ନୂଆଦିଲ୍ଲୀ ୦୩/୦୮: ପୂର୍ବତନ ସାଂସଦ ତଥା ଦକ୍ଷିଣ ଭାରତୀୟ ଫିଲ୍ମ ଅଭିନେତ୍ରୀ ରମ୍ୟାଙ୍କୁ ଦୁଷ୍କର୍ମ ଏବଂ ହତ୍ୟା ଧମକ ଦେଇଥିବା ଅଭିଯୋଗରେ ବେଙ୍ଗାଲୁରୁ ପୁଲିସ ୨ ଜଣଙ୍କୁ ଗିରଫ କରିଛି। ଏହା ବ୍ୟତୀତ ଅନ୍ୟ ୧୧ ଅଭିଯୁକ୍ତଙ୍କୁ ଚିହ୍ନଟ କରାଯାଇଛି ଏବଂ ସେମାନଙ୍କୁ ଶୀଘ୍ର ଗିରଫ କରାଯିବ ବୋଲି ବେଙ୍ଗାଲୁରୁ ପୁଲିସ କମିସନର ସୀମାନ୍ତ କୁମାର ସିଂହ କହିଛନ୍ତି। ଅଭିଯୁକ୍ତମାନେ ରମ୍ୟାଙ୍କ ନିକଟକୁ ସାମାଜିକ ଗଣମାଧ୍ୟମରେ ଦୁଷ୍କର୍ମ ଓ ହତ୍ୟା ଭଳି ଧମକପୂର୍ଣ୍ଣ ବାର୍ତ୍ତା ଦେଇଥିବା କୁହାଯାଇଛି।
ସୂଚନା ଅନୁଯାୟୀ, କନ୍ନଡ ସୁପରଷ୍ଟାର ଦର୍ଶନ ଏକ ହତ୍ୟା ମାମଲାରେ ଫସିଥିବାବେଳେ ରମ୍ୟା ଜୁଲାଇ ୧୪ରେ ଏହାକୁ ନେଇ ନିଜର ଏକ୍ସ ଆକାଉଣ୍ଟରେ ମନ୍ତବ୍ୟ ପୋଷ୍ଟ କରିଥିଲେ। ରମ୍ୟା ମୃତକଙ୍କ ପରିବାର ପ୍ରତି ସମବେଦନା ଜଣାଇଥିଲେ। ସମ୍ଭବତଃ ଏଥିରେ କ୍ଷୁବ୍ଧ ହୋଇ ଦର୍ଶନଙ୍କ ସମର୍ଥକମାନେ ଅଭିନେତ୍ରୀଙ୍କୁ ଏଭଳି ଧମକ ଦେଇଥିବା ଅନୁମାନ କରାଯାଉଛି।
ତେବେ ରମ୍ୟା କନ୍ନଡ ସମେତ ଏକାଧିକ ଦକ୍ଷିଣ ଭାରତୀୟ ଫିଲ୍ମରେ ଅଭିନୟ କରି ଉଚ୍ଚପ୍ରଶଂସିତ ହୋଇଥିବାବେଳେ ୨୦୨୩ରେ କର୍ଣ୍ଣାଟକ ମାଣ୍ଡ୍ୟା ଆସନରୁ ଲୋକସଭାକୁ ନିର୍ବାଚିତ ହୋଇଥିଲେ।
