ଦଶରଥପୁର, ୨୨।୦୫: କୁଆଖିଆ-କଁୟାଗୋଲା ୨୦ ନଂ ଜାତୀୟ ରାଜପଥ ସମ୍ପ୍ରସାରଣ କାର୍ଯ୍ୟରେ ନିୟୋଜିତ ଜଣେ ଶ୍ରମିକଙ୍କ ଝୁଲନ୍ତା ମୃତଦେହ ଉଦ୍ଧାର ହୋଇଛି । ଦଶରଥପୁର ଥାନା ଅନ୍ତର୍ଗତ ଇଜାପୁର ପଞ୍ଚାୟତ କଳିଙ୍ଗପୁର ଠାକୁରମୁଣ୍ଡା ସାହିରେ ସେ ଏକ ଭଡ଼ା ଘରେ ରହୁଥିଲେ । ମୃତ ଶ୍ରମିକ ଜଣକ କେନ୍ଦ୍ରାପଡ଼ା ଜିଲ୍ଳା ସୁବଳ ଗାଁର ଅଭୟ ପରିଡ଼ାଙ୍କ ୩୦ ବର୍ଷୀୟ ପୁଅ ମନୋରଞ୍ଜନ ପରିଡ଼ାବୋଲି ସୂଚନା ।
ଏନେଇ ଖବର ପାଇବା ପରେ ଦଶରଥପୁର ଥାନା ପୁଲିସ ମୃତଦେହକୁ ଜବଦ କରିବା ସହ ବ୍ୟବଚ୍ଛେଦ ପାଇଁ ଜିଲ୍ଲା ମୁଖ୍ୟ ଚିକିତ୍ସାଳୟକୁ ପଠାଇଛି । ଏଥି ସହିତ ଉକ୍ତ ଭଡ଼ା ଘରେ ରହୁଥିବା ମୃତ ଶ୍ରମିକଙ୍କ ୩ ଜଣ ସାଥୀଙ୍କୁ ମଧ୍ୟ ଥାନାରେ ଅଟକ ରଖାଯାଇଛି । ପୁଅକୁ ଯୋଜନା ବଦ୍ଧ ଭାବେ ହତ୍ୟା କରାଯାଇଥିବା ବାପା ଅଭୟ ପରିଡ଼ା ଦଶରଥପୁର ଥାନାରେ ଲିଖିତ ଅଭିଯୋଗ କରିଛନ୍ତି । ଅଭିଯୋଗ ଆଧାରରେ ଦଶରଥପୁର ପୁଲିସ ମାମଲାର ତଦନ୍ତ ଆରମ୍ଭ କରିଥିବା ଦଶରଥପୁର ଥାନାଧିକାରୀ ଶରତ ନାୟକ ସୂଚନା ଦେଇଛନ୍ତି ।
