ଭୁବନେଶ୍ୱର ୨୨/୦୬: ବେଶ୍ କିଛିଦିନର ବ୍ୟବଧାନ ପରେ ପୁଣି ରକ୍ତ ରଞ୍ଜିତ ହୋଇଛି ରାଜଧାନୀ । ମଦ ନିଶାରେ ସାଙ୍ଗକୁ ଶାବଳରେ ପିଟି ଅତି ନିର୍ମମ ଭାବେ ହତ୍ୟା କରିଛି ସାଙ୍ଗ । ମୃତ ଯୁବକ ହେଲେ ଖୋର୍ଦ୍ଧା ପାଟପୁରର ସୁଶାନ୍ତ ଶତପଥୀ(୪୦) । ସେ ତମାଣ୍ଡୋ ଥାନା ଅନ୍ତର୍ଗତ ମହୁରାରେ ଜଣେ ଠିକାଦାରଙ୍କ ଅଫିସରେ ରହୁଥିଲେ । ସ୍ଥାନୀୟ ଅଞ୍ଚଳରେ ରୋଷେୟା ଭାବେ କାମ କରୁଥିଲେ । ହତ୍ୟାକାଣ୍ଡ ଭିଆଇ ଖସି ପଳାଉଥିବା ଶ୍ରମିକ ବୌଦ୍ଧର ରଞ୍ଜନ ଦୀପ୍(୨୭)କୁ ପୁଲିସ ଉଠାଇ ଆଣି ଥାନାରେ ଅଟକ ରଖିଛି ।
ଠିକାଦାର ତଥା ନଂପୁଟ ସରପଞ୍ଚଙ୍କ ସ୍ୱାମୀ ଆବୁଆ ଓରଫ କମ୍ଭୁପାଣି ପାତ୍ରଙ୍କ ଅଭିଯୋଗ ଆଧାରରେ ପୁଲିସ ଏକ ହତ୍ୟା ମାମଲା ରୁଜୁ କରିଛି । ଏମ୍ସ ହସ୍ପିଟାଲରେ ସୁଶାନ୍ତଙ୍କ ଶବ ବ୍ୟବଚ୍ଛେଦ କରାଇ ପୁଲିସ ତାଙ୍କ ପରିବାର ଲୋକଙ୍କୁ ହସ୍ତାନ୍ତର କରିଛି । ସୁଶାନ୍ତଙ୍କୁ ରଞ୍ଜନ କାହିଁକି ହତ୍ୟାକଲେ ସେ ନେଇ ପୁଲିସ ସ୍ପଷ୍ଟ କରିନାହି । ତେବେ ଯୌନନିର୍ଯାତନା ଯୋଗୁଁ ଉତ୍କ୍ଷୀପ୍ତ ହୋଇ ରଞ୍ଜନ ଶାବଳରେ ପିଟିପିଟି ସୁଶାନ୍ତଙ୍କୁ ହତ୍ୟା କରିଥିବା ଜଣେ ପୁଲିସ ଅଧିକାରୀ ନିଜ ନାମ ଗୋପନ ରଖି ସୂଚନା ଦେଇଛନ୍ତି ।
ଭୁବନେଶ୍ୱର ଡିସିପି ପ୍ରତୀକ ସିଂହଙ୍କ ସୂଚନା ମୁତାବକ, ଠିକାଦାର କମ୍ଭୁପାଣି ମହୁରାରେ ଥିବା ଏକ ଘରୋଇ ଇଞ୍ଜିନିୟରିଂ କଲେଜ ନିକଟରେ ୨ ମହଲା ବିଶିଷ୍ଟ ଅଫିସ କରିଛନ୍ତି । ତାଙ୍କର ଜଣେ କର୍ମଚାରୀଙ୍କ ଭାଇ ହେଉଛନ୍ତି ସୁଶାନ୍ତ । ସେ ବୁଲିବୁଲି ରୋଷେୟା ଭାବେ କାମ କରନ୍ତି । ସୁଶାନ୍ତ କମ୍ଭୁପାଣିଙ୍କ ଅଫିସର ଦ୍ୱିତୀୟ ମହଲାରେ ଆସି