ଅନୁଗୁଳ,୨୮/୩ : ସରକାରୀ ଅନୁମୋଦନ ମିଳିନଥିଲା, କି ବିଧିବଦ୍ଧ ଭାବେ ଚିଠି ମଧ୍ୟ ଆସିନଥିଲା। ମୌଖିକ ନିର୍ଦ୍ଦେଶରେ ଆରମ୍ଭ କରିଦେଲେ ପ୍ରକଳ୍ପ । ଗୋଟିଏ କି ଦୁଇଟି ନୁହଁ, ୫ଟି ସ୍ଥାନରେ ଯୁଦ୍ଧକାଳୀନ ଭିତ୍ତିରେ ପ୍ରକଳ୍ପ କାର୍ଯ୍ୟ ଆରମ୍ଭ ହେଲା। ମାତ୍ର ସରକାର ପ୍ରକଳ୍ପ ପାଇଁ ପାଣ୍ଠି ଦେଲେନି। ଫଳରେ ଅଧାରୁ ଠପ୍ ହୋଇଗଲା କାମ। ଅନୁଗୁଳ ପୌରାଞ୍ଚଳରେ ଅଧପନ୍ତରିଆ ଅବସ୍ଥାରେ ପ଼ଡିଥିବା ୱାର୍ଡ ଅଫିସ୍ର ସ୍ଥିତି ଏମିତି। ଦୁଇ ବର୍ଷ ହେଲା ବାଟବଣା ହୋଇଥିବା ଏହି ଯୋଜନା ବାଟ ଖୋଜୁଛି। କୋଠା ନିର୍ମାଣ କରିଥିବା ଠିକାଦାର ଟଙ୍କାଟିଏ ନପାଇ ପ୍ରମାଦ ଗଣୁଥିବା ବେଳେ ଅଧଖଣ୍ଡିଆ ହୋଇ ପଡ଼ିଥିବା ପ୍ରକଳ୍ପ ସବୁ ନିଜସ୍ୱ ପାଣ୍ଠିରେ ନିର୍ମାଣ ସାରିବାକୁ ପୌରପାଳିକା ନିଷ୍ପତ୍ତି ନେଇଛି । ୱାର୍ଡ୍ ସମସ୍ୟା ସମାଧାନ ହେବ ୱାର୍ଡ୍ରେ । ପୌର କାର୍ଯ୍ୟାଳୟକୁ ଧାଇଁବାକୁ ପଡ଼ିବନି କି ଆପତ୍ତି ଅଭିଯୋଗ କରିବାକୁ ଲମ୍ବା ଲାଇନ୍ରେ ବି ଛିଡ଼ା ହେବାକୁ ପଡିବନି । ଲୋକଙ୍କ ପାଖକୁ ଯିବ ପ୍ରଶାସନ। ପ୍ରତି ୱାର୍ଡରେ ଖୋଲିବ ୱାର୍ଡ ଅଫିସ୍। ଏଭଳି ମହତ୍ ଉଦ୍ଦେଶ୍ୟ ରଖି ୨୦୧୯ ମସିହାରେ ପ୍ରକଳ୍ପ କାର୍ଯ୍ୟ ଆରମ୍ଭ କରିଥିଲେ ରାଜ୍ୟ ସରକାର। ମାତ୍ର ପ୍ରତି ୱାର୍ଡରେ ପୌରପାଳିକାର ନିଜସ୍ୱ କୋଠା ନଥିବାରୁ ଏହି ଯୋଜନା ବିଫଳ ହୋଇଥିଲା। ୨୦୨୩ରେ ପୁଣିଥରେ ଏହି ଯୋଜନା କାର୍ଯ୍ୟକାରୀ କରିବାକୁ ସରକାର ନିଷ୍ପତ୍ତି ନେଇଥିଲେ।
ପ୍ରତି ୱାର୍ଡ୍ରେ ସ୍ୱତନ୍ତ୍ର ୱାର୍ଡ୍ ଅଫିସ୍ ନିର୍ମାଣ କରିବା ସହିତ ଏସ୍ଏଚ୍ଜି ସଦସ୍ୟାଙ୍କୁ ଏହାକୁ ପରିଚାଳନା କରିବାକୁ ଯୋଜନା କରିଥିଲେ। ବୈଠକରେ ଏହା ନିଷ୍ପତ୍ତି ହୋଇଥିଲେ ହେଁ ସରକାରୀ ଅନୁମୋଦନ ପାଇନଥିଲା। ଏହି ପ୍ରକଳ୍ପ ଆରମ୍ଭ କରିବାକୁ କୌଣସି ବିଧିବଦ୍ଧ ଚିଠି କି ପାଣ୍ଠି ଆସିନଥିଲେ ସୁଦ୍ଧା ଅନୁଗୁଳ ପୌରପାଳିକା ଆଗଚଲା ସାଜିଥିଲା। ବିନା