ଭୁବନେଶ୍ୱର,୧୬/୦୨: କଳିଙ୍ଗ ଷ୍ଟାଡିୟମରେ ହକି ପର୍ବ ଆରମ୍ଭ ହୋଇଛି । ଏଫ୍ଆଇଏଚ୍ ପ୍ରୋ ଲିଗ୍ରେ ଶନିବାର ୩ଟି ମ୍ୟାଚ୍ ଖେଳାଯାଇଥିଲା । ମହିଳାରେ ଭାରତ ୩-୨ରେ ଇଂଲଣ୍ଡକୁ ହରାଇ ଅଭିଯାନ ଆରମ୍ଭ କରିଥିବାବେଳେ ସ୍ପେନ୍ ୨-୧ରେ ଜର୍ମାନୀକୁ ପରାଜିତ କରିଥିଲା । ମାତ୍ର ଭାରତୀୟ ପୁରୁଷ ଦଳର ପରାଜୟ ଘରୋଇ ଦର୍ଶକଙ୍କ ହୃଦୟ ଭାଙ୍ଗି ଦେଇଥିଲା । ଦଳ ପ୍ରଥମ ମ୍ୟାଚ୍ରେ ୧-୩ ଗୋଲ୍ରେ ସ୍ପେନ ନିକଟରୁ ହାରି ଯାଇଥିଲା ।
ନବନୀତଙ୍କ ଗୋଲ୍ରେ ଜିତିଲା ଭାରତ
ଭାରତୀୟ ମହିଳା ଦଳ ଏକ ରୋମାଞ୍ଚକର ବିଜୟ ସହ ପଏଣ୍ଟ ଖାତା ଖୋଲିଛି । ସିଜନର ପ୍ରଥମ ମ୍ୟାଚ୍ରେ ଘରୋଇ ଦଳ ୩-୨ ଗୋଲ୍ରେ ଇଂଲଣ୍ଡକୁ ପରାସ୍ତ କରିଥିଲା । ୫୯ମିନିଟ୍ରେ ନବନୀତ କୌର ଗୋଟିଏ ଦର୍ଶନୀୟ ଗୋଲ୍ କରି ଦଳକୁ ଜିତାଇଥିଲେ । ଏହି ମ୍ୟାଚ୍ରେ ଉପ ମୁଖ୍ୟମନ୍ତ୍ରୀ କନକ ବର୍ଦ୍ଧନ ସିଂଦେଓ ଅତିଥି ଭାବେ ଯୋଗଦେଇ ଭାରତୀୟ ଦଳର ସୁନେଲିତା ଟପ୍ପୋଙ୍କୁ ପ୍ଲେୟାର ଅଫ୍ ଦ ମ୍ୟାଚ୍ ଟ୍ରଫି ପ୍ରଦାନ କରିଥିଲେ ।
ଭାରତ-ଇଂଲଣ୍ଡ ମ୍ୟାଚ୍ ସଂଘର୍ଷପୂର୍ଣ୍ଣ ହୋଇଥିଲା। ଘରୋଇ ଦଳ ଆରମ୍ଭରୁ ଘନଘନ ଆକ୍ରମଣ କରି ଷଷ୍ଠ ମିନିଟ୍ରେ ଏକ ପେନାଲ୍ଟି ସୁଯୋଗ ପାଇଥିଲା । ମନୀଷା ଚୌହାନଙ୍କ ସଟ୍କୁ ଇଂଲଣ୍ଡର ଟିସା ହୋୱାର୍ଡ ଅଟକାଇବାକୁ ପ୍ରୟାସ କରିଥିଲେ । ତାଙ୍କ ଷ୍ଟିକ୍ରେ ବଲ୍ ବାଜି ସୁଶୀଳା ଚାନୁଙ୍କ ନିକଟରେ ପହଞ୍ଚିଥିଲା । ସେ ଏକ ଦମ୍ଦାର ସଟ୍ ମାରିଥିଲେ ଏବଂ ବୈଷ୍ଣବୀ ବିଥଲ୍ ଫାଲ୍କେ ବଲ୍କୁ ଗୋଲ୍ପୋଷ୍ଟରେ ପହଞ୍ଚାଇ ଦେଇଥିଲେ । ୧-୦ରେ ଆଗେଇ ଥିଲା ଭାରତ । ଏହାପରେ ଇଂଲଣ୍ଡ ପ୍ରତି ଜବାବ ଦେଇଥିଲା । ୧୨ମିନିଟ୍ରେ ଡାର୍ସି ବୋର୍ଣ୍ଣଙ୍କ ଗୋଲ୍ ବଳରେ ସ୍ଥିତି ୧-୧ରେ ବରାବର କରିଥିଲା ।
