ଭୁବନେଶ୍ୱର,୨୮/୦୨: ଭାରତର ନିବେଶ ହବ୍ ଭାବେ ସ୍ଥିତି ମଜଭୁତ କରୁଛି ଓଡ଼ିଶା । ଏହି କ୍ରମରେ ଗୁରୁବାର ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ଅଧ୍ୟକ୍ଷତାରେ ବସିଥିବା ୪୦ତମ ଉଚ୍ଚସ୍ତରୀୟ ମଞ୍ଜୁରି କର୍ତ୍ତୃପକ୍ଷ (ଏଚ୍ଏଲ୍ସିଏ)ଙ୍କ ବୈଠକରେ ୧୦ଟି ପ୍ରମୁଖ ଶିଳ୍ପ ପ୍ରସ୍ତାବକୁ ମିଳିଛି ଅନୁମୋଦନ । ଏହା ମାଧ୍ୟମରେ ରାଜ୍ୟକୁ ଆସିବ ୧,୬୫,୩୦୩ କୋଟିର ନିବେଶ । ପ୍ରକଳ୍ପଗୁଡ଼ିକ କାର୍ଯ୍ୟକ୍ଷମ ହେଲେ ରାଜ୍ୟରେ ସୃଷ୍ଟି ହେବ ୫୨,୦୦୦ ନିଯୁକ୍ତି ।
ଇସ୍ପାତ, ଆଲୁମିନିୟମ, ବିଦ୍ୟୁତ୍ ଉତ୍ପାଦନ, ଗ୍ରୀନ୍ ହାଇଡ୍ରୋଜେନ୍, ଇଞ୍ଜିନିୟରିଂ ସାମଗ୍ରୀ ଏବଂ ସବୁଜ ଶକ୍ତି ଉପକରଣ ଆଦି ପ୍ରମୁଖ କ୍ଷେତ୍ରରେ ଏହି ପ୍ରକଳ୍ପଗୁଡ଼ିକ ଆସିବାକୁ ଯାଉଛି । ଭଦ୍ରକ, କଟକ, ଗଞ୍ଜାମ, କେନ୍ଦୁଝର, ଖୋର୍ଦ୍ଧା, ମୟୂରଭଞ୍ଜ ଏବଂ ରାୟଗଡ଼ା ଆଦି ୭ଟି ଜିଲ୍ଲାରେ ଏହି ପ୍ରକଳ୍ପଗୁଡ଼ିକ କାର୍ଯ୍ୟକାରୀ ହେବ ।
ଆଲୁମିନିୟମ କ୍ଷେତ୍ରରେ ବେଦାନ୍ତ ଲିମିଟେଡ୍ ରାୟଗଡ଼ାରେ ଦୁଇଟି ପ୍ରକଳ୍ପ କରିବ । କମ୍ପାନି ୫୦,୫୩୭ କୋଟି ଟଙ୍କା ନିବେଶରେ ଏଠାରେ ଏକ ୬ ଏମ୍ଟିପିଏ ଆଲୁମିନା ରିଫାଇନେରୀ କରିବ, ଯାହା ମାଧ୍ୟମରେ ୮,୭୦୦ ନିଯୁକ୍ତି ସୃଷ୍ଟି ହେବ । ଦ୍ୱିତୀୟ ପ୍ରକଳ୍ପ ଅନ୍ତର୍ଗତ ଏହା ୪୦,୯୯୧ କୋଟି ଟଙ୍କା ନିବେଶରେ ଏକ ଗ୍ରୀନ୍ଫିଲ୍ଡ ୧.୨ ଏମ୍ଟିପିଏ ଆଲୁମିନିୟମ ସ୍ମେଲ୍ଟର କରିବ ।
ଇସ୍ପାତ କ୍ଷେତ୍ରରେ ଜେଏସ୍ଡବ୍ଲ୍ୟୁ ଷ୍ଟିଲ୍ କେନ୍ଦୁଝରରେ ୩୫,୦୦୦ କୋଟି ଟଙ୍କା ନିବେଶରେ ଅପ୍ଷ୍ଟ୍ରିମ୍ ଓ ଡାଉନ୍ଷ୍ଟ୍ରିମ୍ ଫ୍ୟାସିଲିଟି ସହ ଏକ ୫ ଏମ୍ଟିପିଏ ସମନ୍ୱିତ ଷ୍ଟିଲ୍ ପ୍ଲାଣ୍ଟ ସ୍ଥାପନ କରିବ । ସେହିଭଳି ଶ୍ୟାମ ଷ୍ଟିଲ୍ ୱାର୍କସ ୫,୨୦୦ କୋଟି ଟଙ୍କା ନିବେଶରେ ଅପ୍ଷ୍ଟ୍ରିମ୍ ଓ ଡାଉନ୍ଷ୍ଟ୍ରିମ୍ ଫ୍ୟାସିଲିଟି ସହ ଭଦ୍ରକରେ ଏକ ୧.