ମୁମ୍ବାଇ,୬।୭:  ଟି-୨୦ ବିଶ୍ବକପ୍ ଜିତିଥିବା ଭାରତୀୟ ଟିମ୍‌କୁ ୧୧ କୋଟି ଟଙ୍କାର ପୁରସ୍କାର ଦେବାକୁ ଏକନାଥ ସିନ୍ଦେଙ୍କ ସରକାରଙ୍କ ଘୋଷଣା କରିଛନ୍ତି। ଏହାକୁ ନେଇ ମହାରାଷ୍ଟ୍ରରେ ବିରୋଧି ଦଳ କଂଗ୍ରେସ ସରକାରଙ୍କ ଉପରେ ପ୍ରଶ୍ନ ଉଠାଇ ଅଭିଯୋଗ କରିଛନ୍ତି ଯେ, ଏଭଳି କରି ସରକାର ନିଜକୁ ପ୍ରଶଂସା କରିବାକୁ ଚାହାନ୍ତି। ବିରୋଧି ଦଳର କହିବା ଅନୁସାରେ, ଆମେ କ୍ରିକେଟରଙ୍କ ସଫଳତାକୁ ନେଇ ଗର୍ବିତ, କିନ୍ତୁ ରାଜକୋଷରୁ ୧୧ କୋଟି ଟଙ୍କା ଦେବାର ଦରକାର ନାହିଁ। ମୁଖ୍ୟମନ୍ତ୍ରୀ ଏହି ଟଙ୍କା ନିଜ ପକେଟ୍‌ରୁ ଦେବା ଉଚିତ । ବିଜେପି ବିଧାୟକ ପ୍ରବୀଣ ଦରେକର କଂଗ୍ରେସ ଉପରେ ପାଲଟା ଆକ୍ରମଣ କରି ଏହି ପ୍ରସଙ୍ଗକୁ ରାଜନୀତିକରଣ କରିବାର ଅଭିଯୋଗ କରିଛନ୍ତି। 

ମହାରାଷ୍ଟ୍ରର ମୁଖ୍ୟମନ୍ତ୍ରୀ ଏକନାଥ ସିନ୍ଦେ ଶୁକ୍ରବାର ଭାରତୀୟ କ୍ରିକେଟ ଟିମ୍ ପାଇଁ ୧ ୧ କୋଟି ଟଙ୍କାର ନଗଦ  ପୁରସ୍କାର ଘୋଷଣା କରିଛନ୍ତି। ଏହି ଘୋଷଣା ବିଧାନ ଭବନରେ କରାଯାଇଥିଲା, ଯେଉଁଠି ଟିମ୍‌ ମୁମ୍ବାଇର ଚାରି ଖେଳାଳି କ୍ୟାପଟେନ୍ ରୋହିତ ଶର୍ମା, ସୂର୍ଯ୍ୟକୁମାର ଯାଦବ, ଯଶସ୍ତ୍ରୀ ଜାୟସଓ୍ବାଲ ଓ ଶିବମ ଦୁବେଙ୍କୁ ସମ୍ମାନିତ କରାଯାଇଥିଲା। ପରେ ସାମ୍ବାଦିକଙ୍କ ସହ ଆଲୋଚନା ବେଳେ ରାଜ୍ୟ ବିଧାନସଭା ବିରୋଧି ଦଳ ନେତା ବିଜୟ ଭଡେଟିଓ୍ବାର କହିଛନ୍ତି, ରାଜକୋଷରୁ ୧୧ କୋଟି ଟଙ୍କା ଦେବା କ’ଣ ଦରକାର ଥିଲା ? ରାଜକୋଷ ଖାଲି କରି, ଗରିବଙ୍କୁ ମରିବାକୁ ଛାଡିଦେଲେ। ଏଭଳି କରି ସରକାର ନିଜର ପିଠି ନିଜେ ଥାପୁଡେଇବାକୁ ଚାହାନ୍ତି।