ଶୀତ ଦିନିଆ ପରିବା ଗ୍ରୀନ ମଟର ।  ଏହା ଖାଇବାକୁ ଯେମିତି ସ୍ବାଦିଷ୍ଟ, ସ୍ବାସ୍ଥ୍ୟ ପାଇଁ ବି ସେମିତି ହିତକର ।  ଏହା ଏକ ଉଚ୍ଚ ପ୍ରୋଟିନ ଯୁକ୍ତ ପରିବା ଯାହାକି ଶରୀରକୁ ସୁସ୍ଥ ରଖିବାରେ ସାହାଯ୍ୟ କରେ । ପ୍ରାୟ ୧୦୦ ଗ୍ରାମ ଗ୍ରୀନ ମଟରରେ  ୫ ଗ୍ରାମ ପ୍ରୋଟିନ ମିଳିଥାଏ ।  ତେବେ ପ୍ରୋଟିନ ବ୍ୟତୀତ ଗ୍ରୀନ ମଟରରେ ଫାଇବର, ଭିଟାମିନ ଏ, ଭିଟାମିନ ସି, ଫୋଲେଟ, ଆଇରନ, ଜିଙ୍କ, ଭିଟାମିନ ବି ଏବଂ ଅନ୍ୟାନ୍ୟ ଆବଶ୍ୟକୀୟ ଭିଟାମିନ ଓ ମିନେରାଲ ରହିଥାଏ । ଯାହା ଶରୀରକୁ ସୁସ୍ଥ ରଖିବାରେ ସାହାଯ୍ୟ କରେ । ଓଜନ କମାଇବାକୁ ଚାହୁଁଥିବା ଲୋକେ ନିଜ ଡାଏଟରେ ଗ୍ରୀନ ମଟର ସାମିଲ କରିପାରିବେ । ଏଥିରେ କ୍ୟାଲୋରୀ କମ୍ । କିନ୍ତୁ ଫାଇବର, ପ୍ରୋଟିନରେ ଭରପୁର ହୋଇଥିବାରୁ ଦୀର୍ଘ ସମୟ ପର୍ଯ୍ୟନ୍ତ ପେଟ ଭର୍ତ୍ତି ହେଲା ଭଳି ଅନୁଭବ କରାଏ । ଅର୍ଥାତ୍ ଭୋକ କମ୍ ହୁଏ । ଯାହା ପରୋକ୍ଷରେ ଓଜନ ନିୟନ୍ତ୍ରଣରେ ସହାୟକ ହୁଏ । 

ସେହିପରି ଗ୍ରୀନ ମଟର ଆଣ୍ଟିଅକ୍ସିଡାଣ୍ଟର ଏକ ଭଲ ଉତ୍ସ । ଏଥିରେ ହୃଦୟ ସ୍ବାସ୍ଥ୍ୟ ପାଇଁ ଆବଶ୍ୟକ ମିନେରାଲ ଯଥା-ମ୍ୟାଗ୍ନେସିୟମ, ପୋଟାସିୟମ ଓ କ୍ୟାଲସିୟମ ରହିଛି । ଏସବୁ ବ୍ଲଡପ୍ରେସର ନିୟନ୍ତ୍ରଣ କରି ଏବଂ କୋଲେଷ୍ଟ୍ରଲ ସ୍ତର କମାଇ ହୃଦୟକୁ ସୁସ୍ଥ ରଖିବାରେ ସାହାଯ୍ୟ କରେ । ସେହିପରି ଏଥିରେ ଭିଟାମିନ-ସି, ଇ, ଜିଙ୍କ, କାଟେଚିନ୍, ଏପିକାଟେଚିନ ଥିବାବେଳେ ଶରୀରର ଇମ୍ୟୁନିଟି ସିଷ୍ଟମ ମଜଭୁତ କରିବାରେ ସହାୟକ ହୁଏ । ମଧୁମେହ ବା ଡାଇବେଟିସ ରୋଗୀ ଗ୍ରୀନ ମଟର ଖାଇବା ଭଲ । ଏହା ବ୍ଲଡସୁଗାର ପରିଚାଳନାରେ ପ୍ରଭାବଶାଳୀ । ଏହାର ଗ୍ଲାଇସେମିକ ଇଣ୍ଡେକ୍ସ  କମ୍ ଥିବାରୁ ହଠାତ୍ ବ୍ଲଡସୁଗାର ସ୍ତର ବୃଦ୍ଧି ପାଏନି ।  ଏଥିସହ ହାଇ ଫାଇବର ମଧ୍ୟ କାର୍ବସ୍ ଅବଶୋଷଣକୁ ମନ୍ଥର କରି ବ୍ଲଡସୁଗାର କଣ୍ଟ୍ରୋଲ କରିବାରେ ସାହାଯ୍ୟ କରେ। ଏହି ଶୀତ ଦିନିଆ ପରିବାରେ ଥିବା ଡାଏଟାରୀ ଫାଇବର ପାଚନ ସମ୍ବନ୍ଧୀୟ ସମସ୍ୟା ଯେମିତିକି କୋଷ୍ଠକାଠିନ୍ୟ, ପେଟ ଫୁଲିବା ଓ ଅନ୍ୟାନ୍ୟ ସମସ୍ୟାକୁ ରୋକିଥାଏ ।