ଫିରିଙ୍ଗିଆ,୨୧/୬ :  ବିବାହର ପ୍ରତିଶ୍ରୁତି ଦେଇ ଯୁବତୀଙ୍କୁ ଦୁଷ୍କର୍ମ ଅଭିଯୋଗରେ ସେଲ୍ସମ୍ୟାନ ଗିରଫ । ଏଭଳି ଏକ ଘଟଣା ଘଟିଛି କନ୍ଧମାଳ ଜିଲ୍ଲା ଫିରିଙ୍ଗିଆ ଥାନା ଅଂଚଳରେ । ଜଣେ ଯୁବତୀଙ୍କ ସହ ପ୍ରେମ ସମ୍ପର୍କ ସ୍ଥାପନ କରି ବିବାହର ପ୍ରତିଶ୍ରୁତି ଦେଇ ବାରମ୍ବାର ଦୁଷ୍କର୍ମ କରିବା ଓ ପରେ ଯୁବତୀ ଜଣକ ଗର୍ଭବତୀ ହେବା ଜାଣିବା ପରେ  ତାଙ୍କର ଜୋରଜବରଦସ୍ତ ଗର୍ଭ ନଷ୍ଟ କରିବା ଅଭିଯୋଗ ହୋଇଛି । ଫିରିଙ୍ଗିଆ ବଜାରରେ ଥିବା ଅନଲାଇନ ମାର୍କେଟିଂର ଜଣେ ସେଲ୍ସମ୍ୟାନକୁ ପୋଲିସ ଏହି ଘଟଣାରେ ଗିରଫ କରି କୋର୍ଟ ଚାଲାଣ କରିଛି  I ଗିରଫ ଯୁବକ ଜଣକ ଫିରିଙ୍ଗିଆ ଥାନା ପବିଙ୍ଗିଆ ଗାଁର ସାନପୁଅ ପ୍ରିୟରଂଜନ ଦିଗାଲ ବୋଲି ଜଣାପଡ଼ିଛି I 

ପୋଲିସର ସୂଚନା ଅନୁସାରେ ଯୁବକ ଜଣକ ଫିରିଙ୍ଗିଆ ଥାନା ଅନ୍ତର୍ଗତ ଜନୈକ ଯୁବତୀଙ୍କୁ ଦୀର୍ଘ ପାଞ୍ଚ ବର୍ଷ ହେବ ଭଲପାଇବା ପରେ ତାଙ୍କ ସହ ବାରମ୍ବାର ଶାରୀରିକ ସମ୍ପର୍କ ରଖିଥିଲେ । ଯୁବତୀ ଜଣକ ଗର୍ଭବତୀ ହେବା ପରେ ଜୋରଜବରଦସ୍ତ ତାଙ୍କର ଗର୍ଭ ନଷ୍ଟ କରିଥିଲେ I ପରେ ଯୁବତୀ ଜଣକ ଯୁବକଙ୍କ ସହ ବିବାହ କରିବା ପାଇଁ କହିବାରୁ ଯୁବକ ଜଣକ ଯୁବତୀଙ୍କୁ ବିବାହ କରିବା ପାଇଁ ମନା କରିଦେଇଥିଲେ I ପରେ ସମ୍ପୃକ୍ତ ଯୁବତୀ ଜଣକ ଯୁବକଙ୍କ ନାଁରେ ଥାନାରେ ଏକ ଲିଖିତ ଅଭିଯୋଗ କରିଥିଲେ I ଅଭିଯୋଗ ପରେ ଫିରିଙ୍ଗିଆ ଥାନା ଅଧିକାରୀ ଗୋପୀନାଥ ପ୍ରଧାନଙ୍କ ନିର୍ଦେଶ କ୍ରମେ ଥାନାରେ କାର୍ଯ୍ୟରତ ଅତିରିକ୍ତ ଥାନା ଅଧିକାରୀ ଅଜୟ ସାହୁ ଏ ନେଇ ଥାନାରେ କେଶ ନଂ ୧୩୮/୨୪ରେ ଏକ ମାମଲା ରୁଜୁ କରି ଘଟଣାର ତଦନ୍ତ ଚାଲିଥିଲା । ସମ୍ପୃକ୍ତ ଯୁବକଙ୍କୁ ଗିରଫ କରିବା ସହ ଶୁକ୍ରବାର କୋର୍ଟ ଚାଲାଣ କରିଥିବା ସୂଚନା ଦେଇଛନ୍ତି ଥାନା ଅଧିକାରୀ ଗୋପୀନାଥ ପ୍ରଧାନ I