ରାଉରକେଲା,୦୭/୦୬: ଗୋଦାମ ମାଲିକ ଶ୍ରବଣ ଅଗ୍ରୱାଲ ଓ ପତ୍ନୀ ନିକିତା ଅଗ୍ରୱାଲଙ୍କୁ ଶୁକ୍ରବାର ସଂଧ୍ୟାରେ ରଘୁନାଥପାଲି ଥାନାରେ ମୁହାଁମୁହିଁ ଜେରା କରିଛି ପୁଲିସ୍ । ନିକିତାଙ୍କୁ ଗୁରୁବାର ଥାନାରେ ହାଜର ହେବା ଲାଗି ପୁଲିସ୍ ନୋଟିସ ଜାରି କରିଥିଲା । ମାତ୍ର ସେ ଆସିନଥିଲେ । ହେଲେ ଶୁକ୍ରବାର ସଂଧ୍ୟା ନିକିତା ଥାନାରେ ପହଞ୍ଚିଥିଲେ । ବଡ଼ଗାଁ ଇତ୍ମାରେ ଥିବା ଗୋଦାମ ନିକିତାଙ୍କ ନାମରେ ରହିଛି । ଗୋଦାମ ସିଲ୍ ଥିବା ସତ୍ତେ୍ୱ ଦୁଇଟି ବିସ୍ଫୋରକ ବୋଝେଇ ଗାଡ଼ି କିପରି ବାହାରିଲା ଓ ଦେଓଗାଁ ସ୍ଥିତ ପେଟ୍ରୋଲ ପମ୍ପ୍ ପାର୍କିଂକୁ କିଭଳି ଗଲା ଏବଂ କାହିଁକି ପାର୍କିଂ କରାଯାଇଥିଲା ସେ ନେଇ ପୁଲିସ୍ ଶ୍ରବଣ ଓ ନିକିତାଙ୍କୁ ସାମ୍ନା ବସାଇ ଜେରା କରିଥିବା ସୂଚନା ମିଳିଛି । ଶୁକ୍ରବାର ସକାଳେ ଅନ୍ୟ ବରିଷ୍ଠ ପୁଲିସ୍ ଅଧିକାରୀମାନେ ଶ୍ରବଣଙ୍କୁ ପଚରାଉଚରା କରିଥିଲେ ।
ଏଠାରେ ସୂଚନା ଯୋଗ୍ୟ ଯେ, ଗତ ୩ ତାରିଖରେ ରଘୁନାଥପାଲି ପୁଲିସ୍ ଶ୍ରବଣ ଓ ଗାଡ଼ି ଚାଳକ ବିର୍ସା ସାମଦଙ୍କୁ ଗିରଫ କରି କୋର୍ଟ ଚାଲାଣ କରିଥିଲା । ଏସ୍ଡିଜେଏମ୍ କୋର୍ଟରେ ସେମାନଙ୍କ ଜାମିନ୍ ନାମଞ୍ଜୁର ହେବାରୁ ଦୁହିଁଙ୍କୁ ବିଚାର ବିଭାଗୀୟ ହାଜତକୁ ପୁଲିସ୍ ପଠାଇ ଦେଇଥିଲା । ୪ ତାରିଖରେ ଶ୍ରବଣଙ୍କୁ ଏକ ସପ୍ତାହ ପାଇଁ ରିମାଣ୍ଡରେ ଆଣିବା ଲାଗି ପୁଲିସ୍ ପକ୍ଷରୁ କୋର୍ଟରେ ଆବେଦନ କରାଯାଇଥିଲା । କୋର୍ଟ ମାତ୍ର ୨ ଦିନ ରିମାଣ୍ଡ ଦେଇଥିଲେ । ଫଳରେ ଗୁରୁବାର ଠାରୁ ଶ୍ରବଣଙ୍କୁ ଥାନାକୁ ଆଣି ପୁଲିସ୍, ଏସ୍ଆଇଟି ଓ ଜିଏସ୍ଟିର ଅଧିକାରୀମାନେ ମାରାଥନ ଜେରା କରିଥିଲେ।
