ନୂଆଦିଲ୍ଲୀ,୨୯/୧୧: ଦ୍ରୁତ ବୋଲର ସିଦ୍ଧାର୍ଥ କୌଲ କ୍ରିକେଟରୁ ସନ୍ନ୍ୟାସ ଘୋଷଣା କରିଛନ୍ତି । କ୍ୟାରିୟରରେ ୩ଟି ଦିନିକିଆ ଏବଂ ୩ଟି ଟି-ଟ୍ୱେଣ୍ଟି ଖେଳିବାର ସୁଯୋଗ ପାଇଥିଲେ । ଟି-ଟ୍ୱେଣ୍ଟିରେ କେବଳ ୪ଟି ୱିକେଟ୍ ପାଇଥିଲେ । ବିରାଟ କୋହଲିଙ୍କ ନେତୃତ୍ୱରେ ୧୯ ବର୍ଷରୁ କମ୍ ବିଶ୍ୱକପ୍ ଖେଳିଥିଲେ ।
ଆଇପିଏଲରେ ଦିଲ୍ଲୀ, କୋଲକାତା, ବେଙ୍ଗାଲୁରୁ ଓ ହାଇଦ୍ରାବାଦ ଦଳରେ ସାମିଲ ରହିଥିଲେ । ସେ କହିଛନ୍ତି, ‘ପିଲା ଦିନରୁ ଭାରତୀୟ ଦଳରେ ସାମିଲ ହେବା ନେଇ ସ୍ୱପ୍ନ ଦେଖିଥିଲି । ଶେଷରେ ଭଗବାନଙ୍କ ଆଶୀର୍ବାଦରୁ ୨୦୧୮ରେ ଟି-ଟ୍ୱେଣ୍ଟି (କ୍ୟାପ ନଂ ୭୫) ଓ ଦିନିକିଆ (କ୍ୟାପ ନଂ ୨୨୧ ) ଖେଳିବାର ସୌଭାଗ୍ୟ ମିଳିଥିଲା । ପରିବାର, ପ୍ରଶଂସକ ଓ ଶୁଭେଚ୍ଛୁ ମାନଙ୍କର ସମର୍ଥନ ଯୋଗୁ ମୋ ଜୀବନର ଲକ୍ଷ୍ୟ ପୂରଣ ହୋଇଥିଲା । ଏହା ଅବସର ନେବାର ପ୍ରକୃତ ସମୟ ।’ କୌଲଙ୍କୁ ଏବେ ମାତ୍ର ୩୪ ବର୍ଷ ବୟସ । ପଞ୍ଜାବ ଦଳରୁ ପ୍ରତିନିଧିତ୍ୱ କରି ପ୍ରଥମ ଶ୍ରେଣୀ କ୍ରିକେଟରେ ସେ ୨୯୭ଟି ୱିକେଟ୍ ହାସଲ କରିଛନ୍ତି ।
