ସମ୍ବଲପୁର,୧୩/୦୯: ସାଙ୍ଗ ହୋଇ ଏକାଠି ମଦ ପିଇଲେ ଚାରି ସାଙ୍ଗ । ନିଶାସକ୍ତ ଅବସ୍ଥାରେ ସାଙ୍ଗକୁ ବାଡ଼ିରେ ପିଟିପିଟି ହତ୍ୟା କଲା ସାଙ୍ଗ । ମୃତକ ଜଣକ ହେଉଛନ୍ତି ସତ୍ୟନାରାୟଣ ପାଣିଗ୍ରାହୀ । ସମ୍ବଲପୁର ସଦର ଥାନା ଅନ୍ତର୍ଗତ ରାସନପୁର ବାଙ୍କୀଟିକ୍ରା ଗ୍ରାମରେ ଏଭଳି ହତ୍ୟାକାଣ୍ଡ ହୋଇଛି । 

ସୂଚନା ମୁତାବକ, ଗୁରୁବାର ବିଳମ୍ୱିତ ରାତିରେ ସତ୍ୟନାରାୟଣ ତାଙ୍କ ତିନି ଜଣ ସାଙ୍ଗଙ୍କ ସହ ଏକାଠି ବସି ମଦ ପିଉଥିଲେ । ଏହି ସମୟରେ କୌଣସି କାରଣରୁ ଦୁଇ ସାଙ୍ଗଙ୍କ ମଧ୍ୟରେ ବଚସା ହୋଇଥିଲା । ଏଥିରେ ଉତ୍ୟକ୍ତ ହୋଇ ସତ୍ୟନାରାୟଣଙ୍କୁ ତାଙ୍କ ସାଙ୍ଗ ଏକ ବାଡ଼ି ସାହାଯ୍ୟରେ ଆକ୍ରମଣ କରି ମାଡ଼ ମାରିଥିଲା । ଏହି ସମୟରେ ଅନ୍ୟ ଦୁଇଜଣ ସାଙ୍ଗ ତାଙ୍କୁ ଛଡାଇବାକୁ ଚେଷ୍ଟା କରିବା ପରେ ମଧ୍ୟ ସେ ଆକ୍ରମଣ କରିଥିଲା । ଫଳରେ ଘଟଣାସ୍ଥଳରେ ହିଁ ପ୍ରାଣ ହରାଇଥିଲେ ସତ୍ୟନାରାୟଣ । ଏହା ଦେଖି ଅନ୍ୟ ଦୁଇଜଣ ସାଙ୍ଗ ପୋଲିସକୁ ଖବର ଦେଇଥିଲେ । ଖବର ପାଇ ଘଟଣାସ୍ଥଳରେ ସଦର ଥାନା ପୋଲିସ ପହଞ୍ଚି ମୃତଦେହକୁ ଜବତ କରି ବ୍ୟବଚ୍ଛେଦ ପାଇଁ ପଠାଇଛି । ଏଥି ସହିତ ଘଟଣାର ତଦନ୍ତ ଆରମ୍ଭ କରିଛି ପୋଲିସ ।