ସମ୍ବଲପୁର,୧୦/୦୧: ଆ.କଟାପାଲିରେ ଦୁର୍ଘଟଣା କରି ବିଜେପି ନେତାଙ୍କୁ ହତ୍ୟା ଘଟଣାର ରହସ୍ୟ ଖୋଲିବାକୁ ଅଭିଯୁକ୍ତର ହେବ ପଲିଗ୍ରାଫ୍ ପରୀକ୍ଷା । ବାରମ୍ବାର ବୟାନ ପରିବର୍ତ୍ତନ କରୁଥିବାରୁ ପଲିଗ୍ରାଫ୍ ସହ ମାନସିକ ସ୍ୱାସ୍ଥ୍ୟ ପରୀକ୍ଷା କରାଯିବ । ଏନେଇ ସୂଚନା ଦେଇଛନ୍ତି ସମ୍ବଲପୁର ଉତ୍ତରାଞ୍ଚଳ ପୁଲିସ୍ ଆଇଜି ହିମାଂଶୁ ଲାଲ୍ ।
ଗୁରୁବାର ୩ ଦିନଆ ରିମାଣ୍ଡ ଶେଷ ହେବା ପରେ ଅଭିଯୁକ୍ତ ପ୍ରସନ୍ନ କୁମାର ଜେନାମଣୀକୁ କୋର୍ଟରେ ହାଜର କରିଥିଲା ବୁର୍ଲା ପୁଲିସ । ଏହାସହ ଅଧିକ ତଦନ୍ତ କରିବାକୁ ଅଭିଯୁକ୍ତର ପଲିଗ୍ରାଫ୍ ପରୀକ୍ଷା କରାଯିବ । ୩ ଦିନ ମଧ୍ୟରେ କୌଣସି ସଠିକ୍ ତଥ୍ୟ ମିଳିନଥିବାରୁ ପୁଲିସ୍ ଅଧିକ ତଦନ୍ତ କରିବାକୁ ଚାହୁଁଛି । ଅଭିଯୁକ୍ତ ଜେନାମଣୀ ହତ୍ୟାକାଣ୍ଡକୁ ଭିନ୍ନ ଭିନ୍ନ ପ୍ରତିକ୍ରିୟା ଦେଉଛି । ପ୍ରଥମେ କହିଲା, ନିଦରେ ଗାଡ଼ି ଚଢ଼ିଯାଇଥିଲା । ପୁଣିଥରେ ପ୍ରଶ୍ନ କରିବାରୁ କହିଥିଲା, ଅନ୍ୟ କେହି ଡରାଇ ଧମକାଇବାରୁ ସେ ଏଭଳି କାଣ୍ଡ କରିଥିଲା ।
ଅନ୍ୟମାନେ ଝଗଡ଼ା କରିଥିଲେ, କିନ୍ତୁ ଏମାନଙ୍କୁ ଭୁଲରେ ମୋ ଗାଡି ଧକ୍କା ଦେଇଥିଲା । ପୁଣି ଥରେ ପ୍ରତିକ୍ରିୟା ରଖି କହିଥିଲା, ପ୍ରଥମ ଥର ଭୁଲରେ କାର୍ରେ ହାଇୱାଟି ବାଜିଥିଲା । ପରେ ଆଖି ଲାଗିବାରୁ ଦ୍ୱିତୀୟ ଥର କାରରେ ଲାଗିଥିଲା । ଶେଷରେ ସର୍ଭିସ୍ ରୋଡ୍କୁ ଭୁଲରେ ଯାଇ ଗାଡ଼ିରେ ଧକ୍କା ହୋଇଯାଇଥିଲା । ତେଣୁ ଏଭଳି ବୟାନ ଦେଉଥିବାରୁ ପୁଲିସ୍ ପଲିଗ୍ରାଫ୍ ଟେଷ୍ଟ୍ କରିବାକୁ କୋର୍ଟରେ ଆଦେବନ କରିବ । ଏହାସହ ଅଭିଯୁକ୍ତର ମାନସିକ ସ୍ୱାସ୍ଥ୍ୟ ପରୀକ୍ଷା ମଧ୍ୟ କରାଯିବ । କେଉଁ କାରଣରୁ ଏହି ହତ୍ୟାକାଣ୍ଡ ହୋଇଛି ତାଉପରେ ଅଧିକ ଖୋଳତାଡ଼ କରିବାକୁ ଆଉଥରେ ରିମାଣ୍ଡରେ ନିଆଯିବ ବୋଲି ଆଇଜି ହିମାଂଶୁ ଲାଲ୍ କହିଛନ୍ତି ।
ଗତ ଶନିବାର ୪ ତାରିଖ ରାତି(ଇଂରାଜୀ କ୍ୟାଲେଣ୍ଡର ଅନୁସାରେ ୫ ତାରିଖ) ପ୍ରାୟ ଗୋଟାଏ ବେଳେ ବୁର୍ଲା ଆ.କଟାପାଲି ଅଞ୍ଚଳରେ କାର୍କୁ ହାଇୱା ଧକ୍କା ଦେବାରୁ ୨ ଜଣ ବରିଷ୍ଠ ବିଜେପି ନେତାଙ୍କ ମୃତ୍ୟୁ ହୋଇଥିଲା । ମୃତକ ହେଲେ ବିଜେପିର ଗୋଶାଳା ମଣ୍ଡଳ ସଭାପତି ଦେବେନ୍ଦ୍ର ନାୟକ(୫୫) ଓ କର୍ଡୋଲା ପଞ୍ଚାୟତର ପୂର୍ବତନ ସରପଞ୍ଚ ତଥା ବରିଷ୍ଠ ନେତା ମୂରଲୀଧର ଛୁରିଆ(୬୨) । ଏହି ଘଟଣାରେ ହାଇୱା ଚାଳକ ପ୍ରସନ୍ନ କୁମାର ଜେନାମଣୀଙ୍କୁ ପୁଲିସ୍ ଗିରଫ କରିଛି । କୋର୍ଟ ଚାଲାଣ ପରେ ୭ ଦିନିଆ ରିମାଣ୍ଡ ପୁଲିସ୍ ଆବେଦନ କରିଥିଲା । ହେଲେ ୩ ଦିନ ରିମାଣ୍ଡ ପାଇଁ ଅନୁମତି ଦେଇଥିଲେ କୋର୍ଟ । ଯାହାକି ଆଜି ରିମାଣ୍ଡ ଶେଷ ପରେ ଅଭିଯୁକ୍ତକୁ କୋର୍ଟରେ ହାଜର କରାଯାଇଛି ।
