ମୁମ୍ବାଇ,୦୩/୦୮: ବଲିଉଡ୍ ଅଭିନେତ୍ରୀ ରାଣୀ ମୁଖାର୍ଜୀଙ୍କ ଖୁସି ଏବେ କହିଲେ ନସରେ । ଅଭିନେତ୍ରୀ ତାଙ୍କ ୩୦ ବର୍ଷର ଫିଲ୍ମ କ୍ୟାରିଅରରେ ପ୍ରଥମ ଥର ପାଇଁ ଜାତୀୟ ପୁରସ୍କାର ଜିତିଛନ୍ତି। 'ମିସେସ୍ ଚାଟାର୍ଜୀ ଭର୍ସେସ୍ ନରୱେ' ଫିଲ୍ମ ପାଇଁ ରାଣୀଙ୍କୁ ଶ୍ରେଷ୍ଠ ଅଭିନେତ୍ରୀର ପୁରସ୍କାର ମିଳିଛି। ଆଉ ଏହାରି ମଧ୍ୟରେ ଅଭିନେତ୍ରୀ ମୁମ୍ବାଇର ସିଦ୍ଧିବିନାୟକ ମନ୍ଦିର ଯାଇ ବିନାୟକଙ୍କ ଆଶୀର୍ବାଦ ନେଇଛନ୍ତି । ଯେଉଁଠାରୁ ତାଙ୍କର ଫଟୋ ଏବେ ସୋସିଆଲ ମିଡିଆରେ ପ୍ରକାଶ ପାଇଛି ।
ରାଣୀ ମୁଖାର୍ଜୀଙ୍କ ଏହି ଫଟୋଗୁଡ଼ିକ ସିଦ୍ଧି ବିନାୟକ ମନ୍ଦିରର ଅଫିସିଆଲ୍ ଇନଷ୍ଟାଗ୍ରାମ୍ ପେଜରେ ସେୟାର କରାଯାଇଛି। ଯେଉଁଥିରେ ଅଭିନେତ୍ରୀ ପାରମ୍ପରିକ ଲୁକ୍ ରେ ନଜର ଆସିଛନ୍ତି। ସେ ନୀଳ ରଙ୍ଗର ସୁଟ୍ ପିନ୍ଧିଥିବା ବେଳେ ତାଙ୍କ କାନ୍ଧରେ ଶାଲ୍ ଏବଂ କପାଳରେ ତିଳକ ଲାଗିଛି। ଫଟୋଗୁଡ଼ିକରେ ରାଣୀ ଗଣପତି ବାପ୍ପାଙ୍କ ସମ୍ମୁଖରେ ହାତ ଯୋଡି ଠିଆ ହୋଇଥିବା ଦେଖାଯାଉଛି। ଏହି ପୋଷ୍ଟରେ, ଅଭିନେତ୍ରୀଙ୍କ ପ୍ରଶଂସକମାନେ ତାଙ୍କୁ ପୁରସ୍କାର ପାଇବା ପାଇଁ ଅଭିନନ୍ଦନ ଜଣାଇଛନ୍ତି ।
ରାଣୀ ମୁଖାର୍ଜୀଙ୍କ ଫିଲ୍ମ 'ମିସେସ୍ ଚାଟାର୍ଜୀ ଭର୍ସେସ୍ ନରୱେ' ୨୦୨୩ ମସିହାରେ ମୁକ୍ତିଲାଭ କରିଥିଲା। ସେ ଏହି ଫିଲ୍ମରେ ଦେବିକା ଚାଟାର୍ଜୀ ଭୂମିକାରେ ଅଭିନୟ କରିଥିଲେ। ରାଣୀଙ୍କ ଫିଲ୍ମଟି ଏକ ସତ୍ୟ କାହାଣୀ ଉପରେ ଆଧାରିତ। ଆପଣ ଏହି ଫିଲ୍ମଟି ଘରେ ବସି ନେଟଫ୍ଲିକ୍ସରେ ଦେଖିପାରିବେ। ତେବେ ରାନୀ ମୁଖାର୍ଜୀଙ୍କ ଅଭିନୟ କ୍ୟାରିଅର୍ ଫିଲ୍ମ 'ରାଜା କି ଆଏଗି ବାରାତ୍' ରୁ ଆରମ୍ଭ ହୋଇଥିଲା ।ଏହା ପରେ, ସେ ଆଉ ପଛକୁ ଚାହିଁ ନଥିଲେ ।ଅଭିନେତ୍ରୀ ତାଙ୍କ କ୍ୟାରିୟରରେ 'କୁଛ୍ କୁଛ୍ ହୋ ହୈ,'ହମ୍ ତୁମ୍','ବଣ୍ଟି ଅର ବବଲି','କଭି ଅଲବିଦା ନା କହନା','ତଲାଶ୍' ଏବଂ 'ହିଚ୍କି' ଭଳି ଅନେକ ସୁପରହିଟ୍ ଚଳଚ୍ଚିତ୍ର ଦେଇଛନ୍ତି। ଏବେ ଖୁବଶୀଘ୍ର ଅଭିନେତ୍ରୀଙ୍କୁ 'ମରଦାନୀ ୩' ରେ ଦେଖିବାକୁ ମିଳିବ । ପ୍ରକାଶ ଥାଉକି, ବଲିଉଡ ବାଦଶାହା ଶାହାରୁଖ ଖାନଙ୍କ ପାଇଁ ମଧ୍ୟ ୭୧ତମ ଜାତୀୟ ପୁରସ୍କାର ବହୁତ ସ୍ୱତନ୍ତ୍ର ରହିଛି । ଅଭିନେତାଙ୍କୁ ତାଙ୍କ କ୍ୟାରିଅରର ପ୍ରଥମ ଜାତୀୟ ପୁରସ୍କାର ମିଳିଛି। ଯାହା ସେ 'ଜୱାନ' ଫିଲ୍ମ ପାଇଁ ଜିତିଛନ୍ତି । । ଶାହାରୁଖଙ୍କୁ ସର୍ବୋତ୍ତମ ଅଭିନେତା ପୁରସ୍କାର ମିଳିଛି।