ରୁହନ୍ତି । ତାଙ୍କ ସହ କମ୍ଭୁପାଣିଙ୍କ ଠିକା ସଂସ୍ଥାରେ ଶ୍ରମିକଭାବେ କାମ କରୁଥିବା ରଞ୍ଜନ ମଧ୍ୟ ରହୁଥିଲା । ଦୁଇଜଣଙ୍କ ମଧ୍ୟରେ ଉତ୍ତମ ସଂପର୍କ ଥିଲା । ତଳ ମହଲାରେ ମଧ୍ୟ କିଛି ଲୋକ ରହୁଥିଲେ । ଶୁକ୍ରବାର ରାତିରେ ସୁଶାନ୍ତ ଓ ରଞ୍ଜନ ଛାତ ଉପରେ ଏକାଠି ମଦ ପିଇଥିଲେ । ବିଳମ୍ବିତ ରାତିରେ ଉଭୟଙ୍କ ମଧ୍ୟରେ ଉଚ୍ଚବାଚ୍ଚ ହୋଇଥିଲା। ଏହାକୁ ନେଇ ରଞ୍ଜନ ପାଖରେ ପଡ଼ିଥିବା ରଡ୍ ବାଇଡିଂରେ ବ୍ୟବହୃତ ଶାବଳରେ ସୁଶାନ୍ତଙ୍କ ମୁଣ୍ଡକୁ ଲଗାତର ୪ ଥର ପିଟି ଦେଇଥିଲା । ଫଳରେ ତାଙ୍କର ମୃତ୍ୟୁ ହୋଇ ଯାଇଥିଲା ।
ସୁଶାନ୍ତଙ୍କ ମୃତ୍ୟୁ ପରେ ପ୍ରମାଣ ନଷ୍ଟ କରିବା ପାଇଁ ରଞ୍ଜନ ପାରୁପର୍ଯ୍ୟନ୍ତ ଚେଷ୍ଟା କରିଥିଲା । ମୃତଦେହକୁ ପାଣିଟାଙ୍କି କଡରେ ଲୁଚାଇ ରଖିବା ସହ ଛାତ ଉପରେ ଛୁଟିଥିବା ରକ୍ତର ଧାରକୁ କପଡ଼ା ଆଣି ପୋଛିବାକୁ ଉଦ୍ୟମ କରିଥିଲା । ପାଖରେ ପଡ଼ିଥିବା ମଦ ବୋତଲ, ଗ୍ଲାସ୍ ଆଦିକୁ ଛାତ ତଳକୁ ଫିଙ୍ଗି ଦେଇଥିଲା । ତଳ ମହଲାକୁ ଆସି ଦେଖିବାବେଳକୁ ଗ୍ରୀଲ ବାହାର ପଟରୁ ତାଲା ପଡ଼ିଥିଲା । ତେଣୁ ସେ କିଛି ଉପାୟ ନପାଇ ପ୍ରଥମ ମହଲାର ବାଲକୋନୀରୁ ତଳକୁ ଡ଼େଇଁ ପଳାଇଥିଲା ।
ହତ୍ୟାକାଣ୍ଡ ସମୟରେ ଉକ୍ତ ଅଞ୍ଚଳରେ ବିଦ୍ୟୁତ୍ କାଟ୍ ହୋଇଥିଲା । ତଳ ମହଲାରେ ରହୁଥିବା ଜଣେ ବ୍ୟକ୍ତି ଦିଆସିଲି ଆଣିବାକୁ ମୋବାଇଲ ଟର୍ଚ୍ଚ ଲାଇଟ୍ ଲଗାଇ ସୁଶାନ୍ତଙ୍କ ପାଖକୁ ଯାଇଥିଲେ । ସୁଶାନ୍ତ ଦ୍ୱିତୀୟ ମହଲାରେ ନଥିବା ଓ ଛାତ ଉପର ଗେଟ୍ ଖୋଲା ଥିବାରୁ ସେ ଛାତ ଉପରକୁ ଯାଇଥିଲେ । ସୁଶାନ୍ତଙ୍କୁ ପାଇ ନଥିଲେ, ହେଲେ ଛାତ ଉପରେ ରକ୍ତ ଧାର ଦେଖି ସେ ସଙ୍ଗେ ସଙ୍ଗେ କମ୍ଭୁପାଣିଙ୍କୁ ଖବର ଦେଇଥିଲେ ।
