ଜୟପୁର,୦୨/୧୧: ଶନିବାର ୧୨ ଘଣ୍ଟା ପାଇଁ ଜୟପୁର ସହରର ବଜାର ବନ୍ଦ ପାଳନ କାରଯାଉଛି । ଏଥିରେ ଛୋଟ ଦୋକାନ ଠାରୁ ଆରମ୍ଭ କରି ବଡ ବଡ ବ୍ୟବସାୟୀକ ପ୍ରତିଷ୍ଠାନ ସାମିଲ ହୋଇଛନ୍ତି । ଜୟପୁର ଚାମ୍ବର ଅଫ୍ କମର୍ସ ଏହି ବନ୍ଦ ଡାକରା ଦେଇଛି । ସକାଳ ୬ଟାରୁ ଆରମ୍ଭ ହୋଇ ସଂଧ୍ୟା ୬ଟା ପର୍ଯ୍ୟନ୍ତ ଏହି ବନ୍ଦ ପାଳନ କରାଯିବ । ଗତ ୨୯ ତାରିଖ ଦିନ ସହରର ମୁଖ୍ୟ ରାସ୍ତା କଡରେ ଥିବା ନ୍ୟୁ ବାସବୀ ଜ୍ବେଲର୍ସ ଦୋକାନ ଉପରେ ଜିଏସଟି ବିଭାଗ ତରଫରୁ ଚଢାଉ କରାଯାଇଥିଲା । ସେହି ସମୟରେ ହିଁ ଦୋକାନର ମାଲିକ ପେଣ୍ଟା ହର ପ୍ରସାଦ ଅସୁସ୍ଥତା ଅନୁଭବ କରିଥିଲେ । ପରିବାର ଲୋକ ତାଙ୍କୁ ସ୍ଥାନୀୟ ଏକ ଘରୋଇ ଡାକ୍ତରଖାନାରେ ଭର୍ତ୍ତି କରିଥିଲେ । ଶୁକ୍ରବାର ତାଙ୍କର ମୃତ୍ୟୁ ହୋଇଛି । ମୃତ୍ୟୁ ବେଳକୁ ତାଙ୍କୁ ମାତ୍ର ୪୨ ବର୍ଷ ବୟସ ହୋଇଥିଲା । ଏହି ମୃତ୍ୟୁ ପଛରେ ପରିବାର ଲୋକ ଓ ଜୟପୁର ଚାମ୍ବର ଅଫ୍ କମର୍ସ ଜିଏସଟି ବିଭାଗକୁ ଦାୟୀ କରିଛନ୍ତି ।
ଜଏସ୍ଟି ଚଢ଼ଉ ପରେ ସ୍ଥାନୀୟ ନ୍ୟୁ ବାସ୍ବୀ ଜୁଏଲର୍ସର ମାଲିକ ପି. ହରିପ୍ରସାଦଙ୍କ ହୃଦ୍ଘାତରେ ଦେହାନ୍ତ ହୋଇଯାଇଛି । ଗୁରୁତର ଅବସ୍ଥାରେ ତାଙ୍କୁ ପୂର୍ବାହ୍ନରେ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା । ସେଠାରେ ଡାକ୍ତର ମୃତ ଘୋଷଣା କରିଥିଲେ । ଜିଏସ୍ଟି ଚଢ଼ଉ ପରେ ସେ ମାନସିକ ଚାପରେ ରହିଥିଲେ ବୋଲି ପରିବାର ପକ୍ଷରୁ ଅଭିଯୋଗ ହୋଇଛି । ସମାନ ଅଭିଯୋଗ ଆଣିଛି ଚାମ୍ବର ଅଫ୍ କମର୍ସ । ଶନିବାର ସକାଳ ୬ରୁ ସନ୍ଧ୍ୟା ୬ଟା ପର୍ଯ୍ୟନ୍ତ ସହରର ସମସ୍ତ ବ୍ୟବସାୟ ପ୍ରତିଷ୍ଠାନ ବନ୍ଦ ରଖିବା ଲାଗି