ଦ୍ୱିତୀୟ କ୍ୱାର୍ଟରରେ ଭାରତୀୟ ଖେଳାଳି ଆକ୍ରମଣ ଜୋରଦାର କରିଥିଲେ । ୨୫ମିନିଟ୍ରେ ଦଳକୁ ଆଉ ଏକ ପେନାଲ୍ଟି ମିଳିଥିଲା । ଦୀପିକା ଏହାକୁ ଗୋଲ୍ ରୂପ ଦେବାରେ ହେଳା କରିନଥିଲେ । ଭାରତ ୨-୧ରେ ଆଗେଇଥିଲା । ଏହି ଭାଗରେ ଇଂଲଣ୍ଡ ଗୋଲ୍ କରିବାରେ ବିଫଳ ହୋଇଥିଲା । ତୃତୀୟ କ୍ୱାର୍ଟର ଆକ୍ରମଣ ଓ ପ୍ରତିଆକ୍ରମଣ ମଧ୍ୟରେ ଗୋଲଶୂନ୍ୟ ରହିଥିଲା ।
ଅନ୍ତିମ କ୍ୱାର୍ଟରରେ ଆଉ ୨ମିନିଟ୍ର ଖେଳ ବାକି ଥିବାବେଳେ ଇଂଲଣ୍ଡ ଗୋଟିଏ ଗୋଲ୍ କରି ମ୍ୟାଚ୍କୁ ୨-୨ ସ୍ଥିତିକୁ ଆଣିଥିଲା । ୫୮ମିନିଟ୍ରେ ଫିଓନା କ୍ରାକ୍ଲେସ୍ ଏହି ଗୋଲ୍ କରିଥିଲେ । ମ୍ୟାଚ୍ ଡ୍ର’ ହେବା ଆକଳନ କରାଯାଇଥିଲା । ମାତ୍ର ପରବର୍ତ୍ତୀ ମିନିଟ୍ରେ ନବନୀତ ଇଂଲଣ୍ଡ ଖେଳାଳିଙ୍କୁ ଚକ୍ମା ଦେଇ ବଲ୍କୁ ଗୋଲ୍ପୋଷ୍ଟରେ ପହଞ୍ଚାଇବା ସହ ଭାରତକୁ ୩-୨ରେ ବିଜୟୀ କରାଇଥିଲେ । ସ୍ପେନ୍ ୨-୧ ଜର୍ମାନୀ ଅପରାହ୍ଣରେ ସ୍ପେନ ଓ ଜର୍ମାନୀ ମହିଳା ଦଳ ସାମ୍ନାସାମ୍ନି ହୋଇଥିଲେ । ସ୍ପେନ୍ ୨-୧ ଗୋଲ୍ରେ ଏହି ମ୍ୟାଚ୍ ଜିତିଥିଲା । ଦଳ ପକ୍ଷରୁ ଇଷ୍ଟଲ ପେଟଚାମି ଓ ବର୍ଟା ଅଗୁଲୋ ଗୋଲ୍ ସ୍କୋର କରିଥିବାବେଳେ ଜର୍ମାନୀ ପକ୍ଷରୁ ସୋଫିଆ ସ୍କବି ଗୋଟିଏ ଗୋଲ୍ ପରିଶୋଧ କରିଥିଲେ ।
ଭାରତ ୧-୩ ସ୍ପେନ୍
ଭାରତୀୟ ପୁରୁଷ ଦଳ ପରାଜୟ ସହ ଅଭିଯାନ ଆରମ୍ଭ କରିଛି । ପ୍ରଥମ ମ୍ୟାଚ୍ରେ ଦଳ ୧-୩ ଗୋଲ୍ରେ ସ୍ପେନ୍ ନିକଟରୁ ହାରି ଯାଇଥିଲା । ଭାରତୀୟ ମହିଳା ଦଳ ବିଜୟ ହାସଲ କରିବା ପରେ ପୁରୁଷ ଦଳର ମ୍ୟାଚ୍ ଉପରେ ସମସ୍ତଙ୍କ ନଜର ରହିଥିଲା । ସ୍ପେନ୍ ବିପକ୍ଷରେ ପୁରୁଷ ଦଳ ଆରମ୍ଭରୁ ଭଲ ପ୍ରଦର୍ଶନ କରିଥିଲା । ପ୍ରଥମ କ୍ୱାର୍ଟରର ତୃତୀୟ ମିନିଟ୍ରେ ଭାରତ ପ୍ରଥମ ପେନାଲ୍ଟି ପାଇଥିଲା । ମାତ୍ର ଏହା ବିଫଳ ଯାଇଥିଲା । ଏହି ଭାଗରେ ଉଭୟ ଦଳ କେହି କାହାରିକୁ ଗୋଲ୍ ଦେଇ ପାରିନଥିଲେ । ଦ୍ୱିତୀୟ କ୍ୱାର୍ଟରରେ ଭାରତ ଖାତା ଖୋଲିଥିଲା । ୨୫ମିନିଟ୍ରେ ସୁଖଜୀତ ସିଂହଙ୍କ ଗୋଲ୍ ବଳରେ ଦଳ ୧-୦ରେ ଅଗ୍ରଣୀ ହାସଲ କରିଥିଲା । ଏହାର ୩ମିନିଟ୍ ମଧ୍ୟରେ ସ୍ପେନର ବ୍ରୋଜା ଲାକାଲି (୨୮ମିନିଟ୍) ଗୋଲ୍ ପରିଶୋଧ କରି ଦେଇଥିଲେ । ସ୍ଥିତି ୧-୧ରେ ବରାବର ରହିଥିଲା ।
ତୃତୀୟ କ୍ୱାର୍ଟର ସଂଘର୍ଷପୂର୍ଣ୍ଣ ହୋଇଥିଲା । ୩୭ମିନିଟ୍ରେ ସ୍ପେନ୍ର ଏକ ଗୋଲ୍କୁ ଅମ୍ପାୟାର ନାକଚ୍ କରି ଦେଇଥିଲେ । ମାତ୍ର ପରବର୍ତ୍ତୀ ମିନିଟ୍ରେ ସ୍ପେନ୍ ଆଉ ଏକ ଗୋଲ୍ କରି ୨-୧ରେ ଆଗେଇ ଦେଇଥିଲା । ୩୮ମିନିଟ୍ରେ ମିଳିଥିବା ପେନାଲ୍ଟିକୁ ଇଗ୍ନାସିଓ କୋବୋସ ଗୋଲ୍ରେ ପରିଣତ କରିଥିଲେ । ଚତୁର୍ଥ କ୍ୱାର୍ଟରରେ ଭାରତ ସଂଗଠିତ ହୋଇ ଆକ୍ରମଣକୁ ତୀବ୍ରତର କରିଥିଲା । ଅନ୍ୟ ପଟରେ ସ୍ପେନ ସବୁ ପ୍ରୟାସକୁ ବିଫଳ କରାଇଥିଲା । ୫୬ମିନିଟ୍ରେ ଦଳକୁ ପେନାଲ୍ଟି ମିଳିଥିଲା ଏବଂ ବ୍ରୁନ୍ ଆଭିଲା ଏହାକୁ ଗୋଲ ରୂପ ଦେବା ଫଳରେ ସ୍ପେନ ୩-୧ରେ ଆଗେଇ ଥିଲା । ଭାରତ ଏକାଧିକ ପେନାଲ୍ଟି ସୁଯୋଗ ହାତଛଡ଼ା କରି ପରାଜିତ ହୋଇଥିଲା । ଏହି ମ୍ୟାଚ୍ରେ ଉପ ମୁଖ୍ୟମନ୍ତ୍ରୀ ଶ୍ରୀ ସିଂହଦେଓ, କ୍ରୀଡ଼ାମନ୍ତ୍ରୀ ସୂର୍ଯ୍ୟବଂଶୀ ସୂରଜ, ହକି ଇଣ୍ଡିଆ ସଭାପତି ପଦ୍ମଶ୍ରୀ ଦିଲ୍ଲୀପ ତିର୍କୀ ପ୍ରମୁଖ ଅତିଥି ଭାବେ ଯୋଗ ଦେଇଥିଲେ ।
