ଭୁବନେଶ୍ୱର,୧୫/୦୧ : ବିଏମ୍ସି କର୍ପୋରେସନ ବୈଠକ ଆଜି ଅନୁଷ୍ଠିତ ହେବ । ଏଥର ବୈଠକରେ ଅନେକ ଗୁଡ଼ିଏ ପ୍ରସଙ୍ଗ ଉଠିବ । ୮୫୦ କୋଟି ଟଙ୍କାର ଚିଠା ବଜେଟ୍ ଉପସ୍ଥାପନା ହେବା ସହିତ ରାଜଧାନୀରେ ମଶାଙ୍କ ପ୍ରାଦୁର୍ଭାବକୁ ନେଇ ଶାସକବିରୋଧୀ କର୍ପୋରେଟର ତମ୍ବିତୋଫାନ କରିବାକୁ ଏଜେଣ୍ଡା ପ୍ରସ୍ତୁତ କରିଛନ୍ତି । ସହର ସାରା ଭଣ ଭଣ ମଶା । ସନ୍ଧ୍ୟା କଥା ଛାଡ଼, ଦିନରେ ବସେଇ ଦେଉ ନାହାନ୍ତି । ମଶାଙ୍କ ଦାଉରୁ ଲୋକେ ଅତିଷ୍ଟ ହେଲେଣି । ଗାଡ଼ି ବୁଲୁନି । ମଶା ଧୂଆଁ କାଟୁ କରୁନି । ୱାର୍ଡବାସୀ ବାରମ୍ବାର ଦାବି କରୁଛନ୍ତି । ଏହି ପ୍ରସଙ୍ଗ ଉଠାଇ ମେୟରଙ୍କୁ କିଛି କର୍ପୋରେଟର ଘେରିବାକୁ ଯୋଜନା କରିଛନ୍ତି । ବର୍ତ୍ତମାନ ବିଏମ୍ସିରେ ମାତ୍ର ୨୦ଟି ମଶା ଗାଡ଼ି ଅଛି । ଏହି ସବୁ ଗାଡ଼ି ମଶା ଧୂଆଁ ପାଇଁ ଯଥେଷ୍ଟ ନୁହେଁ । ତେଣୁ ଅନେକ ଅଞ୍ଚଳରେ ମଶା ଧୂଆଁ ଦିଆଯାଇ ପାରୁନି । ଏହାର ସ୍ଥାୟୀ ନିରାକରଣ ପାଇଁ ଆଲୋଚନା ହେବ ।
ଏହା ସହ ଗୋଲ୍ଡ ଫଗ୍ ଯୋଜନାରେ ମଶା ମରା ରଣନୀତି ପାଇଁ ପ୍ରସ୍ତୁତି ସମ୍ପର୍କରେ ଆଲୋଚନା ହେବ । ବୈଠକରେ ଟେଣ୍ଡର ପ୍ରସଙ୍ଗ ଉଠିବ । ଏକାଧିକ ୱାର୍ଡରେ କାର୍ଯ୍ୟାଦେଶ ବଣ୍ଟା ଯାଉନି । ଏଥିରେ ନଗରଯନ୍ତ୍ରୀଙ୍କ ହାତ ଥିବା ନେଇ କର୍ପୋରେଟର ଅଭିଯୋଗ କରିଛନ୍ତି । ତେଣୁ ନଗରଯନ୍ତ୍ରୀଙ୍କୁ ବଦଳି କରିବାକୁ କିଛି କର୍ପୋରେଟର ଅଡ଼ି ବସିବେ । ଏହା ସହ ବିଏମ୍ସି ଗାଡ଼ି ଟେଣ୍ଡର ବିବାଦ ପ୍ରସଙ୍ଗ ମଧ୍ୟ ଉଠିବାର ସମ୍ଭାବନା ରହିଛି ।
ଅଧିକ ପଢନ୍ତୁ-ବଢିବ ଶୀତ, ୨ରୁ ୩ ଡିଗ୍ରୀ ଖସିବ ରାତି ତାପମାତ୍ରା
ପ୍ରବାସୀ ଭାରତାୟ ସମୟରେ ୱାର୍ଡର ସୌନ୍ଦର୍ଯ୍ୟକରଣ କରାଯାଇଥିଲା । ଏହା ସହ ସିଟି ଆକ୍ଟିଭେସନ କାର୍ଯ୍ୟକ୍ରମ ହୋଇଥିଲା । ଏଥିରେ ପୁଳା ପୁଳା ଟଙ୍କା ଖର୍ଚ୍ଚ ହୋଇଛି । ଏହି ଟଙ୍କାର ହିସାବ କର୍ପୋରେସନ ବୈଠରେ କିଛି କର୍ପୋରେଟର ମାଗିବେ ବୋଲି ଜଣାପଡ଼ିଛି । ବୈଠକ ବେଶ ସରଗରମ ହେବ । ବିଜେଡିର କିଛି କର୍ପୋରେଟର ପଳାଶୁଣି ଫୁଟ୍ ଓଭରବ୍ରିଜ୍ ପ୍ରସଙ୍ଗ ଉଠାଇବେ । ପ୍ରତି ମାସରେ ଏଠାରେ ଦୁର୍ଘଟଣା ଘଟୁଛି । ଏନ୍ଏଚ୍ଏଆଇ ପକ୍ଷର ଓଭରବ୍ରିଜ ନିର୍ମାଣ କରଯାଉନି । ତେଣୁ ଡବଲ ଇଞ୍ଜିନ ସରକାର ଏହା ଉପରେ ଧ୍ୟାନ ଦେବାକୁ ଦାବି କରିବେ ବୋଲି ଜଣାପଡ଼ିଛି । ବୈଠକରେ ଭୁବନେଶ୍ୱର ସାଂସଦ ଅପରାଜିତ ଷଡ଼ଙ୍ଗୀ ଯୋଗ ଦେବାର କାର୍ଯ୍ୟକ୍ରମ ରହିଛି । ଏହା ସହ ବିଜେଡିର ୩ ଏବଂ ବିଜେପି ବିଧାୟକ ବାବୁ ସିଂ ଉପସ୍ଥିତ ରହିବେ ।
