ଭୁବନେଶ୍ୱର,୦୯/୧୦: ମଦ, ଗଞ୍ଜେଇ ନିଶାରେ ଏତେମାତ୍ରାରେ ଚୁର୍ ଥିଲେ ଯେ ହିତାହିତ ଜ୍ଞାନ ହରାଇଥିଲେ । ପୁଲିସକୁ ମନଇଚ୍ଛା ଗାଳି କଲେ । ଯିଏ ବିରୋଧ କଲା, ତା’ ଗୋଡ଼କୁ ଦଳି ଦେଲେ, ବେକକୁ କାମୁଡି ପକାଇଲେ । ହସ୍ପିଟାଲରେ ଚିକିତ୍ସା ବେଳେ ଉତ୍ପାତ ସୀମା ଟପିଲା । ହସ୍ପିଟାଲ ବାରେଣ୍ଡାରେ ଏକ ମୃତଦେହକୁ କୁଣ୍ଢେଇ ଚୁମା ଦେବାରେ ଲାଗିଲେ ।
ମଙ୍ଗଳବାର ବିଳମ୍ବିତ ରାତିରେ ରାଜଧାନୀରେ ଜଣେ ମାତାଲ୍ ବିଦେଶିନୀଙ୍କ ଏଭଳି ଉତ୍ପାତ ସାମ୍ନାକୁ ଆସିଛି । ଯୁବତୀଙ୍କ ଘର ନେପାଳ ଭାଗମତି ପ୍ରଦେଶରେ । ରାତି ୧ଟାରୁ ଭୋର ୫ଟା ଯାଏଁ ଯୁବତୀ ଜଣଙ୍କ କଳାରାହଙ୍ଗରୁ କ୍ୟାପିଟାଲ ହସ୍ପିଟାଲ ଯାଏଁ ହଙ୍ଗାମା କରିଥିଲେ । ତାଙ୍କୁ ସମ୍ଭାଳିବାରେ ହର୍ ଟିମ୍କୁ ନାକେଦମ୍ ହେବାକୁ ପଡ଼ିଥିଲା । ରାତି ୧ଟାରେ କଳାରାହଙ୍ଗ ଛକରେ ୨୭ବର୍ଷୀୟ ଉକ୍ତ ଯୁବତୀଙ୍କ ହଙ୍ଗାମା ଆରମ୍ଭ ହୋଇଥିଲା । ସେ ଅଳିଆ ଗଦାରେ ଶୋଇରହିଲେ । ସେଠାରୁ ଯାଇ ଫୁଟ୍ଫାଥରେ ଶୋଇଥିବା ଜଣେ ବ୍ୟକ୍ତିଙ୍କୁ ଗୋଇଠା ମାରିଲେ । ଖବରପାଇ ଇନଫୋସିଟି ଥାନାର ଏକ ପିସିଆର ଭ୍ୟାନ୍ ସେଠାରେ ପହଞ୍ଚିଲା । ପିସିଆରରେ ଥିବା ଜଣେ ପୁରୁଷ ହୋମଗାର୍ଡଙ୍କ ବେକକୁ କାମୁଡି ପକାଇଲେ ଯୁବତୀ । ଜଣେ ମହିଳା କନଷ୍ଟେବଳଙ୍କ ଗୋଡ଼କୁ ବି ଦଳିଦେଲେ । ଏପରିକି ପଥର ଫିଙ୍ଗି ପିସିଆର ଭ୍ୟାନ୍ କାଚ ଭାଙ୍ଗିଦେଲେ ।
ସବ୍ଇନ୍ସପେକ୍ଟର ରୋଜାଲିନ୍ ସାମନ୍ତରାୟଙ୍କ ସମେତ ୪ଜଣିଆ ହର ଟିମ୍ ସେଠାରେ ପହଞ୍ଚି କଷ୍ଟେମଷ୍ଟେ ଯୁବତୀଙ୍କୁ ଭ୍ୟାନରେ ବସାଇଲେ। ସିଧା କ୍ୟାପିଟାଲ ହସ୍ପିଟାଲ ଅଭିମୁଖେ ବାହାରିଲେ । ବାଟସାରା ତାଙ୍କ ପାଟିରୁ ଅନର୍ଗଳ ଗାଳି ବର୍ଷୁଥାଏ । ପୁଲିସ କାନରେ ହାତ ବୁଜିଥାଏ। ତାଙ୍କୁ ଜାବୁଡି ଧରିଥିବା ୨ ମହିଳା କନ୍ଷ୍ଟେବଳଙ୍କ ଗୋଡ଼କୁ ସେ ଦଳିମକଚି ପକାଇଲେ ।
