ମୁତାବକ, ଗତ ୧୫ ତାରିଖରେ ଶାକିର ଏକ ପାରିବାରିକ ବିବାହ ଉତ୍ସବରେ ଯୋଗଦେଇ ଘରକୁ ଫେରିଥିଲେ । ଘରେ ପହଞ୍ଚିବା ପରେ ଆଗ କବାଟରେ ତାଲା ପଡ଼ିଥିବା ସେ ଦେଖିବାକୁ ପାଇଥିଲେ । ଘରେ ତାଙ୍କ ସ୍ତ୍ରୀ ଅଞ୍ଜୁମ ଏବଂ ୪ ପିଲା ବି ନ ଥିଲେ । ଖୋଜାଖୋଜି ପରେ ଶାକିର ଏ ନେଇ ଆଲିଗଡ଼ ଥାନାରେ ନିଖୋଜ ଏତଲା ଦେଇଥିଲେ । ପରେ ଶାକିରଙ୍କ ଜଣେ ସମ୍ପର୍କୀୟ ଅଞ୍ଜୁମଙ୍କୁ ଏକ ହ୍ୱାଟ୍ସଆପ୍ ଷ୍ଟାଟସ ଭିଡିଓରେ ଦେଖିବାକୁ ପାଇଥିଲେ । ଅଞ୍ଜୁମ ଜଣେ ବ୍ୟକ୍ତିଙ୍କ ସହ ତାଜମହଲ ନିକଟରେ ବୁଲୁଥିବା ସେହି ଭିଡିଓରେ ରହିଥିଲା । ଏହା ଜାଣିବା ପରେ ଶାକିର ସେହି ବ୍ୟକ୍ତିଙ୍କୁ ଚିହ୍ନଟ କରିଥିଲେ । ସେହି ବ୍ୟକ୍ତିଙ୍କ ସହ ଅଞ୍ଜୁମଙ୍କର ସମ୍ପର୍କ ଗଢ଼ିଉଠିଥିବା ଏବଂ ଘରେ ଶାକିରଙ୍କ ଅନୁପସ୍ଥିତିର ସୁଯୋଗ ନେଇ ଅଞ୍ଜୁମ ପିଲାଙ୍କୁ ନେଇ ଘରୁ ପଳାଇଥିବା ପୁଲିସ ପ୍ରାଥମିକ ତଦନ୍ତରୁ ଜାଣିବାକୁ ପାଇଛି । ଆଲିଗଡ଼ ପୁଲିସ ଅଞ୍ଜୁମ ଏବଂ ତାଙ୍କ ସାଥୀଙ୍କୁ ଖୋଜିବାକୁ ଉଦ୍ୟମ ଚଳାଇଛି ।
