ଭୁବନେଶ୍ୱର,୦୪/୦୨: କଳିଙ୍ଗ ଷ୍ଟାଡିୟମରେ ଖେଳାଯିବାକୁ ଥିବା ଏଫ୍ଆଇଏଚ୍ ହକି ପ୍ରୋ ଲିଗ୍ ମ୍ୟାଚ୍ ପାଇଁ ହକି ଇଣ୍ଡିଆ ଏକ ବଡ଼ ପଦକ୍ଷେପ ଗ୍ରହଣ କରିଛି । ଦର୍ଶକଙ୍କ ଲାଗି ହକି ଇଣ୍ଡିଆ ପକ୍ଷରୁ ମାଗଣା ଟିକେଟର ବ୍ୟବସ୍ଥା କରାଯାଇଛି । ଫଳରେ ଦର୍ଶକ ମାଗଣାରେ ହକି ପ୍ରୋ ଲିଗ୍ ମ୍ୟାଚ୍ର ମଜା ଉଠାଇବେ । କ୍ରୀଡ଼ାକୁ ପ୍ରୋତ୍ସାହିତ କରିବା ଏବଂ ଏକ ସମାବେଶୀ ଓ ପ୍ରଶଂସକଅନୁକୂଳ ପରିବେଶ ସୃଷ୍ଟି କରିବା ପାଇଁ ଏହି ପଦକ୍ଷେପ ହକି ଇଣ୍ଡିଆର ପ୍ରତିଶ୍ରୁତିବଦ୍ଧତାକୁ ଦର୍ଶାଉଛି ।
ଆସନ୍ତା ୧୫ରୁ ୨୫ ତାରିଖ ମଧ୍ୟରେ ଭୁବନେଶ୍ୱର କଳିଙ୍ଗ ଷ୍ଟାଡିୟମରେ ହକି ପ୍ରୋ ଲିଗ୍ର ୨୪ଟି ମ୍ୟାଚ୍ (ଉଭୟ ପୁରୁଷ ଓ ମହିଳା) ଖେଳାଯିବାର ସୂଚୀ ରହିଛି । ଆୟୋଜକ ଭାରତୀୟ ପୁରୁଷ ଦଳ ଇଂଲଣ୍ଡ, ସ୍ପେନ, ଜର୍ମାନୀ, ଆୟର୍ଲାଣ୍ଡକୁ ଭେଟିବାକୁ ଥିବାବେଳେ ମହିଳା ଦଳ ଜର୍ମାନୀ, ଇଂଲଣ୍ଡ, ନେଦରଲାଣ୍ଡ୍ସ, ସ୍ପେନକୁ ସାମ୍ନା କରିବ । ଉଭୟ ବିଭାଗରେ ପ୍ରତ୍ୟେକ ଦଳ ପରସ୍ପରକୁ ୨ଥର ଭେଟିବେ ।
ହକି ଇଣ୍ଡିଆ ସଭାପତି ପଦ୍ମଶ୍ରୀ ଦିଲ୍ଲୀପ ତିର୍କୀ କହିଛନ୍ତି ଯେ, ବିଶ୍ୱସ୍ତରୀୟ ହକିର ସମକକ୍ଷ ପାଲଟିଥିବା ସହର ଭୁବନେଶ୍ୱରରେ ଏଫ୍ଆଇଏଚ୍ ପ୍ରୋ ଲିଗ୍ ଆୟୋଜନ କରି ଆମେ ଗର୍ବ ଅନୁଭବ କରୁଛୁ।
ଦର୍ଶକଙ୍କୁ ମାଗଣା ଟିକେଟ ଯୋଗାଇ ଦେଇ ଆମେ ଷ୍ଟାଡିୟମରେ ଏକ ଆକର୍ଷଣୀୟ ବାତାବରଣ ସୃଷ୍ଟି କରିବାକୁ ଆଶା ରଖିଛୁ । ଯେଉଁଥିରେ ସବୁ ବର୍ଗର ପ୍ରଶଂସକମାନେ ଏକାଠି ହୋଇ କ୍ରୀଡ଼ାର ମଜା ନେଇପାରିବେ । ହକି ପ୍ରତି ଆମର ଉତ୍ସାହକୁ ବିଶ୍ୱସ୍ତରରେ ପ୍ରଦର୍ଶନ କରିବା ପାଇଁ ଓଡ଼ିଶା ଓ ଭାରତ ଲାଗି ଏହା ଏକ ସ୍ୱତନ୍ତ୍ର ସୁଯୋଗ । ଦର୍ଶକମାନେ ଭୁବନେଶ୍ୱର ପର୍ଯ୍ୟାୟ ହକି ପ୍ରୋ ଲିଗ୍ ମ୍ୟାଚ୍ ପାଇଁ ଟିକେଟଜେନିଜ୍ ୱେବ୍ ପୋର୍ଟାଲ (https://ticketgenie.in/ ticket/FIH-Hockey-ProLeague-2024-25) www.ticketgenie.in ରେ ନିଜର ବିବରଣୀ ପଞ୍ଜୀକରଣ କରି ମାଗଣା ଟିକେଟ ବା ଭର୍ଚୁଆଲ ଟିକେଟ ପାଇପାରିବେ । ଏହି ଟିକେଟ ଦେଖାଇ ସେମାନେ ଷ୍ଟାଡିୟମରେ ପ୍ରବେଶ କରିପାରିବେ ଏବଂ ମ୍ୟାଚ୍ର ମଜା ନେଇପାରିବେ।
