ନୂଆଦିଲ୍ଲୀ,୨୧/୦୯:  ମଧ୍ୟପ୍ରାଚ୍ୟରେ ଥମିବାରେ ନାଁ ନେଉନି ଯୁଦ୍ଧ । ଇସ୍ରାଏଲର ଆକ୍ରମଣରେ ହେଜବୁଲ୍ଲାର ଟପ୍ କମାଣ୍ଡର ନିହତ। ଲେବାନନ ରାଜଧାନୀରେ ଇସ୍ରାଏଲ ପକ୍ଷରୁ ହୋଇଥିବା ଆକ୍ରମଣରେ ଆତଙ୍କବାଦୀ ସଂଗଠନ ହେଜବୁଲ୍ଲାର ଜଣେ ଟପ୍ କମାଣ୍ଡର ଇବ୍ରାହିମ ଅକିଲ୍ ନିହତ ହୋଇଛି। ଏହା ଉଭୟ ଇସ୍ରାଏଲ ଓ ଲେବାନନ ପକ୍ଷରୁ ସ୍ପଷ୍ଟ କରାଯାଇଛି।

ଏନେଇ ଲେବାନନ କହିଛି ଯେ,ଏହି ଆକ୍ରମଣରେ ଆହୁରି ୮ ଜଣଙ୍କ ମୃତ୍ୟୁ ହେବା ସହିତ ୬୦ରୁ ଅଧିକ ଲୋକ ଆହତ ହୋଇଛନ୍ତି। ସେପଟେ ଇସ୍ରାଏଲ ତରଫରୁ କୁହାଯାଇଛି, ଏହା ଟ୍ରାର୍ଗେଟେଡ୍ ଷ୍ଟ୍ରାଇକ୍ ଥିଲା। ଗତ ବର୍ଷ ଅକ୍ଟୋବରରେ ହମାସ ଓ ଇସ୍ରାଏଲ ମଧ୍ୟରେ ଯୁଦ୍ଧ ପରଠୁ ଲେବାନନ ଉପରେ ଏହା ହେଉଛି ଇସ୍ରାଏଲର ତୃତୀୟ ଆକ୍ରମଣ। ଯାହାକି ରାଜଧାନୀ ବିରୁଟର ଦକ୍ଷିଣାଞ୍ଚଳରେ ହୋଇଛି। ଇସ୍ରାଏଲ ଏବେ ଗାଜା ଅପେକ୍ଷା ଲେବାନନକୁ ଅଧିକ ଟାର୍ଗେଟ କରୁଛି। ଏହା ଆଗରୁ ମଧ୍ୟ ହେଜବୁଲ୍ଲାର ଜଣେ ଟପ୍ କମାଣ୍ଡରକୁ ହତ୍ୟା କରିଥିଲା। କିଛି ଦିନ ମଧ୍ୟରେ ପେଜର୍ ଓ ୱାକି ଟକି ବ୍ଳାଷ୍ଟ କରାଇ ଅନେକ ହେଜବୁଲ୍ଲା ଆତଙ୍କବାଦୀଙ୍କୁ ମାରିଛି ଇସ୍ରାଏଲ। ଏହାର ପ୍ରତିଶୋଧ ନିଆଯିବ ବୋଲି କହିଛି ହେଜବୁଲ୍ଲା। ଶୁକ୍ରବାର ହେଜବୁଲ୍ଲା ଇସ୍ରାଏଲ ଉପରେ ଅନେକ ରକେଟ ମାଡ଼ କରିଥିଲା।