ଭୁବନେଶ୍ୱର,୧୨/୦୯: ସରକାରୀ ଅଧିକାରୀ କେତେ ସମ୍ପତ୍ତିର ମାଲିକ । ତାର ହିସାବ ରାଜ୍ୟ ସରକାର ମାଗିଥିଲେ । ହେଲେ ଏହାକୁ ଫୁରେ ଉଡାଇ ଦେଇଥିଲେ ବାବୁ । ୨ ଥର ଧାର୍ଯ୍ୟ ସମୟ ଗଡିବା ପରେ ଏଥର ସରକାର କଠୋର ହୋଇଛନ୍ତି । ନିର୍ଦ୍ଦେଶନାମା ଜାରି କରାଯାଇଛି । କୁହାଯାଇଛି, ଏଥର ଶେଷ ସୁଯୋଗ । ନଭେମ୍ବର ମାସ ଶେଷ ସୁଦ୍ଧା ଯଦି ଏଚ୍ଆରଏମ୍ସି ପୋର୍ଟଲରେ ସରକାରୀ ଅଧିକାରୀ ଓ କର୍ମଚାରୀ ନିଜର ସମ୍ପତ୍ତି ତାଲିକା ଦାଖଲ ନ କରନ୍ତି, ତାହାଲେ କଡା କାର୍ଯ୍ୟାନୁଷ୍ଠାନ ନିଆଯିବ ।
ସାଧାରଣ ପ୍ରଶାସନ ବିଭାଗ ପକ୍ଷରୁ ଏକ ନିର୍ଦ୍ଦେଶ ନାମା ଜାରି କରାଯାଇଥିଲା । ରାଜ୍ୟ ସରକାରଙ୍କ ନିୟମ ଅନୁସାରେ ଗ୍ରୁପ-ଏ ରୁ ଗ୍ରୁପ-ଡି ସବୁ କର୍ମଚାରୀ ଏଚ୍ଏମ୍ ଆରସି ପୋର୍ଟାଲରେ ସେମାନଙ୍କ ସମ୍ପତ୍ତି ତାଲିକା ଦାଖଲ କରିବେ । ସବୁ ସ୍ଥାବର ଓ ଅସ୍ଥାବର ସମ୍ପତି ତାଲିକା ଦେବାକୁ କୁହାଯାଇଥିଲା । ୨୦୨୩ ଜାନୁଆରୀରୁ ଡିସେମ୍ବର ୩୧ ତାରିଖ ସୁଦ୍ଧା ସମ୍ପତ୍ତି ତାଲିକା ଦେବାକୁ ଏଥିରେ ଉଲ୍ଲେଖ ଥିଲା । ଜାନୁଆରୀ ମାସ ଶେଷ ସୁଦ୍ଧା ଦେବାକୁ ଧାର୍ଯ୍ୟ ହୋଇଥିଲା । ହେଲେ କେହି ଦାଖଲ ନ କରିବାକୁ ଏହାକୁ ଫେବୃଆରୀ ମାସ ୨୯ ଓ ପରେ ମାର୍ଚ୍ଚ ୧୬ ତାରିଖ ପର୍ଯ୍ୟନ୍ତ ବଢାଇଥିଲେ । ତେଣୁ ଏବେ ସୁଦ୍ଧା ମାତ୍ର କିଛି ଜଣଙ୍କୁ ଛାଡିଲେ ଅଧିକାଂଶ ଅଧିକାରୀ ଦାଖଲ କରିନାହାନ୍ତି । ନୂଆ ସରକାର ଆସିବା ପରେ ଏବେ ସିଧା ଅଧିକାରୀଙ୍କୁ ଟାର୍ଗେଟ କରାଯାଇଛି । ନଭେମ୍ବର ସୁଦ୍ଧା ତାଲିକା ଦାଖଲ କରିବାକୁ ଶେଷ ତାରିଖ ରହିଛି।