ନିଷ୍ପତ୍ତି ନେଇଛି । ଆଜି ସ୍ଥାନୀୟ ଏକ କଲ୍ୟାଣ ମଣ୍ଡପରେ ଆୟୋଜିତ ସାମ୍ବାଦିକ ସମ୍ମିଳନୀରେ ଚାମ୍ବର ଅଫ୍ କମର୍ସର ସଭାପତି ଭି. ପ୍ରଭାକର, ସମ୍ପାଦକ ଡି. ମାଧବା, ଉପସଭାପତି ଆର୍. ଶ୍ରୀନିବାସ ରାଓ ଓ ନରି ବେହେରା ପ୍ରମୁଖ ଯୋଗଦେଇ ଧନ୍ତେରସରେ ସୁନା ଅଳଙ୍କାର ଦୋକାନରେ ଜିଏସ୍ଟି ଚଢ଼ଉକୁ ନିନ୍ଦା କରିଛନ୍ତି ।
ସେମାନେ ଅଭିଯୋଗ କରିଛନ୍ତି ଯେ, ଗତ ୩ ବର୍ଷ ହେବ ବିଭାଗ ପକ୍ଷରୁ ଏଭଳି ହଇରାଣ କରାଯାଉଛି । ଜିଏସ୍ଟି ଯାଞ୍ଚ୍କୁ ବିରୋଧ କରାଯାଉନି । ଯେଉଁମାନେ କାଗଜପତ୍ର ଠିକ୍ ରଖୁନାହାନ୍ତି କିମ୍ବା ବ୍ୟବସାୟ ସମ୍ପର୍କରେ କୌଣସି ତଥ୍ୟ ଦେଉନାହାନ୍ତି, ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯାଉ । ଅଥଚ ବ୍ୟବସାୟ ଚାଲିଥିବା ସମୟରେ ଚଢ଼ଉ ନ କରାଯାଉ । ଧନତେରସ୍ ଦିନ ହରିପ୍ରସାଦଙ୍କ ଦୋକାନରେ ୫ରୁ ୬ ଘଣ୍ଟା ଧରି ଜିଏସ୍ଟି ଅଧିକାରୀ ଚଢ଼ଉ କରିଥିଲେ । ଏମିତିକି ତାଙ୍କ ଘରେ ପଶି ଟିକିନିଖି ଯାଞ୍ଚ୍ କରିଥିଲେ । ବ୍ୟବସାୟ ଚାଲିଥିବା ସମୟରେ ଏଭଳି ହଇରାଣ କରାଯାଇଥିବାରୁ ଚାପଗ୍ରସ୍ତ ଥିଲେ ହରି । ଏଥିଯୋଗୁ ହୃଦ୍ଘାତରେ ତାଙ୍କ ଦେହାନ୍ତ ହୋଇଗଲା । ସେ ଜଣେ ଦକ୍ଷ ଯୁବ ବ୍ୟବସାୟୀ ଥିଲେ । ଜିଏସ୍ଟି ଅଧିକାରୀମାନେ ଏଭଳି ହଇରାଣ କଲେ ଯୁବ ବ୍ୟବସାୟୀମାନେ ନିରୁତ୍ସାହିତ ହେବେ । ହରିପ୍ରସାଦଙ୍କ ମୃତ୍ୟୁର ପ୍ରତିବାଦରେ ଶନିବାର ସହରରେ ୧୨ ଘଣ୍ଟିଆ ଦୋକାନ ବଜାର ବନ୍ଦ ରଖାଯିବ । ପୂର୍ବାହ୍ନ ସାଢ଼େ ୧୦ଟାରେ ମୁଖ୍ୟରାସ୍ତାରେ ଥିବା ସ୍ୱର୍ଗତ ହରିପ୍ରସାଦଙ୍କ ବାସଭବନରୁ ଜିଏସ୍ଟି କାର୍ଯ୍ୟାଳୟ ପର୍ଯ୍ୟନ୍ତ ଶୋଭାଯାତ୍ରା ବାହାରିବ ।