ହସ୍ପିଟାଲରେ ପହଞ୍ଚିବା ପରେ ଯୁବତୀଙ୍କ ଉତ୍ପାତ ଦୁଇଗୁଣା ବଢ଼ିଥିଲା । ଡାକ୍ତରଙ୍କ ଟେବୁଲରେ ଅସଞ୍ଜତ ଅବସ୍ଥାରେ ବସି ରହିବାରୁ ହର ଟିମ୍ ତାଙ୍କୁ କାଜୁଆଲିଟି ବାହାରକୁ ଟାଣି ଆଣିଲା । ବାରେଣ୍ଡାରେ ଏକ ଷ୍ଟ୍ରେଚରରେ ରଖାଯାଇଥିବା ମୃତଦେହ ପାଖକୁ ଧାଇଁଗଲେ ଯୁବତୀ। ସେତେବେଳେ ମୃତକଙ୍କ ସମ୍ପର୍କୀୟଙ୍କ ଭିତରେ କାନ୍ଦବୋବାଳି ପଡିଥାଏ । ସମ୍ପର୍କୀୟଙ୍କୁ ଠେଲାପେଲା କରି ମୃତଦେହ ମୁହଁରୁ କପଡ଼ା କାଢ଼ି ନେଲେ । ମୃତଦେହକୁ କୁଣ୍ଢେଇ ଧରି ଚୁମା ପରେ ଚୁମା ଦେଇ ଚାଲିଲେ । ଯୁବତୀଙ୍କ ଏଭଳି ଅସ୍ୱାଭାବିକ କାରନାମା ଦେଖି ମୃତକଙ୍କ ସମ୍ପର୍କୀୟ ଓ ହର ଟିମ୍ ହତଚକିତ ହୋଇପଡିଥିଲେ । ଜଣେ ମହିଳା ଡାକ୍ତର କଷ୍ଟେମଷ୍ଟେ ଔଷଧ ଖୁଆଇବା ପରେ ସ୍ୱାଭାବିକ ଅବସ୍ଥାକୁ ଫେରିଥିଲେ ଯୁବତୀ । ଭୋର ୫ଟା ବେଳେ ହର ଟିମ୍ ତାଙ୍କୁ ପଟିଆସ୍ଥିତ ଏକ ଆପାର୍ଟମେଣ୍ଟରେ ଛାଡି଼ଥିଲା ।
ପୁଲିସ ତଦନ୍ତରୁ ଜଣାପଡି଼ଛି, ଯୁବତୀ ଜଣଙ୍କ ପ୍ରଚୁର ମଦ ପିଇବା ସହ ଗଞ୍ଜେଇ ସିଗାରେଟ୍ ଟାଣିଥିଲେ । ସିରିଞ୍ଜ୍ ଯୋଗେ ଡ୍ରଗ୍ସ ନେଇଥିଲେ। ତାଙ୍କର ଏଭଳି ଉତ୍ପାତ ପ୍ରଥମ ଘଟଣା ନୁହେଁ । ପୂର୍ବରୁ ଚନ୍ଦ୍ରଶେଖରପୁର ଓ ଖଣ୍ଡଗିରି ଥାନାରେ ଉତ୍ପାତ କରିଥିଲେ । ଗତ ଅଗଷ୍ଟରେ ଆଇଗିଣିଆ ଛକରେ ହୋହଲ୍ଲା କରୁଥିବାବେଳେ ତାଙ୍କୁ କାବୁ କରିବାରେ ଖଣ୍ଡଗିରି ଥାନା ପୁଲିସ ନାକେଦମ୍ ହୋଇଥିଲା । ଗତ ମାସରେ ସେ ଚନ୍ଦ୍ରଶେଖରପୁର ଥାନା ନିକଟରେ ଥିବା ଏକ ପବ୍ ସାମ୍ନାରେ ଉତ୍ପାତ କରିଥିଲେ ।