କମ୍ଭୁପାଣିଙ୍କ ସମେତ ଗ୍ରାମର ଅନ୍ୟ ଯୁବକମାନେ ମଧ୍ୟ ତାଙ୍କ ସହ ଆସି ସେଠାରେ ପହଞ୍ଚିଥିଲେ । ଛାତ ଉପରେ ରକ୍ତର ଧାର ବହିଥିବା ଦେଖି ସେମାନେ ଚାରିପଟେ ଖୋଜାଖୋଜି କରିଥିଲେ । ଛାତ କୋଣରେ ଥିବା ପାଣିଟାଙ୍କି କଡ଼ରେ ସୁଶାନ୍ତଙ୍କ ରକ୍ତ ଜୁଡୁବୁଡୁ ମୃତଦେହ ଦେଖିବାକୁ ପାଇଥିଲେ । କମ୍ଭୁପାଣି ସଙ୍ଗେ ସଙ୍ଗେ ତମାଣ୍ଡୋ ଥାନା ପୁଲିସକୁ ଖବର ଦେଇଥିଲେ । ପୁଲିସ ପହଞ୍ଚି ମୃତଦେହ ଜବତ କରିଥିଲା । ପରେ ରଞ୍ଜନକୁ ଖୋଜାଖୋଜି କରିଥିଲେ । ରଞ୍ଜନ ଚାଲିଚାଲି ଖୋର୍ଦ୍ଧା ଅଭିମୁଖେ ଯାଉଥିବା ବେଳେ ଯାଁଳା ଓଗାଳପଡ଼ା ଫୁଟ୍ ଓଭରବ୍ରିଜ ନିକଟରୁ ତାକୁ ପୁଲିସ କାବୁ କରିଥିଲା ।
ରଞ୍ଜନ ସୁଶାନ୍ତଙ୍କୁ କାହିଁକି ହତ୍ୟା କଲେ ସେନେଇ ଜେରା କରିବାବେଳେ ମଦ ନିଶାରେ ସୁଶାନ୍ତ ତା ସହ ଅପ୍ରାକୃତିକ ଯୌନକ୍ରିୟା କରିବାରୁ ରାଗରେ ଶାବଳରେ ପିଟି ହତ୍ୟା କରିଥିବା କହିଛି ବୋଲି ଜଣେ ବରିଷ୍ଠ ଅଧିକାରୀ ସୂଚନା ଦେଇଛନ୍ତି । ତେବେ ହତ୍ୟାକାଣ୍ଡ ସଂପର୍କରେ ଡିସିପି ଶ୍ରୀ ସିଂହ କିଛି ସ୍ପଷ୍ଟ କରିନାହାନ୍ତି । ଘଟଣାର ତଦନ୍ତ ଜାରି ରହିଛି । ଖୁବ୍ ଶୀଘ୍ର ଏନେଇ ସୂଚନା ଦିଆଯିବ ବୋଲି ସେ କହିଛନ୍ତି ।
ଅଭିଯୁକ୍ତ ଜଣଙ୍କ ନାଁରେ ପୂର୍ବରୁ ୩ଟି ସଙ୍ଗୀନ ଅଭିଯୋଗ ରହିଛି । ୨୦୧୯ ମସିହାରେ ବୌଦ୍ଧ ପୁରୁଣା କଟକ ଥାନାରେ ଅଭିଯୁକ୍ତ ନାଁରେ ଦୁଷ୍କର୍ମ ଓ ହତ୍ୟା, ୨୦୧୬ ମସିହାରେ ବାପାଙ୍କୁ ଶାରୀରିକ ଅତ୍ୟାଚାର ଓ ୨୦୧୦ ମସିହାରେ ଅପହରଣ ଭଳି ସାଙ୍ଘାତିକ ଅପରାଧ ସେ ଘଟାଇଥିବା ଭୁବନେଶ୍ୱର ଡିସିପି ପ୍ରତୀକ ସିଂ କହିଛନ୍ତି ।
