ନୂଆଦିଲ୍ଲୀ,୦୪/୦୩: ଗତକାଲି ପାଳିତ ହୋଇଯାଇଛି ବିଶ୍ୱ ବନ୍ୟପ୍ରାଣୀ ଦିବସ । ଏହି ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଡ଼ଲଫିନଙ୍କ ସଂଖ୍ୟାକୁ ନେଇ ଏକ ରିପୋର୍ଟ ପ୍ରକାଶ କରିଛନ୍ତି । ରିପୋର୍ଟ ମୁତାବକ ,ସର୍ବାଧିକ ଡଲଫିନ୍ ଉତ୍ତର ପ୍ରଦେଶରେ ଥିବା ବେଳେ ସବୁଠାରୁ କମ୍ ଡଲଫିନ୍ ପଞ୍ଜାବରେ ଅଛନ୍ତି।
ଦେଶରେ ପ୍ରଥମ ଥର ପାଇଁ ନଦୀରେ କେତେ ଡଲଫିନ୍ ଅଛନ୍ତି ଏନେଇ ଏକ ରିପୋର୍ଟ ପ୍ରକାଶ ପାଇଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସୋମବାର ଦିନ ଡଲଫିନ ସଂଖ୍ୟା ଆକଳନର ପ୍ରଥମ ରିପୋର୍ଟ ପ୍ରକାଶ କରିଛନ୍ତି। ଭାରତରେ ୬,୩୨୭ଟି ରିଭର ଡଲଫିନ୍ ଥିବା ବେଳେ ସେମାନଙ୍କ ମଧ୍ୟରୁ ପ୍ରାୟ ୯୦ ପ୍ରତିଶତ ଗଙ୍ଗା କିମ୍ବା ଏହାର ଶାଖା ନଦୀଗୁଡ଼ିକରେ ବାସ କରନ୍ତି। ସେହିପରି ଗଙ୍ଗାରେ ୩,୨୭୫ଟି ଡଲଫିନ୍, ଗଙ୍ଗାର ଉପନଦୀଗୁଡ଼ିକରେ ୨,୪୧୪ଟି, ବ୍ରହ୍ମପୁତ୍ରରେ ୫୮୪ଟି, ବ୍ରହ୍ମପୁତ୍ରର ଉପନଦୀଗୁଡ଼ିକରେ ୫୧ଟି ଏବଂ ବ୍ୟାସ ନଦୀରେ ୩ଟି ଡଲଫିନ୍ ଅଛନ୍ତି। ପ୍ରୋଜେକ୍ଟ ଡଲଫିନ୍ ଅଧୀନରେ ଏହି ଡଲଫିନ୍ଙ୍କ ସଂଖ୍ୟା ପ୍ରକାଶ ପାଇଛି। ଏହି ପ୍ରଜାତିକୁ ବଞ୍ଚାଇବା ପାଇଁ ପ୍ରୋଜେକ୍ଟ ଡଲଫିନ୍ ଆରମ୍ଭ କରାଯାଇଛି। ଏହା ରିଭର ଡଲଫିନର ପ୍ରଥମ ତଥ୍ୟ।
ଏହା ମଧ୍ୟ ପଢନ୍ତୁ- ମହାରାଷ୍ଟ୍ର ରାଜନୀତିରେ ହଲଚଲ; ଇସ୍ତଫା ଦେଲେ ମନ୍ତ୍ରୀ ଧନଞ୍ଜୟ ମୁଣ୍ଡେ, ସରପଞ୍ଚଙ୍କ ହତ୍ୟାକାଣ୍ଡକୁ ନେଇ ଆକ୍ସନ୍
ଭାରତୀୟ ବନ୍ୟପ୍ରାଣୀ ପ୍ରତିଷ୍ଠାନର ବୈଜ୍ଞାନିକମାନେ ୨୦୧୮ ମସିହାରେ ଏକ ଅଧ୍ୟୟନ କରିଥିଲେ। ଏହି ଅଧ୍ୟୟନ ଅନୁସାରେ, ୧୯ ଶତାବ୍ଦୀ ପରଠାରୁ ଡଲଫିନ୍ ସଂଖ୍ୟାରେ ଅତି କମରେ ୫୦-୬୫% ହ୍ରାସ ଘଟିଛି। ଡଲଫିନଗୁଡ଼ିକ ନଦୀର ପ୍ରଦୂଷଣ ଏବଂ ପ୍ରାକୃତିକ ବିପଦ ଦ୍ୱାରା ପ୍ରଭାବିତ ହୁଅନ୍ତି। ପ୍ରଧାନମନ୍ତ୍ରୀ ଗୁଜରାଟର ଗିରରେ ଜାତୀୟ ବନ୍ୟପ୍ରାଣୀ ବୋର୍ଡର ବୈଠକର ଅଧ୍ୟକ୍ଷତା କରିବା ପରେ ପ୍ରୋଜେକ୍ଟ ଡଲଫିନର ରିପୋର୍ଟ ପ୍ରକାଶ କରିଥିଲେ। ସେହିପରି ଡଲଫିନ ସଂରକ୍ଷଣ ଉପରେ ସଚେତନତା ସୃଷ୍ଟି କରିବା ଉପରେ ଗୁରୁତ୍ୱାରୋପ କରିଥିଲେ ପ୍ରଧାନମନ୍ତ୍ରୀ । ଅନ୍ୟପଟେ ବନ୍ୟପ୍ରାଣୀ ଦିବସ ଅବସରରେ ପ୍ରଧାନମନ୍ତ୍ରୀ ଗୁଜରାଟରେ ବାନ୍ତାରା ବନ୍ୟପ୍ରାଣୀ କେନ୍ଦ୍ରର ମଧ୍ୟ ଉଦଘାଟନ କରିଛନ୍ତି। ଏହି ସମୟରେ ସେ ବାନ୍ତାରା ମଧ୍ୟ ପରିଦର୍ଶନ କରିଥିଲେ। ଏହି କେନ୍ଦ୍ରରେ ୨ ହଜାର ରୁ ଅଧିକ ପ୍ରଜାତି ଏବଂ ୧.୫ ଲକ୍ଷରୁ ଅଧିକ ଉଦ୍ଧାର କରାଯାଇଥିବା ପ୍ରାଣୀ ଅଛନ୍ତି। ଯେଉଁଠାରେ ପଶୁମାନଙ୍କ ପାଇଁ ମଧ୍ୟ ଡାକ୍ତରଖାନା ଅଛି ଏବଂ ଅନେକ ପ୍ରକାରର ସୁବିଧା ଉପଲବ୍ଧ ରହିଛି।