ମଞ୍ଜୁରିରେ ବିଭିନ୍ନ ୱାର୍ଡ୍ରେ ଠିକାଦାର ଲଗାଇ ୱାର୍ଡ୍ ଅଫିସ୍ ନିର୍ମାଣ କରିଥିଲା। ଅନୁଗୁଳ ପୌରଞ୍ଚଳର ଅମଲାପଡ଼ା, ବ୍ରାହ୍ମଣୀଦେଈପଡା, କଳିଙ୍ଗ ମାର୍କେଟ୍, ହେମସୁରପଡାରେ ୫ଟି ୱାର୍ଡ୍ ଅଫିସ୍ ନିର୍ମାଣ ହୋଇଛି । କେଉଁଠି ଛାତ ପଡି ପଲସ୍ତରା ହୋଇନାହିଁ ତ ଆଉ କେଉଁଠି ତାଜା ପର୍ଯ୍ୟନ୍ତ କାମ ହୋଇଛି। ଟଙ୍କା ନମିଳିବାରୁ ୨ ବର୍ଷ ହେଲା କାମ ଆଗଉନି । ଅର୍ଦ୍ଧନିର୍ମିତ ଘରଗୁଡ଼ିକ ପରିତ୍ୟକ୍ତ ହୋଇପଡିଛି। କେଉଁଠି ଠିକାଦାର ତାଲା ପକାଇ ରଖିଛନ୍ତି ତ ଆଉ କେଉଁଠି ଅସାମାଜିକଙ୍କ ଆଡ୍ଡା ଜମୁଛି । ବିନା ଅନୁମୋଦନରେ କେବଳ କୋଠା ନିର୍ମାଣ କରାଯାଇନଥିଲା, ଏହାର ପରିଚାଳନା ପାଇଁ ୱାର୍ଡ୍ କୋର୍ଡିନେଟର ମଧ୍ୟ ଚୟନ କରାଯାଇଥିଲା । ଗୋଟିଏ ପଟେ ୱାର୍ଡ୍ ଅଫିସ୍ର ଭାଗ୍ୟ ଅନ୍ଧାରରେ ରହିଥିବା ବେଳେ ୱାର୍ଡ୍ କୋର୍ଡିନେଟରଙ୍କ ନିଯୁକ୍ତି ଅନିଶ୍ଚିତତା ମଧ୍ୟରେ ରହିଛି ।
ତେବେ ସହର ମଧ୍ୟରେ ଏହି ଅଧାଗଢ଼ା କୋଠାର ଭବିଷ୍ୟତ ନେଇ ସାଧାରଣରେ ପ୍ରଶ୍ନ ଉଠିବା ପରେ ପୌରପାଳିକାର ନିଦ ଭାଙ୍ଗିଛି । ୱାର୍ଡ୍ ଅଫିସ୍କୁ ନଷ୍ଟ ନକରି ନିଜସ୍ୱ ପାଣ୍ଠିରୁ କାର୍ଯ୍ୟକ୍ଷମ କରିବାକୁ ପୌର ପାରିଷଦ ବୈଠକରେ ନିଷ୍ପତ୍ତି ହୋଇଛି । ଏ ସଂକ୍ରାନ୍ତରେ ପୌରପାଳିକାର ଜଣେ ବରିଷ୍ଠ ଅଧିକାରୀ କହିଛନ୍ତି, ୱାର୍ଡ୍ ଅଫିସ୍ ନିର୍ମାଣ ନେଇ ସରକାରଙ୍କ ପାଖରୁ କୌଣସି ପ୍ରକଳ୍ପ ଆସିନାହିଁ । ପ୍ରତି ୱାର୍ଡ୍ରେ ୱାର୍ଡ୍ ଅଫିସ୍ ହେବା ନେଇ କେବଳ ମୌଖିକ ଭାବେ କୁହାଯାଉଥିବା ବେଳେ ଯୋଜନା ଆସିବ ଭାବି ପୌରପାଳିକା ପକ୍ଷରୁ ୫ଟି ସ୍ଥାନରେ ଅଫିସ୍ ନିର୍ମାଣ କରାଯାଇଥିଲା । ଯେହେତୁ କୌଣସି ପ୍ରକଳ୍ପ ଆସିଲା ନାହିଁ, ନିର୍ମାଣକୁ ବନ୍ଦ କରିଦିଆଯାଇଛି । ପ୍ରକଳ୍ପଗୁଡ଼କ ଆରମ୍ଭ ହୋଇଥିବାରୁ ନିଜସ୍ୱ ପାଣ୍ଠିରୁ ନିର୍ମାଣ ଶେଷ କରି କାର୍ଯ୍ୟକ୍ଷମ କରାଯିବ ବୋଲି ସେ ପ୍ରକାଶ କରିଛନ୍ତି ।