୫ ଏମ୍ଟିପିଏ ସମନ୍ୱିତ ଷ୍ଟିଲ୍ ପ୍ଲାଣ୍ଟ କରିବ । ଓସିଏଲ୍ ଆଇରନ୍ ଆଣ୍ଡ୍ ଷ୍ଟିଲ୍ ଏହାର ଇସ୍ପାତ ଉତ୍ପାଦନ ବଢ଼ାଇବା ପାଇଁ କେନ୍ଦୁଝରରେ ୩୦୦୦ କୋଟି ଟଙ୍କା ନିବେଶରେ ଏକ ୧.୨ ଏମ୍ଟିପିଏ ସମନ୍ୱିତ ଷ୍ଟିଲ ପ୍ଲାଣ୍ଟ ସ୍ଥାପନ କରିବ ।
ଶକ୍ତି କ୍ଷେତ୍ରରେ ଓଡ଼ିଶା ଥର୍ମାଲ ଏନର୍ଜିର ଏକ ପ୍ରସ୍ତାବକୁ ଅନୁମୋଦନ ମିଳିଛି । କମ୍ପାନି କଟକରେ ୧୮,୪୫୦ କୋଟି ଟଙ୍କା ନିବେଶରେ ଏକ ୨୪୦୦ ମେଗାୱାଟ ଅଲ୍ଟ୍ରା ସୁପର୍ କ୍ରିଟିକାଲ କୋଇଲାଭିତ୍ତିକ ତାପଜ ବିଦ୍ୟୁତ ପ୍ଲାଣ୍ଟ କରିବ । ଏହା ମାଧ୍ୟମରେ ୮୧୦୦ ଲୋକଙ୍କୁ ନିଯୁକ୍ତି ମିଳିବ ।
ରେୟାର୍ ଆର୍ଥ କ୍ଷେତ୍ରରେ ଓଡ଼ିଶା ମେଟାଲର୍ଜିକାଲ ଇଣ୍ଡଷ୍ଟ୍ରି ପ୍ରାଇଭେଟ୍ ଲିମିଟେଡ୍ ଗଞ୍ଜାମରେ ଟିଟାନିୟମ କମ୍ପେ୍ଲକ୍ସରେ ୮,୦୦୦ କୋଟି ଟଙ୍କା ନିବେଶ କରିବ । ଗ୍ରୀନ୍ ହାଇଡ୍ରୋଜେନ୍ କ୍ଷେତ୍ରରେ ଶ୍ରୀଟେକ୍ ଡାଟା ଲିମିଟେଡ୍ ୧୫୬୦ କୋଟି ଟଙ୍କା ନିବେଶରେ ମୟୂରଭଞ୍ଜ ଜିଲ୍ଲାର ରାସଗୋବିନ୍ଦପୁରରେ ଏକ ପ୍ରକଳ୍ପ ବିକାଶ କରିବାକୁ ଯାଉଛି । ସେହିଭଳି ୱାର୍ଲଡ ଗ୍ରୀନ୍ ଏନର୍ଜି ଗଞ୍ଜାମ ଗୋପାଳପୁରରେ ୧.୨ ଗିଗାୱାଟ ସୋଲାର ମଡ୍ୟୁଲ ଏବଂ ୪ ଗିଗାୱାଟ ସୋଲାର ଫଟୋଭୋଲ୍ଟାଇକ୍ ସେଲ୍ ଉତ୍ପାଦନ ୟୁନିଟ୍ ବସାଇବ । ଏଥିରେ କମ୍ପାନି ୧,୪୭୫ କୋଟି ଟଙ୍କା ନିବେଶ କରିବ ।
ସେହିଭଳି ରେଳ ଉପକରଣ ଉତ୍ପାଦନ କ୍ଷେତ୍ରରେ ଜୁପିଟର ତତ୍ରଭାଗୋଙ୍କା ରେଲ୍ହ୍ୱିଲ ଫ୍ୟାକ୍ଟ୍ରିର ଏକ ପ୍ରସ୍ତାବକୁ ମିଳିଛି ଅନୁମୋଦନ । କମ୍ପାନି ୧୦୯୦ କୋଟି ଟଙ୍କା ନିବେଶରେ ଖୋର୍ଦ୍ଧାରେ ଏହାର ରେଲ୍ ହ୍ୱିଲ୍ସେଟ୍ସ ପ୍ଲାଣ୍ଟ୍ର ସମ୍ପ୍ରସାରଣ କରିବ ।
