ଜୁନାଗଡ଼,୯।୧(ଆପ୍ର): କଳାହାଣ୍ଡି ଜିଲା ଜୁନାଗଡ଼ ଥାନା ଅନ୍ତର୍ଗତ ୨୬ ନମ୍ବର ଜାତୀୟ ରାଜପଥ ବଳଦିଆମାଲ ଛକ ଠାରେ ଗୌରବ ଟ୍ରାଭେଲ ନାମକ ଏକ ଘରୋଇ ବସରେ ହଠାତ ନିଆଁ ଲାଗି ଜଳି ଯାଇଛି। ସ୍ଥାନୀୟ ଲୋକଙ୍କ ଉଦ୍ୟମରେ ସମସ୍ତ ଯାତ୍ରୀଙ୍କୁ ନିଆଁ ଲାଗିବା ପୂର୍ବରୁ ସୁରକ୍ଷିତ ଭାବେ ବାହାରକୁ ଅଣାଯିବାରୁ ସମସ୍ତେ ସୁରକ୍ଷିତ ଉଦ୍ଧାର ହୋଇଥିବା ଜଣାଯାଇଛି। ତେବେ ଗାଡ଼ିରେ ବସିଥିବା ଶତାଧିକ ଯାତ୍ରୀ ଏକ ବଡ ଅଘଟଣରୁ ଅଳ୍ପକେ ବର୍ତ୍ତିଯାଇଛନ୍ତି।
ସୂଚନା ଅନୁସାରେ ଉକ୍ତ ବସଟି ଜୟପୁରରୁ ରାଉରକେଲାକୁ ଯାଉଥିଲା। ବଲଦିଆମାଲ ଛକ ନିକଟରେ ଅଚାନକ ଗାଡ଼ିର ଗୋଟେ ଚକ ଫାଟି ଟାୟାରରେ ନିଆଁ ଲାଗି ଯାଇଥିଲା। ବସ କର୍ମଚାରୀ ସ୍ଥାନୀୟ ଲୋକଙ୍କ ସହଯୋଗରେ ଟାୟାରରେ ଲାଗିଥିବା ନିଆଁକୁ ଲିଭାଇବାକୁ ଉଦ୍ୟମ କରିଥିଲେ। ନିକଟ ପେଟ୍ରୋଲ ପମ୍ପ ରୁ ନିଆଁ ଲିଭା ଯନ୍ତ୍ର ଆଣି ପ୍ରୟାସ କରିଥିଲେ। ମାତ୍ର ନିଆଁ ଅଧିକ ଜଳିବା ଆରମ୍ଭ କରିବାରୁ ସମସ୍ତ ଯାତ୍ରୀଙ୍କୁ ସୁରକ୍ଷିତ ଭାବେ ବସ୍ ରୁ ଓହ୍ଲାଇ ଦିଆଯାଇଥିଲା। ଖବର ପାଇ ଜୁନାଗଡ଼ ଅଗ୍ନିଶମ ବିଭାଗ ଘଟଣା ସ୍ଥଳକୁ ପହଞ୍ଚି ବସର ନିଆଁ କୁ ଆୟତ୍ତ କରିଥିଲେ। ମାତ୍ର ବସ୍ ଟି ସମ୍ପୂର୍ଣ ଭାବେ ଜଳି ଯାଇଥିବା ଜଣାପଡିଛି।
