ଗଜପତି, ୨୯।୧: ଗଜପତି ଜିଲ୍ଲା ସଦରମହକୁମା ପାରଳାଖେମୁଣ୍ଡିଠାରେ ଅଭାବନୀୟ ଘଟଣା । ଉପରିସ୍ଥ ଅଧିକାରୀଙ୍କ ବନ୍ଧୁକରୁ ଗୁଳି ବାଜି ଜଣେ ହୋମଗାର୍ଡ ଆହତ ହୋଇଥିବା ଜଣାପଡ଼ିଛି । ପୁଲିସ୍ ଘଟଣାକୁ ଲୁଚାଇ ରଖିଥିବା ବେଳେ ଜିଲ୍ଲା ମୁଖ୍ୟ ଚିକିତ୍ସାଳୟରେ ବିଳମ୍ବିତ ରାତି ପର୍ଯ୍ୟନ୍ତ ବହୁ ସଂଖ୍ୟାରେ କନେଷ୍ଟବଳ, ହୋମଗାର୍ଡ ଓ ଅଧିକାରୀଙ୍କ ଚଳଚଞ୍ଚଳ ଗତିବିଧି କୌଣସି ଏକ ବଡ଼ ଘଟଣା ଘଟିଥିବା ଅନୁମାନ କରାଯାଉଛି ।
ସୂଚନା ଅନୁଯାୟୀ, ଜିଲ୍ଲାର ଜଣେ ପିଏସଓ ତାଙ୍କ ନିଜ ବନ୍ଧୁକ ସଫା କରୁଥିବା ବେଳେ ବନ୍ଧୁକଟିରୁ ଭୁଲବଶତଃ ଗୁଳି ଫୁଟି ଯାଇଥିଲା । ସେ ସମୟରେ ସେଠାରେ କର୍ଯ୍ୟରତ ଜୈନିକ ହୋମଗାର୍ଡଙ୍କ ଆଣ୍ଠୁରେ ଗୁଳି ବାଜି ଆରପାର୍ଶ୍ୱକୁ ଚାଲିଯାଇଛି । ଫଳରେ ହୋମଗାର୍ଡଙ୍କୁ ମୁଖ୍ୟ ଚିକିତ୍ସାଳୟର ୬୩ ନଂ ଶଯ୍ୟାରେ ଭର୍ତ୍ତି କରାଯାଇଛି । ଅଧା ରାତି ପର୍ଯ୍ୟନ୍ତ ପୁଲିସ ଡାକ୍ତରଖାନାରେ ରହିଥିବା ବେଳେ ଚିକିତ୍ସିତ ହେଉଥିବା କର୍ମଚାରୀଙ୍କ ପରିଚୟ ମିଳିପାରିନାହିଁ ।
