ନୂଆଦିଲ୍ଲୀ, ୨୪/୦୭ : ସେୟାର ବଜାରରେ ଏବେ ରହିଛି ଉତ୍ସାହ । ଏଠାରେ ନିବେଶ କରି ସ୍ୱଳ୍ପ ସମୟ ମଧ୍ୟରେ ନିବେଶକ ହେଉଛନ୍ତି ମାଲାମାଲ । ବମ୍ବେ ଷ୍ଟକ୍ ଏକ୍ସଚେଞ୍ଜ(ବିଏସ୍ଇ) ସୂଚକାଙ୍କ ସେନ୍ସେକ୍ସ ୮୦,୦୦୦ ପଏଣ୍ଟ ଉପରେ ପହଞ୍ଚିଛି । ସହରରେ ଏବେ ପ୍ରତି ୩ ଜଣରେ ଜଣେ ବ୍ୟକ୍ତି ବଜାରରେ ନିବେଶ କରୁଛନ୍ତି । ଏକ ରିପୋର୍ଟ ଅନୁସାରେ ଦେଶର ପ୍ରାୟ ୨୦% ଲୋକ ସେୟାର ବଜାରରେ ସିଧାସଳଖ କିମ୍ବା ସେୟାର ବଜାର ସହ ଜଡ଼ିତ ପ୍ରଡକ୍ଟରେ ନିବେଶ କରୁଛନ୍ତି । ମୋଟା ଆୟ ମଧ୍ୟ କରୁଛନ୍ତି । ତେବେ ଏହା ଏକ କାରଣ, ଯେଉଁଥିପାଇଁ ସରକାର ଏଥର ବଜେଟ୍ରେ ସେୟାର ବଜାରରେ ହେଉଥିବା ଆୟ ଉପରେ ଟିକସ ହାର ବଢ଼ାଇ ରାଜସ୍ୱ ପରିସରକୁ ବ୍ୟାପକ କରିବାର ଉଦ୍ୟମ କରିଛନ୍ତି ।
ସେୟାର ବଜାରରୁ ହେଉଥିବା ଆୟ ଉପରେ ପୁଞ୍ଜି ଲାଭ ଟିକସ ବା କ୍ୟାପିଟାଲ ଗେନ୍ ଟ୍ୟାକ୍ସ ଲାଗିଥାଏ । ଏହି କ୍ୟାପିଟାଲ ଗେନ୍ ଟାକ୍ସ ଦୁଇ ଭାଗରେ ବିଭକ୍ତ । ଗୋଟିଏ ହେଉଛି ସ୍ୱଳ୍ପମିଆଦୀ ପୁଞ୍ଜି ଲାଭ ଟିକସ ବା ସର୍ଟ ଟର୍ମ କ୍ୟାପିଟାଲ ଗେନ୍ ଟାକ୍ସ(ଏସ୍ଟିସିଜି)ଏବଂ ଅନ୍ୟଟି ହେଉଛି ଲଙ୍ଗ୍ ଟର୍ମ କ୍ୟାପିଟାଲ ଗେନ୍ ଟାକ୍ସ ବା ଦୀର୍ଘମିଆଦୀ ପୁଞ୍ଜି ଲାଭ ଟିକସ(ଏଲ୍ଟିସିଜି) । ଯଦି କୌଣସି ବ୍ୟକ୍ତି ସେୟାର ବଜାର କିମ୍ବା ମ୍ୟୁଚୁଆଲ ଫଣ୍ଡ୍ରେ ନିବେଶ କରି ବର୍ଷକ ଭିତରେ ଲାଭ କରି ବାହାରିଆସିଲେ ତେବେ ଉକ୍ତ ଆୟକୁ ସ୍ୱଳ୍ପମିଆଦୀ ପୁଞ୍ଜି ଲାଭ କୁହାଯାଇଥାଏ । କିନ୍ତୁ ଯଦି ଉକ୍ତ ବ୍ୟକ୍ତି ନିଜ ନିବେଶକୁ ବର୍ଷେ ପର୍ଯ୍ୟନ୍ତ ରଖନ୍ତି ତେବେ ତାହାକୁ ଦୀର୍ଘମିଆଦୀ ପୁଞ୍ଜି ଲାଭ କୁହାଯାଇଥାଏ । କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ ମଙ୍ଗଳବାର ଉଭୟ ଟିକସକୁ ବଢ଼ାଇ ଦେଇଛନ୍ତି । ବିତ୍ତୀୟ ଏବଂ ଅଣ-ବିତ୍ତୀୟ ଆସେଟ୍ରୁ ଦୀର୍ଘମିଆଦୀ ପୁଞ୍ଜି ଲାଭ ଉପରେ ପୂର୍ବରୁ ୧୦% ଟିକସ ଲାଗୁଥିଲା । ଏବେ ଏହାକୁ ବଢ଼ାଇ ୧୨.୫% କରିଦିଆଯାଇଛି ।
ସେହିଭଳି ଇକ୍ୱିଟି ସେୟାର ଏବଂ ଇକ୍ୱିଟିଭିତ୍ତିକ ମ୍ୟୁଚୁଆଲ ଫଣ୍ଡ୍ ନିବେଶରୁ ସ୍ୱଳ୍ପମିଆଦୀ ପୁଞ୍ଜି ଲାଭ ଉପରେ ଏଯାବତ୍ ୧୫% ଟିକସ ଲାଗୁଥିବାବେଳେ ବର୍ତ୍ତମାନ ଏହାକୁ ବଢ଼ାଇ ୨୦% କରାଯାଇଛି । ବର୍ତ୍ତମାନ ସେୟାର ବଜାରରୁ ମୋଟା ଆୟ କରୁଛନ୍ତି ନିବେଶକ । ଯେଉଁମାନଙ୍କର ସେୟାର ବଜାରରେ ସିଧା ନିବେଶ କରି ଆୟ କରିବାର ଜ୍ଞାନ ନାହିଁ ସେମାନେ ମ୍ୟୁଚୁଆଲ ଫଣ୍ଡ୍ର ରାସ୍ତା ବାଛୁଛନ୍ତି । ୨୦୨୪ ଜୁନ୍ରେ ଲୋକେ ଇକ୍ୱିଟି ମ୍ୟୁଚୁଆଲ ଫଣ୍ଡ୍ରେ ୪୦,୬୦୮.୧୯ କୋଟି ଟଙ୍କା ନିବେଶ କରିଛନ୍ତି । ଏହା ମେ’ ମାସ ତୁଳନାରେ ୧୭% ଅଧିକ । ଆସୋସିଏସନ୍ ଅଫ୍ ମ୍ୟୁଚୁଆଲ ଫଣ୍ଡ୍ ଅଫ୍ ଇଣ୍ଡିଆ ପକ୍ଷରୁ ଏ ତଥ୍ୟ ପ୍ରଦାନ କରାଯାଇଛି । ୨୦୨୩ ମେ’ରେ ଇକ୍ୱିଟି ମ୍ୟୁଚୁଆଲ ଫଣ୍ଡ୍ରେ ମୋଟ ୩୪,୬୭୦.୯ କୋଟି ଟଙ୍କା ନିବେଶ ହୋଇଥିଲା ।
