ପାଟନା: ଦୁଇଟି EPIC ନମ୍ବର ମାମଲାରେ ଆରଜେଡି ନେତା ଏବଂ ବିହାରର ପୂର୍ବତନ ଉପମୁଖ୍ୟମନ୍ତ୍ରୀ ତେଜସ୍ୱୀ ଯାଦବ ଅଡ଼ୁଆରେ ପଡ଼ିଛନ୍ତି । ନିର୍ବାଚନ କମିଶନ ତାଙ୍କୁ ଏହି ମାମଲାରେ ନୋଟିସ ପଠାଇଛନ୍ତି । ଦୁଇଟି ଭୋଟର ପରିଚୟ ପତ୍ର ମାମଲାରେ ନିର୍ବାଚନ ଆୟୋଗ ତାଙ୍କଠାରୁ ଜବାବ ମାଗିଛନ୍ତି । ତେଜସ୍ୱୀଙ୍କଠାରୁ ଭୋଟର ପରିଚୟ ପତ୍ରର ମୂଳ କପି ମଗାଯାଇଛି। ତେଜସ୍ୱୀ ଯାଦବ ସାମ୍ବାଦିକ ସମ୍ମିଳନୀରେ ଯେଉଁ EPIC ନମ୍ବର ଦେଖାଇଥିଲେ ତାହା ନିର୍ବାଚନ କମିଶନର ପ୍ରାଥମିକ ତଦନ୍ତରେ କୌଣସି ସ୍ଥାନରେ ମିଳିନାହିଁ। 

ଭାରତରେ ଜଣେ ବ୍ୟକ୍ତି ଦୁଇଟି ଭୋଟର ପରିଚୟପତ୍ର ରଖିପାରିବେ ନାହିଁ। ଏହା ବେଆଇନ। ଏହା ଲୋକ ପ୍ରତିନିଧିତ୍ୱ ଆଇନ, ୧୯୫୧ ଅନୁଯାୟୀ ଦଣ୍ଡନୀୟ ଅପରାଧ । ଏହି ମାମଲାରେ ଦୋଷୀ ସାବ୍ୟସ୍ତ ହୋଇଥିବା ବ୍ୟକ୍ତିଙ୍କୁ ଏକ ବର୍ଷ ଜେଲ୍ କିମ୍ବା ଜରିମାନା ହୋଇପାରେ । ନିର୍ବାଚନ କମିଶନ ଏହି ଘଟଣାର ତଦନ୍ତ କରୁଛନ୍ତି। ଯଦି ଦୁଇଟି ଭୋଟର ପରିଚୟପତ୍ରର ମାମଲା ସତ୍ୟ ବୋଲି ପ୍ରମାଣିତ ହୁଏ, ତେବେ ଏହାକୁ ଏକ ଗମ୍ଭୀର ନିର୍ବାଚନୀ ଅପରାଧ ଭାବରେ ବିବେଚନା କରାଯିବ । ତେଜସ୍ୱୀଙ୍କ ବୈଧ EPIC ନମ୍ବର RAB0456228 । କିନ୍ତୁ ତାଙ୍କ ପାଖରେ ଥିବା RAB2916120ର କୌଣସି ରେକର୍ଡ ମିଳିନାହିଁ । ତେଣୁ ନିର୍ବାଚନ କମିଶନ ଏହି ମାମଲାରେ ତେଜସ୍ୱୀଙ୍କୁ ନୋଟିସ ପଠାଇ ଭୋଟର ପରିଚୟପତ୍ରର ମୂଳ କପି ମାଗିଛନ୍ତି । 

ଆଗାମୀ ବିଧାନସଭା ନିର୍ବାଚନ ପୂର୍ବରୁ ଏହି ମାମଲା ବିହାର ରାଜନୀତିରେ ହଇଚଇ ସୃଷ୍ଟି କରିଛି । ଏହି ବିବାଦ ସେତେବେଳେ ଆରମ୍ଭ ହୋଇଥିଲା ଯେତେବେଳେ ତେଜସ୍ୱୀ ଦାବି କରିଥିଲେ ଯେ, ତାଙ୍କ ନାମ ଡ୍ରାଫ୍ଟ ଭୋଟର ତାଲିକାରେ ନାହିଁ । ସେ ସାମ୍ବାଦିକ ସମ୍ମିଳନୀରେ EPIC ନମ୍ବର RAB2916120 ସେୟାର କରିଥିଲେ । ଏହା ପରେ, ନିର୍ବାଚନ କମିଶନ କହିଥିଲେ ଯେ, ତାଙ୍କ ନାମ ଡ୍ରାଫ୍ଟ ଭୋଟର ତାଲିକାରେ ଅଛି। କମିଶନ କହିଥିଲେ ଯେ, ତେଜସ୍ୱୀଙ୍କ EPIC ନମ୍ବର RAB0456228 (ପାଟଳିପୁତ୍ର ଅଞ୍ଚଳ, ମତଦାନ କେନ୍ଦ୍ର 204, ସିରିଏଲ୍ ନମ୍ବର୪୧୬ ) ସହିତ ଅଛି । କମିଶନ ଏହା ମଧ୍ୟ ସ୍ପଷ୍ଟ କରିଥିଲେ ଯେ, ତେଜସ୍ୱୀ ୨୦୧୫ ଏବଂ ୨୦୨୦ ବିଧାନସଭା ନିର୍ବାଚନରେ ଏହି ନମ୍ବର ବ୍ୟବହାର କରିଥିଲେ ।

ତେଜସ୍ୱୀଙ୍କ ଦ୍ୱିତୀୟ EPIC ନମ୍ବର ସରକାରୀ ରେକର୍ଡରେ ନାହିଁ ଏବଂ ଏହା ନକଲି ହୋଇପାରେ ବୋଲି ନିର୍ବାଚନ କମିଶନ କହିଛନ୍ତି । ନିର୍ବାଚନ କମିଶନ ଏହି ମାମଲାର ତଦନ୍ତ ଆରମ୍ଭ କରିଛନ୍ତି ଏବଂ RAB2916120 ନମ୍ବର ବିଷୟରେ ସ୍ପଷ୍ଟୀକରଣ ମାଗିବା ପାଇଁ ତେଜସ୍ୱୀଙ୍କୁ ନୋଟିସ୍ ଜାରି କରିଛନ୍ତି । ଅନ୍ୟପକ୍ଷରେ, ତେଜସ୍ୱୀ ଏହାକୁ ଏକ ରାଜନୈତିକ ଷଡ଼ଯନ୍ତ୍ର ବୋଲି କହିଛନ୍ତି। ସେ ଦାବି କରିଛନ୍ତି ଯେ, ତାଙ୍କର EPIC ନମ୍ବର ପରିବର୍ତ୍ତନ କରାଯାଇଛି ।