ଶୋଇବା ଶିଶୁଙ୍କ ମାନସିକ ଓ ଶାରୀରିକ ସ୍ୱାସ୍ଥ୍ୟ ପାଇଁ ଜରୁରି । ଚାଲନ୍ତୁ ଜାଣିବା ବୟସ ଅନୁସାରେ ଶିଶୁଙ୍କୁ କେତେ ସମୟ ଶୋଇବା ଆବଶ୍ୟକ । ଶିଶୁ ଜନ୍ମ ପରେ ତା’ଶୋଇବାକୁ ନେଇ ପିତାମାତା ଚିନ୍ତାରେ ରହିଥାନ୍ତି । ଶିଶୁ ଜନ୍ମ ହେବା ପରେ କିଛି ଦିନ ଯାଏ ଅଧିକ ସମୟ ଶୋଇଥାଏ । କିନ୍ତୁ ବଡ଼ ହେବା ସହ ଶୋଇବା ସମୟ କମି ଚାଲେ । ପର୍ଯ୍ୟାପ୍ତ ଶୋଇବା ଶିଶୁର ମାନସିକ ଓ ଶାରୀରିକ ସ୍ୱାସ୍ଥ୍ୟ ପାଇଁ ଖୁବ୍ ଜରୁରି । ତେବେ ଚାଲନ୍ତୁ ଜାଣିବା ବୟସ ଅନୁସାରେ ଶିଶୁକୁ କେତେ ସମୟ ଶୋଇବା ଆବଶ୍ୟକ ।
୩ରୁ ୪ ମାସ ଭିତରେ
୩ରୁ ୪ ମାସର ଶିଶୁକୁ ଦିନରେ ସର୍ବନିମ୍ନ ୫ ଘଣ୍ଟା ଶୋଇବା ଦରକାର । ଏହି ସମୟରେ ଶିଶୁର ଶାରୀରିକ ଓ ମାନସିକ ବିକାଶ ତୀବ୍ର ବେଗରେ ହୋଇଥାଏ । ତାହା ପୁଣି ଶୋଇବା ସମୟରେ ହିଁ ହୋଇଥାଏ । ଏହି ସମୟରେ ଶିଶୁ ଦିନରେ ଅଧିକ ସମୟ ଓ ରାତିରେ କମ୍ ସମୟ ଶୋଇଥାଏ ।
୫ରୁ ୭ ମାସ ଭିତରେ
ଏହି ସମୟରେ ପିଲାର ଶୋଇବା ସମୟ ୪ ଘଣ୍ଟାକୁ ଯାଏ ଖସିଚାଲେ । ଏହି ସମୟରେ ଶିଶୁ ଅଧିକ ସକ୍ରିୟ ହେବା ସହ ମାଂସପେଶୀ ମଜଭୁତ ହୋଇଚାଲେ । ସେ ନିଜ ଆଖପାଖରେ ଥିବା ଜିନିଷ ପ୍ରତି ବେଶୀ ଆକର୍ଷିତ ହୋଇଥାଏ । ଫଳରେ ଶୋଇବା ଆପେ ଆପେ କମିଚାଲେ ।
୭ରୁ ୯ ମାସ ଭିତରେ
ଶିଶୁର ଶୋଇବା ସମୟ ଆହୁରି କମିଚାଲେ । ଏ ସମୟରେ ଶିଶୁ ଦିନରେ କମ୍ ଶୋଇବା ସହ ରାତିରେ ଧୀରେ ଧୀରେ ଶୋଇବା ଅଭ୍ୟାସରେ ପଡିଥାଏ । ଏହି ସମୟରେ ଶିଶୁର ଶୋଇବା ୩.୫ ଘଣ୍ଟା ହେବା ଆବଶ୍ୟକ । ଏହି ବୟସରେ ଶିଶୁର ଶାରୀରିକ ବିକାଶ ତୀବ୍ର ହେବା ସହ ସେ ଅଲଗା ଅଲଗା ଆଚରଣ ମଧ୍ୟ କରିଥାଏ । ଫଳରେ ଦିନରେ ଏସବୁ କରିବା ଯୋଗୁ ରାତିରେ ଅଧିକ ଶୋଇଥାଏ ।
୧୦ରୁ ୨୪ ମାସ ଭିତରେ
ଏଠାରେ ଶିଶୁର ଶୋଇବା ସମୟ ୨ରୁ ୩ ଘଣ୍ଟା ଭିତରେ ସୀମିତ ହୋଇଯାଏ । ସେହି ଶୋଇବା ପୁଣି ଛୋଟ ଛୋଟ ସମୟରେ ବିଭକ୍ତ ହୋଇପଡେ । ଏହି ବୟସରେ ପିଲା ଖେଳକୁଦ ସହ ବିଭିନ୍ନ ଶାରୀରିକ ଗତିବିଧିରେ ବ୍ୟସ୍ତ ରହିଥାଏ । ତେଣୁ ଦିନରେ ଶୋଇବା ସମୟ କମିଯାଏ । କିନ୍ତୁ ରାତିରେ ଶୋଇବା ଅଭ୍ୟାସ କ୍ରମଶଃ ବଢିଚାଲେ । ତେଣି ପିଲା ଦିନରେ ୨ରୁ ୩ ଘଣ୍ଟା ଶୋଇଲେ କିଛି ସମସ୍ୟା ନଥାଏ ।
