ସମ୍ବଲପୁର,୨୫/୦୭: ଚଳିତ ମୌସୁମୀ ଅବଧିରେ ପ୍ରଥମ କରି ହୀରାକୁଦର ଉପରମୁଣ୍ଡରେ ଭଲ ବର୍ଷା ହୋଇଛି । ଫଳରେ ଜଳଭଣ୍ଡାରକୁ ବୁଧବାର ରାତି ୯ଟା ସୁଦ୍ଧା ୧.୬୦ ଲକ୍ଷ କ୍ୟୁସେକ୍ ପାଣି ପ୍ରବେଶ କରୁଛି । ଏଥିପାଇଁ ଜଳସ୍ତର ବି ଦ୍ରୁତ ଗତିରେ ବଢ଼ିବାରେ ଲାଗିଛି ।
ଗତବର୍ଷ ଜୁଲାଇ ୨୩ରେ ହୀରାକୁଦରୁ ପ୍ରଥମ ବନ୍ୟାଜଳ ନିଷ୍କାସନ କରାଯାଇଥିଲା । ସେହିଦିନ ଜଳସ୍ତର ୬୧୪.୮୯ ଫୁଟ୍ ରହିଥିଲା । ହେଲେ ଏବର୍ଷ ଗତକାଲି ଜଳସ୍ତର କଷ୍ଟେ ମଷ୍ଟେ ୬୦୧ ଫୁଟ୍ ଛୁଇଁଥିଲା । ଉପରମୁଣ୍ଡରେ ବର୍ତ୍ତମାନ ସୁଦ୍ଧା ଭଲ ବର୍ଷା ହୋଇ ନ ଥିବାରୁ ହୀରାକୁଦରେ ବିକଳ ସ୍ଥିତି ଜାରି ରହିଥିଲା । କିନ୍ତୁ ଚଳିତ ଲଘୁଚାପରେ ଉପରମୁଣ୍ଡରେ ଭଲ ବର୍ଷିଛି । ସୋମବାର ରାତିରୁ ଛତିଶଗଡ଼ର ମହାନଦୀ ବେସିନ୍ରେ ବର୍ଷା ଲାଗି ରହିଛି ।
ଗତ ୨୪ ଘଣ୍ଟାରେ ୪୪.୮୬ ମିମି ବର୍ଷା ହୋଇଥିବା ରେକର୍ଡ କରାଯାଇଛି । ଏଥିପାଇଁ ହୀରାକୁଦ ଜଳଭଣ୍ଡାରକୁ ଇନଫ୍ଲୋ ବା ଜଳପ୍ରବେଶର ମାତ୍ରା ବଢ଼ିବାରେ ଲାଗିଛି । ମଙ୍ଗଳବାର ରାତି ୯ଟା ସୁଦ୍ଧା ପ୍ରାୟ ୪୫ ହଜାର କ୍ୟୁସେକ୍ ପାଣି ପ୍ରବେଶ କରୁଥିବା ବେଳେ ବୁଧବାର ରାତି ୯ଟା ସୁଦ୍ଧା ଏହା ୧ ଲକ୍ଷ ୬୦ ହଜାର ୭୫୩ କ୍ୟୁସେକ୍କୁ ବୃଦ୍ଧି ପାଇଛି । ଫଳରେ ଜଳସ୍ତର ବୃଦ୍ଧି ପାଇ ୬୦୩.୧୭ ଫୁଟ୍ରେ ପହଞ୍ଚିଛି ।
ସେପଟେ ହୀରାକୁଦରେ ସ୍ଥିତି ସୁଧୁରିବା ପରେ ପାୱାର୍ ଚ୍ୟାନେଲକୁ ୩୩୬୧୦ କ୍ୟୁସେକ୍ ପାଣି ଛଡ଼ାଯାଇ ଉଭୟ ବୁର୍ଲା ଏବଂ ଚିପିଲିମା ପାୱାର୍ ହାଉସ୍ରୁ ପୂର୍ଣ୍ଣ ମାତ୍ରାରେ ବିଦ୍ୟୁତ୍ ଉତ୍ପାଦନ ହେଉଛି । ଉଭୟ ପାୱାର୍ ହାଉସ୍ରୁ ମୋଟ୍ ୧୨୯.୬୬୬ ମେଗାୱାଟ୍ ଉତ୍ପାଦନ ହେଉଛି ।