ମୁମ୍ବାଇ,୦୩/୦୮: ଦିବଙ୍ଗତ ଉଦ୍ୟୋଗପତି ତଥା ବଲିଉଡ଼ ଅଭିନେତ୍ରୀ କରିସ୍ମା କପୁରଙ୍କ ପୂର୍ବ ସ୍ୱାମୀ ସଞ୍ଜୟ କପୁରଙ୍କର ପ୍ରାୟ ୩୦ ହଜାର କୋଟିର ସମ୍ପତ୍ତି ରହିଛି । ଏହି ସମ୍ପତ୍ତିର ମାଲିକ କିଏ ହେବ ? ୩୦ ହଜାର କୋଟିର ଉତ୍ତରାଧିକାରୀ କିଏ ? ଏହାକୁ ନେଇ ବିବାଦ ଚାଲିଛି । ସଞ୍ଜୟଙ୍କ ଦେହାନ୍ତ ସନ୍ଦେହ ଘେରରେ ଥିବାବେଳେ ସମ୍ପତ୍ତିକୁ ନେଇ ଆଇନ୍ଗତ ଲଢେଇ ହୋଇଛି । ସଞ୍ଜୟ କପୁରଙ୍କ ସମ୍ପତ୍ତିକୁ ନେଇ ପରିବାର ଏବଂ କର୍ପୋରେଟ୍ ଯୁଦ୍ଧ ଏବେ ଏକ ନୂଆ ମୋଡ଼ ନେଇଛି । ତାଙ୍କ ମାଆ ରାଣୀ କପୁର ଏବେ ୟୁକେ ତଦନ୍ତକାରୀ ସଂସ୍ଥାଗୁଡ଼ିକଠାରୁ ସଞ୍ଜୟ କପୁରଙ୍କ ମୃତ୍ୟୁର ତଦନ୍ତ ଦାବି କରିଛନ୍ତି । ପୁଅର ମୃତ୍ୟୁ ପରେ, ତାଙ୍କୁ ଏବଂ ପରିବାରର ଉତ୍ତରାଧିକାରୀକୁ ଦୂରରେ ରଖାଯାଇଥିବା ରାଣୀ କପୁର ଅଭିଯୋଗ କରିଛନ୍ତି । ସୋନା BLW (ସୋନା କମ୍ଷ୍ଟାର) ର କାର୍ଯ୍ୟ ଏବଂ କମ୍ପାନୀର ବୋର୍ଡର ନିଷ୍ପତ୍ତି ଉପରେ ମଧ୍ୟ ଗମ୍ଭୀର ପ୍ରଶ୍ନ ଉଠାଇଛନ୍ତି ।
କ’ଣ ପୂରା ଘଟଣା ? ଜୁନ୍ ୧୨ ତାରିଖରେ ଇଂଲଣ୍ଡରେ ହଠାତ୍ ସଞ୍ଜୟ କପୁରଙ୍କର ମୃତ୍ୟୁ ହୋଇଥିଲା । ମୃତ୍ୟୁର କାରଣ ମହୁମାଛି କାମୁଡ଼ିବା ନେଇ ହୋଇଥିବା ରିପୋର୍ଟରେ କୁହାଯାଇଥିଲା । କିନ୍ତୁ ସଞ୍ଜୟଙ୍କ ମାଆ ରାଣୀ କପୁର ସନ୍ଦେହ କରୁଛନ୍ତି । ସେ ଏହାକୁ ରହସ୍ୟମୟ ବୋଲି କହିଛନ୍ତି । ବ୍ରିଟିଶ କର୍ତ୍ତୃପକ୍ଷଙ୍କଠାରୁ ପୁଅ ମୃତ୍ୟୁର ଏକ ନିରପେକ୍ଷ ତଦନ୍ତ ଦାବି କରିଛନ୍ତି । ରାଣୀ କପୁର ଦାବି କରିଛନ୍ତି ଯେ, ତାଙ୍କ ପୁଅର ମୃତ୍ୟୁ ପରେ, ଏତେ ବଡ଼ ଦୁଃଖ ଭିତରେ ଏକ ବନ୍ଦ କୋଠରୀରେ ଦସ୍ତଖତ କରିବାକୁ ବାଧ୍ୟ କରାଯାଇଥିଲା । ବର୍ତ୍ତମାନ ସେହି କାଗଜପତ୍ର ଆଧାରରେ ତାଙ୍କୁ କମ୍ପାନୀ ଏବଂ ସମ୍ପତ୍ତିରୁ ସମ୍ପୂର୍ଣ୍ଣ ବାଦ ଦିଆଯାଇଛି ।
