ନୂଆଦିଲ୍ଲୀ,୪।୭: ଉତ୍ତର ପ୍ରଦେଶର ହାଥରସ୍ ଦଳଚକଟା ଘଟଣାରେ ଏପର୍ଯ୍ୟନ୍ତ ୧୨୧ ଜଣଙ୍କର ମୃତ୍ୟୁ ହୋଇସାରିଛି। ଏବେ ଏହି ମାମଲାରେ ପୋଲିସ ୨୦ ଜଣ ସେବକଙ୍କୁ ଗିରଫ କରିଛି। ଏବେ ସେମାନଙ୍କୁ ପଚରା ଉଚରା କରାଯାଉଛି।ମାମଲାର ତଦନ୍ତ ପାଇଁ ପୁଲିସ ୭ଟି ଟିମ୍ ଗଠନ କରିଛି।ଏହି ଟିମ୍ ଏବେ ନାରାୟଣ ହରି ଓରଫ ଭୋଲେ ବାବାଙ୍କ ମୁଖ୍ୟ ସେବାଦାର ବେଦପ୍ରକାଶ ମଧୁକରଙ୍କୁ ଖୋଜୁଛି। ସେ ବର୍ତ୍ତମାନ ଫେରାର ଅଛନ୍ତି।
ଉତ୍ତର ପ୍ରଦେଶ ମୁଖ୍ୟମନ୍ତ୍ରୀଙ୍କ ନିର୍ଦେଶରେ ଗୃହ ବିଭାଗ ବୁଧବାର ରାତିରେ ଆହ୍ଲାବାଦ ହାଇକୋର୍ଟର ଅବସରପ୍ରାପ୍ତ ବିଚାରପତି ଜଷ୍ଟିସ୍ ବ୍ରଜେଶ କୁମାର ଶ୍ରୀବାସ୍ତବ ଦ୍ବିତୀୟଙ୍କ ଅଧ୍ୟକ୍ଷତାରେ ତଦନ୍ତ କମିଟି ଗଠନ କରିଛି। ଆୟୋଗର ମୁଖ୍ୟାଳୟ ଲକ୍ଷ୍ନୌରେ ରହିବ। ଆୟୋଗକୁ ଦୁଇ ମାସରେ ନିଜର ଯାଞ୍ଚ ଶେଷ କରିବାକୁ ହେବ।
ଉଲ୍ଲେଖନୀୟ ଯେ, ମଙ୍ଗଳବାର ହାଥରସ୍ ଫୁଲୁରୀ ଗାଁରେ ମାନବ ମଙ୍ଗଳ ମିଳନ ସଦଭାବନା ସମାଗମ କମିଟି ପକ୍ଷରୁ ବିଶ୍ୱହରି ବାବା ଓରଫ ଭୋଲେ ବାବାଙ୍କ ସତସଙ୍ଗ କାର୍ଯ୍ୟକ୍ରମ ଆୟୋଜିତ ହୋଇଥିଲା। ଏଥିରେ ହଜାର ହଜାର ସଂଖ୍ୟାରେ ଲୋକ ଅଂଶଗ୍ରହଣ କରିଥିଲେ। ତେବେ ସତସଙ୍ଗ ସରିବା ପରେ ଦଳଚକଟା ସ୍ଥିତି ଉପୁଜିଥିଲା। ବର୍ତ୍ତମାନ ସୁଦ୍ଧା ୧୨୧ ଜଣଙ୍କ ମୃତ୍ୟୁ ହୋଇଛି।