ଅଭିଯୋଗକୁ ଭିତ୍ତିହୀନ କହିଲା କମ୍ପାନୀ- ସୋନା କମ୍ଷ୍ଚାର ୨୫ ଜୁଲାଇରେ ଏକ ସରକାରୀ ବିବୃତ୍ତି ଜାରି କରି ରାଣୀ କପୁରଙ୍କ ସମସ୍ତ ଅଭିଯୋଗକୁ ପ୍ରତ୍ୟାଖ୍ୟାନ କରିଛି । କମ୍ପାନୀ କହିଛି ଯେ, ରାଣୀ କପୁର ୨୦୧୯ ପରଠାରୁ କମ୍ପାନୀର ସେୟାରହୋଲ୍ଡର ନାହାନ୍ତି, ନା ନିର୍ଦ୍ଦେଶକ କିମ୍ବା ଅଧିକାରୀ ଅଛନ୍ତି । ସେ କରିଥିବା ଅଭିଯୋଗ ଭିତ୍ତିହୀନ ଏହା ସେୟାରହୋଲ୍ଡରଙ୍କ ସ୍ୱାର୍ଥକୁ କ୍ଷତି ପହଞ୍ଚାଇପାରେ । କମ୍ପାନୀ AGMରେ ହୋଇଥିବା ନିଯୁକ୍ତିଗୁଡ଼ିକୁ ଆଇନଗତ ଭାବରେ ସଠିକ୍ । ଏହି ସମସ୍ତ ନିଷ୍ପତ୍ତି ନିୟାମକ ମାନଦଣ୍ଡ ଅନୁଯାୟୀ ହୋଇଛି । ରାଣୀ କପୁରଙ୍କୁ ମାନହାନି ନୋଟିସ୍ ପଠାଇବା କମ୍ପାନୀ ନିଶ୍ଚିତ କରିଛି ।
ସଞ୍ଜୟଙ୍କ ମାଆଙ୍କ ପାଖରେ କଣ ବିକଳ୍ପ ? ମାମଲାରେ ଆଇନଗତ ଲଢ଼େଇ ଏକପ୍ରକାଶର ନିଶ୍ଚିତ ବୋଲି ଅନୁମାନ କରାଯାଉଛି । ଆଇନ ବିଶେଷଜ୍ଞଙ୍କ ମତରେ, ରାଣୀ କପୁରଙ୍କ ପାଖରେ ଅନେକ ବିକଳ୍ପ ଅଛି । ସେ ସିଭିଲ୍ କୋର୍ଟରେ ଉତ୍ତରାଧିକାର ଅଧିକାରର ପାଇଁ ଆବେଦନ କରିପାରିବେ। କମ୍ପାନୀ ଅଧିନିୟମ ୨୦୧୩ ଅଧ୍ୟାୟ XVI ଅନୁଯାୟୀ ନିର୍ଯାତନା ଏବଂ କୁପରିଚାଳନା ମାମଲା ପାଇଁ ସେ NCLT ପାଖକୁ ଯାଇପାରିବେ। ଯଦି ତାଙ୍କ ଅଭିଯୋଗ ସତ୍ୟ ବୋଲି ପ୍ରମାଣିତ ହୁଏ, ତେବେ ସେ ଠକେଇ, ଚାପ ଏବଂ ଦସ୍ତାବିଜ ହେରଫେର ପାଇଁ ଏକ ଫୌଜଦାରୀ ମାମଲା ବି ଦାୟର କରିପାରିବେ। ଏବେ ପ୍ରଶ୍ନ ହେଉଛି, ସଞ୍ଜୟ କପୁରଙ୍କ ୩୦ ହଜାର କୋଟିର ପ୍ରକୃତ ଉତ୍ତରାଧିକାରୀ କିଏ ହେବ ?
